Éxodo 35
35
Satadi lāni balna kidika
(Ex 31:12-17)
1Israel Muihni balna kidika, Moses yaklauwi bitik uduhwi diyulna: “Dawan yaklauwi adika yamnin yulna: 2Sipkarang ma tiaskauas wark yamnin, kaunah ma tiaskaubu kidika laih Dawan dini kultanama, bitik palni laih wingta puhnin karang Dawan risnipik yakat.#Ex 20:8-11; 23:12; 31:15; 34:21; Lv 23:3; Dt 5:12-14. Wais kat kidika mani wark yamna karangkat daunin yakat wirlana karang. 3Angkat, angkat manna yalahtanama kat, satadi mani kidika kuh bik bitas awanama yakurupdinin mani#35.3 Yakurupdinin mani: kidika laih yulwi satadi. kidik.”
Holi pāni yakat minitdis kalanin dini kidika
(Ex 25:1-9)
4Moses yaklauwi Israel muihni balna bitik yakat kiwi diyulna: “Dawak yaklauwi yulna adika dini yamnin: 5Manna minitdis kalanin dini as uduhtanauh Dawan dini. Muih bitik kulnin lani, Dawan kau minitdis kalnin kidika kalana atnin, duainamna ki gol, lalah, dawak bras, 6asna paisa sa, paisa dawak pauni, linin asnina tanit yamni kidika, dawak kuts butuni bik, 7sīp almuk unitak pauna, di unitak yayamni balna kidika, acacia panan, 8awas wasni, Papang dini yaknin, diani walapni kidika, dawak walapni busnin dini kidika bik, 9kipala pauni sa balna kidika dawak kipala ūk yayamni balna kidika kauna prakni tingni kakahlni minitkau kawa kidika yakat ilna atnin dawak sumalyang pasni yakat awa dini kidika kauna.
Holi pāni yakat dunin dini balna kidika
(Ex 39:32-43)
10“Angdika muihni balna di satni yamwi sip balna kidika, aiwi Dawan yaklau yamnin yulna kidika yamninna sip ki: 11holi pāni kidika ūni labanni karuk, ū labanni daklana atnin dini kidika, rahni balna, tatni balna, panani kuswi karauna balna, panani rahni balna, kalni rahni balna, 12la baksni kidika panani kuswi karauna dawak putnin kauna, dawak tunan kau mukwa dini kidik, 13tibil panani kuswi karauna dawak dunin dini balna bitik kauna, plawar busna Dawan dini yakwa kidika kauna, 14awas ilnin dini kidika kauna, dunin dini balna kidika dawak awasni balna kauna, awas wasni balna kauna, 15walapni busnin pāni kidika panani kuswi karauna balna kauna, Papang dini yakwi tunan yakat dia utuhnin wasni kidika kauna, walapni yamni busnin dini kidika kauna, holi pāni yakat kiwi kawa dūrni asnina kidika kauna, 16sakripais karauni kauna busnin pāni kidika bras panani kau lakwi pardawi birna kidika kauna, panani kuswi karauna kidika dawak dunin dini balna kidika kauna, ting suhnin pāni kidika rahni kauna, 17watak rinin asnina balna kidika, rahni balna kauna, watak kiwi kawa kau rinin asnina kidika, 18holi pāni yakat dawak watak yakat uknin panani subangna balna kidika, wahni balna kauna, 19asna karna kat holi pāni yakat prias yamwi kanin dinin kidika kauna, sumalyang Aarón prakni Papang dini yakna kidika, dawak sumalyang prakni walanibis balna dinina kidika kauna.”
Tawan muihni balna minit dis kalanindini duahaiwa kidika
20Israel muihni balna bitik laih Moses kaupak mahka uina dai, 21dawak usnit kat, isningna yakat dalani dakakana dai kidika balna dawak witingna silp kulninna lani alas dis karak, Dawan yakat minit dis kalanin dini duaiwi kalalana dai, kalpaknin ūni labanni kidika yamna atnin dawak ais yamnin nid kidika bik, dawak prak balna bik duahaina dai. 22Muih ahal dawak yayal aina dai, dawak witingna bitik kidika di duahaiwa dai, witingna silp kulninna lani dawak isningna yamni karuk, alahnin dini balna, ting ānin, dawak gol dini satni balna bitik kau. Witingna muihnina kat kat gol Dawan dini yayakna kidika duahaina dai. 23Angdika muihni balna asna paisa sa, paisa, pauni dawak linin asnina yamni, kuts butuni, sīp almuk unitak pauna kidik awaskat di utak yayamni balna duduwa dai kidika duahaina dai. 24Minit dis kalanin dini lalah kidik awaskat gol yayakwadai kidika laih Dawan muhni yakat duahaiwadai; dawak acacia panani duduwadai kidika muihni balna laih, duahaiwadai ais dini yamnin nid kat yamna atnin yulni. 25Muih yayal balna tingnina kau di karwi sip balna kidika, asna paisa, pauni dawak linin asnina yamni kau bik; 26dawak muih yayal tingnina kau di karwi sip balna yamninna dukih diana dai kidika, kuts butuni kakarna dai. 27Tunan muihni balna kidika laih kipala pauni sa dawak kipala yayamni balna bik duahaina dai prak tingni kakahlni yakat dawak sumalyang pasni awa dini kidika yakat bik ana atnin yulni, 28kahnin dini walalapni dawak awas wasni bik duahaina dai, Papang dini yakwi utuhnin salani kidika dawak walapni busnin dini kidika bik duahaina dai.
29Israel muihni balna ahal dawak yayal bik witingna Dawan yaklau Moses yakat yamnin kalyulna dini kidika yakat tingnisut laihwi yamnin dukih diana dai kidika, witingna silp kulninna lani minit dis kalanin dini kidika Dawan yakat duahaina dai.
Di yamyang balna holi pāniyayamna kidika
(Ex 31:1-11)
30Moses yaklau Israel muihni balna yakat aput diyulna: “Talnauh, Dawan yaklau Judá sulani kaupak Bezaleel kidika walwi yakna ki, kidika laih Uri walanibis al dawak bik Hur māni, 31dawak Papang spiritni, sins tuhni, amanglanin, dawak sip baraknin lani kidika bik kalbangna ki 32di wayani balna dawak gol, lalah dawak bras dini balna bik yamna atnin, 33kipala minit nunuhni balna kidika sahwi ilna atnin, dawak tat balna kidika bik sahwi di wayani balna yayamni yamna atnin. 34Sumalnin parasni bik kalana. Witing dawak Dan sulani kaupak Ahisamac walanibis al Aholiab kidika yakat bik, 35di satni balna yamnin kidika sip diyamna di wayani balna kidika yamna atnin, dawak asna paisa sa, paisa, pauni dawak linin asnina yamni kau bik karna atnin, dawak di wayani yayamni bik tingnina kau karna atninna.
Currently Selected:
Éxodo 35: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998