Deuteronomio 1
1
Tunan bahna yulni
1Adika yulni balna kuduh Moses yaklauwi Israel balna yakat diyulna dai kidika, kauhmak wanilang yakat bangdai mani balna yakat, Jordán wasni ma kilwa niningkauh yakat, yuldarangkat, Arabá, Suf muhnit yakat, Parán, Tofel, Labán, Hazerot dawak Dizahab sauni walsahkau yakat. 2Horeb asangni kaupak Cades-barnea kat kidika ma 11 praisni lapaknin ki, kidika laih Seir asangni munah kiunin ki. 3-4Kurih 40 laihwi bayakwakat, waiku 11 kawakat ma tatuna yakat, Moses yaklauwi amorreo kingnina#Nm 21:21-30. Sehón, Hesbón sauni yakat yalahwadai kidika yakat kalbauwi minit bayakwi dawi Basán kingni Og,#Nm 21:31-35. Edrei sauni paskau tawan as ayangni Astarot yakat yalahwadai kidika yakat bik kalbauwi minit bayakna kidika usnitkat Moses yaklauwi Israel muihni balna yakat diyulna dai, Dawan yaklauwi ais yamnin diyulna dai kidika tawan muihni balna yakat. 5Jordán wasni ma kilwa niningkauh, Moab sauni yakat bangdai mani, Moses yaklauwi adika yulni balna diyulna dai:
6“Dawan, Mapapangki kidika yaklauwi adika yulni balna maiyulna Horeb asangni yakat: ‘Manna adika asangni akat ma mahni palni bang-atnamana. 7Bahang dimana balna aslah uduhta duta Amorreo balna asangnina yakat yawa āwa dutanauh, dawak yaihnitkau balna kidika bik āwa dutanauh: Arabá asangnipas kidika, sau langni kidika, Néguev asangnipas kidika, kuma kung kidika, cananeo balna saunina kidika, dawak Líbano sauni kidika kaupak Éufrates wasni kung kat āwa dutanama. 8Yang lawik kidika sauni mananayang; bahang kidika sauni kidika yakat yawa awa dutanauh, kat yang Dawan yang adika lawik manna muihmanabararak balna yakat dianik pramis diyamnayang dai bahang, yuldarangkat, Abraham, Isaac dawak Jacob yakat kaput bik laih manna sulamana balna yakat bik.’
Wihta balna āna
(Ex 18:13-27)
9“Sihm kidika mani yang lawik manna yakat manayulnayang dai: ‘Yang alas laih sip-awasyang manna bitik tamatna āwinik. 10Kat Dawan manna Papangmana yaklauwi walabis mahni palni manana bahang, waralaih manna tawan as muih mahni palni kalnamana, sihm kisang kau yala balna mahni kapat. 11¡Manna muihmanabararak balna Daninawan, dawak Papangnina kidika yaklauwi waradika mahni mana kidika kapat manah baisa minityakat 1000 as praisni tanit mahni manayamwang, dawak blismanayamwang muihmanabararak balna mani kau pramis yamna dai kaput! 12Kaput bik yang alas laih sip-awasyang manaduyawana atnik, manna tikimana kidika, tramanabil balna kidika, dawakat kalbiltanang kidika bitik yang alas barangni yamna atnik. 13Kidika bahang, sulani balna paskaupak muih ahal baisa di amanglalawa balna kidika, sins duduwa balna kidika, dawak wark tanka amanglayang balna kidika bik walta yatanauh, dawak yang lawik manna tamanatuna balna āna atnik yulni.’#Nm 11:14-17.
14“Dawakat manna lawa nangkitlana mana: ‘Kulnin lani balna yultaman kidika yamni palni taldi.’
15“Kidika bahang yang lawik yaknayang, manna sulamana balna kat kat, muih ahal baisa sins yamni duduwa balna kidika dawak wark tanka yamni amanglalawa balna yakat, dawak bik parasnina dianayang, manna tamanatuna kaninna yulni; muih as as yakat parasnina dianayang, muih 1000 kidika balna yakat tunan duna atnin, ūk balna yakat laih muih 100 kidika balna tunan duna atnin, ūk kidika balna yakat laih muih 50 kidika balna yakat tunan duna atnin, ūk kidika balna yakat laih muih 10 kidika balna yakat tunan duna atnin, dawak ūk kidika balna yakat laih sulani balna sahyakna balna yakat tunan duna atninna dianayang. 16Kidika minityakat manna tamanatuna balna bitik yakat adika yulni balna diyulnayang: ‘Muih balna bitik yakat ais traninabil duduwa kidika laihta talnauh, dawak rahm palni lā barangni kidika yamtanauh, wanaihmana balna yakat dawak sau ūk muihni balna karang bik papatni lā kidika yamtanama; 17dawak lā yamtanama kidika, muih lanina kidika satuk laih yamnamna awaski: muih minikunni yakat karang, kaput bik muih parasni nuhni duwa yakat karang bik papatni lani kidika yamtanama, kat la yamnin kidika laih Papang dini bahang. Lā as yamnamna sip-awasmana kat, yang yakat yatanauh dawak yang lawik barangni āna awaki.’
18“Kidika mani yakat, lāih palni manasumalnayang dai ais yamnamna dini balna dai kidika bitik kau.
Muih 12 pakwi talna uina kidika
(Nm 13:1—14:4)
19“Mayang Horeb sauni kaupak malahwana mani, Amorreo balna asangnina niningyakat mawanadai, kaput karak Dawan mapapangki yaklau yamnin yulna yakat yamnin yulni. Kauhmak wanilang nuhni yamadangni manna talnamana dai kidika bitik awaihdi Cades-barnea kat mawi mahana dai. 20Kidika yakat manayulnayang dai: ‘Amorreo balna asangnina yakat uman mawi mahana, Dawan mapapangki yaklauwi mayang yakat mayawa kidika. 21Kaput bahang Dawan, manna Papangmana yaklauwi, adika sauni manna yakat manawi. Kaput bahang adika sauni adika manna awa dutanauh Dawan dawi muihmanabararak balna Papangnina ais maiyulna yakat. Manna yamaduduwinih dawak bik kulnamna kidika datanang sau yakat buknin awaski.’ 22Kaunah manna lawa yang akat aiwa yayulnamana dai: ‘Baisa yamni karangki mayang mapasking kaupak buas matakit yakat uiwi adika sauni awaihwi tatalwarang kat, dawak usnit kat aiwi maiyuyulwang angdika tani kidika yakat mawinin kidika dawak angdika tawanni nunuhni balna yakat mawi mahawinin kidika bik.’
23“Adika kulnin lani balna yaknamana kidika, yang yamni palni talnayang, kidika bahang manna pasmangna kaupak muih 12 kidika yaknayang, sulani balna uduhna paskaupak muih as as, 24witingna asangpas munah uina dai dawi Escol asangni wakarhni yakat uiwi kakana dai dawi adika sauni bitik kidika awaihwi tatalna dai. 25Adika awaihwi tatalna usnit kat, sauni paskau pan minik balna kidika dakwi duaiwi yanana dai, adika yulni balna karak: ‘Dawan mapapangki yaklauwi mayang yakat sau mayawa kidika laih sau sa yamni palni ki.’ 26Kaunah manna laih yawanamna kidika dukih manawas dai, nawatkauh Dawan mapapangki yaklauwi yamnin manayulna dai kidika yakat yamtas danamana,#Dt 9:23; Hib 3:16. 27dawak ūmana yakat watta biri biri ap yulbauna mana dawak aput yulnamana: ‘Dawan laih mayang yakat maikulwaski; Egipto sauni kaupak maiyakwi maiduaina Amorreo balna tingnina yakat maiāwi maiīnin yulni manah. 28Dawakat waralaih, ¿angkat mawarangyah? Mayang mawanaihki balna uiwi tatalna kidika yuyulwi kidika sauni yakat muih pararasni kidika bangki atwi yuyulwi dawak bik mayang karak baisa nunuhni ki atwi yuyulwi, tawanni yaihnit balna kidika bik kipala kau manah mayakau daklawi lana atwi yuyulwi dawak kidika minit yakat muih al nuhni palni Anac sulani balna bik bangkat tatalna atwi yuyulwi. Adika yulni balna bitik dakining kat kulnikna kidika sau yakat bukna.’
29“Bahang yang lawik nangnitna lanayang: ‘Yamaduta ira lawa ais ais laih yayamwinih. Yamaninaduduwinih. 30Manna Papangmana Dawan kidika manna tamatna yakat kiwi dawak bik manna yulmana witing kalbauna karang, Egipto kau manna yulmana kalbauwak talnamana dai kaput kalbauna karang 31dawak kauhmak wanilang kau bik kalbauwak talnamana dai kaput kalbauna karang.#Ap.w 13:17-18. Manna Papangmana Dawan yaklauwi tingmana yakat laihwi mana duaina adika ta naini lapaknamana pasyakat dawak adika pāni aiwa āwanamana kat, sihm papang as walanibis kidika tingni yakat laihwi duwa kapat palni.’ 32Kaput kaunah, manna Papangmana Dawan yakat dutni kalkulnamana dai,#Hib 3:19. 33witing laih manna tamatna yakat kiwalikdai yawa watnamna pāni kidika walwi. Pukta yakat kuhpau kau ta namangnakawadai angkut yawanamna kidika, dawakat madah yakat laih mukus pihni as karak ta kidika namangnakawadai.
Dawan laih Israel muihni balna niningna yakat kulnin daukalna
(Nm 14:20-35)
34“Dawan tapani yakat manna apni niningkauh yultanangkat dakana mani kat, kulnin daukalwi dawi adika pranimis yamna: 35‘Adika sulani dudutni balna pas kaupak as bik sau yamni muihninabararak balna kau dianik pramis alahwanayang dai kidika tatalwas karang.#Hib 3:18. 36Kaunah Jefone walanibis al Caleb niningkauh laih kaput awas karang, witing laih yakat pramis sauni kidika talna karang, witing dawi sulani balna bitik yakat sau diana awaki, witingna kalnina taihnin pāni kidika, kat witingna kuduh Dawan lani balna ana yakat dakawi laihwi yayamna bahang.’
37“Manna dutmana yamtanang kaupak, Dawan yaklau yang yakat kulnin daukalwi aput yulna: ‘Man bik kidika sauni yakat yawa awas awama. 38Man pama yakat kiwi kana karang, man tingmasut laihyang Josué, Nun walanibis kidika. Kaput bahang man lauwa witing yakat baisa kulnin dulauta parasni ātah, kat witing yaklauwi sau kidika Israel muihni balna tingnina yakat awarang bahang. 39Manna namangnakauh yaklalauwa balna yaklauwi yalmana balna dawi walamanabis balna bik manadakyayakwarang kulnamana dai kaunah, adika walabis balna kuduh kidika sauni yakat uiwi kakana karang kidika, kat adika walabis balna laih yusyamnin mani kidika baisa kaikawas bahang, kidika sauni pasyakat kakawarang muihni balna yakat; yang lawik witingna saunina diana awaki. 40Manna namangnakauh laih, ¡watta kauhmak wanilang yakat nawatta yawanauh! ¡Watta kuma pauni yakat yawanauh!’
Israel muihni balna yaklau uhuswakat minitna bayayakna kidika
(Nm 14:39-45)
41“Bahang manna bitik lawa nangkitlana mana dai: ‘Mayang Dawan niningkauh madutki balna yamnamayang, kaunah waralaih mayang mawi kalbaudarang, Mapapangki Dawan yaklauwi mayang yakat ais yamnin maiyulna dai kaput yamdarang.’ Dawak manna kalbaunamna dini balna kidika duta, manna bik kulnamana dai asang kidika kil'kiunin yamni ki. 42Kaunah Dawan yaklauwi yang yakat yayulna, manna yakat wattik manayulna atnik: ‘Manna kalbauna uiwinih; namangnakauh yaklalauwa muihni balna niningna yakat bik uinin kukulwinih, kat manataihwi mamatna bayayakwarang kat yang bik manna pasmangna yakat disyang.’
43“Yang manna yakat kidika yulni balna wat wat manayulnayang, kaunah yang yulki dakas danamana, nawatkauh laih Dawan manna yakat lā ana kidika minit bayakta niningkauh lawanamana, dawak sihm wing parasni duwa kapat kaldaka, asang balna yakat ilwa yawanamana dai. 44Bahang kidika asangni balna yakat Amorreo balna bangdai kidika, manna namangna yakat aikalalahna, dawakat sihm baba mahni kapat palni kalahwi, mana uhuina dawi mamatna bayayakna, Seir sauni kaupak Horma sauni kat manakalbauwi mamatna bayayakna dai. 45Manna nawatta aiwa Dawan muhni yakat aidanamana, kaunah manna aidanamana kidika bik Papang tapani lakwi dakawas dana. 46Kidika bahang manna Cades sauni yakat kurih mahni palni watta yalahdanamana dai.
Currently Selected:
Deuteronomio 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998