Éxodo 34
34
Lā tatni balna wisam kidika
(Dt 10:1-5)
1Dawan yaklauwi Moses yakat kalyulna:
—Kipala tatni balna bu daktah muhnilau dai kidika kapapat, kaput laih yang ulna awaki muhnilau amput ulna dai kidika kaput, man lawa bahmuknaman kidika. 2Ridi alahwah, yahan mani mapiris Sinaí asangni yakat kilwi kiunin, dawak asangtuna tanit maluihni yakat ilwa yang muhki yakat yawama. 3Muih as bik man karak kilwi kiunin awaski, dawak asang yakat muih as bik lik-atnin awaski; sihm kaput bik laih sīp dawak turuh balna bik asang kidika muhnit yakat di kaswabang atnin awaski.
4Moses witing kipala tatni bu dakna dai muhnilau balna dai kapat. Payahwakat, mapiris palni kipala dakna bu kidika duwi Sinaí asang yakat kilwi kiuna, Dawan yaklauwi yamnin pakna dai kaput. 5Kaput laih Dawan kidika mukus pasmunah kaiwi yaklakwak Moses karak raudai, dawak witing silp ayangni yulna.#34.5 S.n 33 dawak S.d 19 yakat talah. 6Moses muhni yakat yaklawi yulni parasni yulna:
—¡Dawan! ¡Dawan! ¡Papang minikun talnin lani duwa kidika, nai tani talwa kidika, dalani lani bik nuhni duwa kidika, dawak rahm kidika bik! 7Sulani tausin bayakna bik witing barangni kidika dalani lani yakat, dawak dutnina dawak diswa kidika, kulninna dutni kidika bik; kaunah pāt duyang muihni yakat wah kalawas dawaski, kaunah wah kalawi papangnina dutni yamna kidika walanibis balna kau, manina balna kau buhnina balna kau bik, kaput ban tilah kau bik kiwi.#Ex 20:5-6; Nm 14:18; Dt 5:9-10; 7:9-10.
8Sirihni palni Moses witing muhni kidika saukat lakna, dawi Dawan kau ayangni nuhni yamwi 9yulna:
—¡Dawan! ¡Dawan! Rahm palni man ilpma kidika yang dunayang kat, yangna karak yawah. Adika muihni balna laih rahm palni muih dudutni ki, kaunah yangna dutni yamnayangna kidika datang diswang, dawak man tawanma kapat yanadutah.
Pramis as watwi wisam yamna kidika
(Dt 7:1-5)
10Dawan yulna:
“Yamni dakah: yang waradika pramis as yamtayang, tawanma bitik muhni yakat. Di taldas dini kidika yamki ki, kidika laih nisan balna sau akat kidika pasyakat wat as bik yayamwas ki, muih balna bangkidika bitik paskau sakman kidika tatalna karang Dawan yamnin sip kidika, manna yakat yamki kidika laih di taldas as yamni karang.
11“Warmani mayulnayang kidika yamtah, dawak yang lawik manna muhmana kaupak ruhm'yakna awaki amorreo, cananeo, hitita, ferezeo, heveo dawak jebuseo, kidika balna bitik.
12“Kidika sauni yakat yalalahwa balna kidika karak pramis as bik yayamwinih, kidika yakat yawa awanama kidika, kaput laih manayayamwak buknamna awas. 13Nawatkauh laih witingna sakripais bubuswa pāni balna kidika bitik bahta dis datanauh, kininapala dawak pananina daninawan dauh dini yayakna balna kidika#34.13 Panina daninawan dauh dini yayakna balna kidika: kidika balna laih Asera daniwan dauh balna dai dawak kaput bahang, kidika daniwan dauh ayangni diayawa dai. bitik.#Dt 16:21.
14“Manna, dawan ūk dauh balna yakat mamatna yuyulwinih, kat Dawan laih minit anyang bahang. Witing ayangni laih Papang minit anyang.
15“Kidika sauni yakat yalalahwa balna kidika karak pramis as bik yayamwinih, witingna daninawan dauh yakat yaklakwi minitna yuyulwarang yakat, minitdis dini kidika mananin awas yulni, manna yakat manayulwi manadukiwak minitdis kalanin dini kidika manawak kasnamna awas yulni, 16dawak witingna kidika manna walamanabis yayal balna kidika karak kaldunin awas ki, dawak witingna kidika daninawan yakat minitna yuyulwak, walamanabis yayal balna kidika bik minitna yuyulwarang.
17“Manna wat as bik dawan dauh kidika di kau arta yayamwinih.#Ex 20:4; Lv 19:4; Dt 5:8; 27:15.
Kurih balna kaiwa yakatalasna yamnin kidika
(Ex 23:14-19; Dt 16:1-17)
18“Plawar pupuhnin dini#Ex 12:14-20; Lv 23:6-8; Nm 28:16-25. dis āwi busna kidika alasnina yamtanauh, yang lawik amput yamnin manapaknayang kaput, ma tiaskaubu plawar pupuhnin dis busna kidika kastanama. Kidika wainiku laih Abib wainiku karang, kidika wainiku yakat Egipto kaupak alahwanamana bahang.
19“Manna walamanabis al tatuna dutanama kidika laih yang diki karang,#Ex 13:2. dawak bik sihm kaput karang tumanaruh walaninabis yayakwarang kidika bik, sīpmana dawak kutsmana balna bik, walaninabis kidika ahalmuk karang kat. 20Biriku walanibis kidika almuk karang kat, sīp kidika awaskat kuts as kalatanama biriku kidika minit; kaunah kalatas awanama kat biriniku kidika dinimak wir'bahna karang. Dawak kaput bik walamanabis tatuna balna kidika yulnina minitdis kalanin dini as kalanamna ki.#Ex 13:13. Muih as bik kaiwi yatalwas karang, di as bik duaiwas karang kat.
21“Ma tiaskauas wark alahwanama, kaunah ma tiaskaubu kidika laih urupdanama ki,#Ex 20:9-10; 23:12; 31:15; 35:2; Lv 23:3; Dt 5:13-14. di dahnin mani dawak di minik bahnin mani balna karang bik.
22“Wīk alasnina kidika bik yamtanama, plawar minik#Lv 23:15-21; Nm 28:26-31. tatuna bahtamana kidika, dawak kurih witni yakat di minik bahtamana kidika bik.#Lv 23:39-43.
23“Muih ahal bitik kurih as pasyakat wat bās Dawan muhni yakat uiwarang, Israel Papangni yakat. 24Manna muhmana tani yakat nisan ūk balna kidika ruhm'yakki, dawak manna yakat manaki sauni kidika. Kaput laih muih as bik manadakyakwas karang saumana kidika, manna wat bās yawa kaltalnama kat kurih as pasyakat Papangmana yakat.
25“Tinglau sakripais yamtanama yakat, āni kidika karak libibitwinih, plawar busna dawak pupuhnin dini kidika karak, Papang innisal bayakna mani yakat sakripais yamna kidika sutni bayakna kidika apakwinih payahwak kau dini.#Ex 12:10.
26Manna Papangmana ūni yakat di minik tatuna yaknamana tanit yayamni kidika duta yawanamna karang.#Dt 26:2.
“Kuts kidika baisa bin nanangni tani suwa kidika iwi lalahwinih.”#Dt 14:21.
Moses la balna kidika ulwi
27Dawan yaklauwi Moses yakat kalyulna: “Adika yulni balna ultah, kat kidika yulni balna kuduh pramis rahni balna man dawak Israel balna karak yamtayang kidika.”
28Moses kidika yakat Dawan karak watna dai ma 40 dawak pukta 40, di kaswas dawak bik diwas dai. Kidika yakat pramis yulni balna kidika ulna dai, yuldarang kat, lā salap kidika. 29Kidika usnit kat Moses witing yaklakwi kiuna asang kaupak lā tatni balna bu kidika duwi; kaunah asang kaupak yaklakwi kiwak witing muhni yaringni duwa kidik Dawan karak yulbauna kidika yulni, witing amanglawasdai. 30Aarón dawak Israel balna bitik tatalwak Moses muhni kidika yaringni kat, witingna yamaduwi yaihnitna yakat uiwasdai. 31Kaunah Moses yaklauwi diyulna uina atnin, kaput laih Aarón dawak Israel balna taninatuna kidika bitik Moses yakat uina kat, witing yaklauwi yuldibauna. 32Kidika usnitkat, Israel balna kidika bitik Moses yakat uina, dawak Moses yaklauwi Sinaí asangni yakat Dawan yaklauwi di yamnin balna paknadai kidika bitik diyulna. 33Witingna yakat yuldibauwi dana usnit kat, muhni yakat tun muknin as mukna.
34Moses kidika Dawan karak yulbauna kiwakat, tun muknin baini kidika yakpamwi kiwādai, kidika kaupak kalahwi kaiwakat. Kaput laih Dawan kaupak di yamnin balna diyulwa kidika wirlawi Israel balna yakat diyulwadai. 35Israel balna tatalwak Moses muhni kidika yaringni duwak, witing watwi muhni yakat tun muknin kidika kau mukwadai, ban kaput dai watwi Dawan karak kawi yulbauwakat.#2 Kor 3:7-16.
Currently Selected:
Éxodo 34: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998