Éxodo 13
13
1Dawan, Moses yakat kiwi kalyulna:
2“Walaninabis tatuna balna kidika yang diki yaktah, kat Israel balna walaninabis tatuna balna kidika laih yang diki, kaput bik laih tingnina walanbis tatuna balna kidika bik yang diki balna.”#Nm 3:13; Lc 2:23.
3Kaput laih Moses yaklauwi tawan yakat diyulna: “Adika mani manna ismangnakatta awanama, Dawan parasni nuhni kau Egipto kaupak laihwi yakna kidika, kidika yakat warau lani dinit yakat yalahtamana dai kidika. Manna plawar pupuhnin dini dis busna kidika kastanama. 4Manna adika mani alahwamana, Abib wainiku yakat, 5dawak sihm adika wainiku akat alasna kidika yamtanama, Dawan yaklauwi sau as tāwas dawak amak kidika was kapat kira pāni yakat manadukiwarang mani kat, yuldarang kat cananeo, hitita, amorreo, heveo dawak jebuseo balna panina yakat, bahang kidika pāni laih manna muihmana bararak balna kau Papang yaklauwi pramis diyamna dai diana atnin. 6Ma tiaskaubu plawar pupuhnin dini āwas busna kidika kastanama, ma tiaskaubu laihwa mani yakat alasna yamtanama, Dawan ayangni nuhni kidika kau. 7Ma tiaskaubu kidika, plawar pupuhnin dini āwas busna kidika kastanama, dawak manna saumana bitik yakat pupuhwa dini kidika dis atnin ki, kidika awas bik plawar pupuhnin dini āwi busna kidika dis atnin ki. 8Kidika mani manna walaninabis balna yakat diyultanama: ‘Adika yamna ki kat, Dawan mayang kau yamna kidika yulni Egipto kaupak maiyakna dai kidika. 9Dawak, manna kidika tingmana yakat dawak, kidika awaskat sapamana yakat sain as dutamana kapat, adika manna ismangnakatta awanama, Dawan lani kidika ban yulta awanama, kat witing yaklauwi parasni nuhni kau Egipto kaupak manayakna. 10Kidika bahang adika alasnina yamnamna ki kurih kaiwa bitik yakat, dawak mani āna yakat.’
11“Dawan yaklauwi cananeo balna panina yakat manaduwi kiwarang kat, yuldarang kat, kidika sauni manawarang kat, witing pramis yamna kaput manna kau dawak muihnina bararak balna kau bik, 12walamanabis tatuna ahal#Lc 2:23. balna kidika bitik dawak tingmanalau balna walaninabis tatuna yayakwak ahalmuk kidika bitik kau kalanamna ki, kat kidika laih Dawan dini balna bahang. 13Biriku yal kidika walanibis yakwarang kat, sīp bin kidika awaskat kuts bin as kalatanama, biriku bin kidika laihwi yaknin yulni, kaunah manna sīp kalatas awanama kat, biriku almuk bin kidika dinimak yakat laihwi bahna karang. Kaput bik laih walaninabis tatuna ahal kidika yulni, minitdis as kalanin karangki, laihwi yakna atnin yulni, 14dawak yahan mani walamanabis balna yulwi dakawarang kat: ‘¿Adika ais tanka yah?’, manna lawa nangnitnalama: ‘Dawan parasni nuhni kau maiyakna Egipto kaupak, bahang kidika yakat laih warau lani dinit yakat mayalahda dai. 15Fero kulnin dadasni yamwi maidawak malahwas kat, Dawan yaklauwi Egipto muihni balna walaninabis ahal tatuna balna kidika bitik īna dai, dawak tingninalau balna walaninabis tatuna balna kidika bik; kidika yulni Dawan yakat sakripais yamtayangna didauh balna walaninabis tatuna ahalmuk batatahnwa kidika bitik, dawak minit dis dini bik kalatayangna walakinabis ahal tatuna balna kidika tunanina minit. 16Kaput bahang, sihm tingnina yakat kidik awaskat muhnina yakat sain duduwa kapat, adika prinias adika manna yakat ismangnakatwa karang Dawan laih Egipto kaupak parasni nuhni karak maiyakna kidika.’ ”
Mukus dawak kuhpau rahni kidika
17Fero witing Israel muihni balna kidika damukwak kalalahna mani kat, Papang laih filisteo balna saunina yakat kiunin tani kidika munah diduwi kiwas dai, barangni dai kidika yakut, bahang witing kulna dai Israel muihni balna laih kalbabauwas karang kalbaunin awarni kat, dawak Egipto yakauh nawatwi uinin kukulwarang kulna dai. 18Kidika bahang diyamwakat kuma kauhnimak munah awawaihna dai Kuma Pauni tani kiwa yakat.
Israel muihni balna laih Egipto kaupak kalalahna dai sihm kalbauyang muihni balna kat kalpar dadana kapat. 19Moses laih José wakalni balna kidika duwi kiuna dai, bahang José yaklau Israel walanibis balna yakat kaput yamna dai kaput yamna atninna. Aput diyulna dai: “Rahm palni Papang kaiwi ilp mayawarang ki; dawak kidika dini kalahwarang mani kat, yang wakalki balna kidika adika pāni kaupak duyawanamna ki.”#Gn 50:25; Jos 24:32.
20Israel muihni balna laih Sucot kaupak kalahwi uiwi Etam yakat watwi pa duduna dai, mahka kauhmak wanilang kawa kidika yakat. 21Madah kidika laih, Dawan yaklau miniknadawadai mukus as karak, ta kidika niningnakana atnin yulni; dawak pukta kidika laih, kuhpau as karak kalahwa dai, yaringni diana atnin. Kaput laih witingna sipdai madah pukta lapakna atninna. 22Mukus kidika laih witingna tanitna yakat ban kaput kiwadai madah yakat, dawak kuhpau kidika laih pukta yakat kiwadai.#Ex 40:34-38; Nm 9:15-23.
Currently Selected:
Éxodo 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998