Ezequiel 14
14
Dawan dauh kau minitnayuyulna niningkauh
1Israel muihnibararak balna manas aiwi yatatalna, Papang yakat yulwi dakana atnin. 2Kaput dawak, Papang yang akat kaiwi aput yayulna: 3“Adika ahalni balna, witingna dawan dauh yakat manah minitna yuyulwi, dawak witingna miniknapa kidika dutni yayamwa yakat manah tatalwi. ¿Bahang dating kat yayulwi dakakawarangkat pah? 4Witingna yakat diyulta: ‘Papang aput yulwi: Israel muihni balna bitik, witingna, dawan dauh yakat minitna yuyulwa kidika, dawak dutni yayamwa yakatmanah miniknapa tatalwa kidika, dawak usnit kat prapit yakat aiwi di yulwi dakakawarang kat, yang lawik diyulki dinina palni kidika, dawan dauh manas duduwa kidika yulni.’
5“Yang lawik, Israel balna kulninna yakat sukki, yang kaupak naikau kalahwi uina kidika dawan dauh yulni. 6Kidika bahang Israel balna yakat diyulta: ‘Aput Papang yulwi: Yang akat aiwanauh, dawan dauh balna kidika kaupak data lawanauh, dawak di dutni kidika bitik data lawanauh.’ 7Israel muihni as, kidika awaskat, pa ūk muihni as Israel pasyakat yalahwa kat, yang kaupak naikau kalahwi dawan dauh yakat manah minit yulwarang kat, dawak dutni yamwa yakat manah minikpa talwarang, usnit kat prapit yakat kiwarang, yang akat di yayulwi dakanin, bahang yang lawik kalyulna awaki: 8Kidika alni nining yakat lawaki, bahang wah as kalana awaki sampla kapat, bahang kidika laih muih bitik laih yulni kidika yuyulwarang, dawak yang tawanki paskaupak dakpamna awaki. Kaput laih manna amangkilatanama, yang adika Papangyang.
9“Prapit as yulni kidika alas karang kat, kidika laih yang lawik alas kalyulnayang karang, dawak yang tingki dulautik wah kalana awaki, dawak tawanki Israel kidika kaupak dakpamki. 10Muih al kaiwi kalyulwi dakawa kidika, dawak pranipit yaka bik wah duduna karang dutnina yulni, 11kaput laih Israel kidika watwi yangkaupak yadawi kalahwas karang, dawak kidika dutni balna karak bik kiwas karang. Witingna kidika yang tawanki karang, dawak yang adika witingna Papangni awaki. Yang, Papangyang kat yultayang.”
Jerusalén laih wah dunin kidika yamni ki
12Papang yang yakat kiwi yayulna: 13“Sau as yang nikingkauh dutni yamna karang kat, dawak barangni-awas karang kat, yang tingki dulautik wah kalaki, dawak kasnin balna bitik dakyakki, dawak witing minit yakat yuh kiwarang, dawakat kalating kat muih dadauna karang, dawak tinglau satni balna bik. 14Dawak kidika sauni yakat, Noa, Danel#14.14 Hibru kau Danel kidika-awas kat Daniel, sara umani yakat kalbauyang nuhni as dai; witing ayangni kidika nuhni dai kat sins lani tuhni dawak bik barangni dai bahang. dawak Job, witingna yakat yalalahwarang kat, kidika balna manah yaklalana karang, kat witingna laih la kat balna bahang. Yang, Dawan yang kat yultayang.
15“Dawak di anyang balna sau as kau sihki kat, kidika muihni balna laih īna karang, dawak pāni kidika laih kauhmak wanilang as kalna karang, dawak yakut muih as bik bayakwas karang asangpas dini anyang balna kidika yamaduwi, 16dawak kidika ahalni balna bās kidika yakat yalalahwa karang kat, witingna walaninabis ahal dawak yayal balna bik sip laihwi yayakwas karang; witingna manah laih sip karang kiri yaklana atninna, dawak kidika sauni laih kauhmak wanilang manah kalna karang. Yang, Dawan yang kat sangkika kau yaktik yultayang.
17“Dawak wār kalating kaiwarang kat kidika sauni minit yakat, dawak yang lawik pakki kat, muih dawak tinglau balna bitik dauna atnin, 18dawak kidika ahalni balna bās kidika yakat yalalahwa karang kat, walaninabis ahal, dawak yayal kidika bik sip laihwi yakwas karang; witingna manah laih sip karang kiri yaklana atninna. Yang Dawan yang kat sangkika kau yaktik yultayang.
19“Dawak kidika sauni yakat siknis sihki kat, dawak kulnik daukalna kidika kau yakat annin kidika dahki kat, dawak yamting kat muih dawak tinglau balna bik dadauwarang kat, 20kidika pāni yakat Noa, Danel dawak Job witingna yalalahwa karang kat, witingna sip walaninabis ahal dawak yayal kidika laihwi yayakwas karang; witingna manah laih sip karang kiri yaklana atninna kat witingna laih la kat kidika yulni. Yang, Dawan yang kat, sangkika kau yaktik yultayang.
21“Yang, Papangyang kat yultayang: Kau dutni karang Jerusalén yakat, yang wah dudutni arungka dutayang kidika sihki kat: wār, yuh, didauh anyang balna, dawak siknis,#Rib 6:8. dawak kidika yaklauwi iwarang, muih dawak didauh balna bik. 22Buaslah sangninaka duduwarang, dawak witingna sip karang walaninabis balna karak kalahna atnin kidika kaupak. Manna yakat uiwarang kat, manna talnama, witingna kidika amput kidik dawak di balna yayamna yaka bik, dawak manna lawa walanina ātanama, yang lawik Jerusalén minit yakat wah sihnayang kidika yulni. 23Witingna kidika walanina āna karang tatalwak amput witingna yayamna kidik dawak di balna yayamna kidika bik. Kaput dawak manna amanglatanama, tanka dis laih awasdai yang yamnayang balna bitik kidika Jerusalén minit yakat. Yang Papangyang kat yultayang.”
Currently Selected:
Ezequiel 14: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
