Deuteronomio 2
2
Kauhmak wanilang pasyakat kurih balna bayakna kidika
1“Kidika usnitkat mayang kauhmak wanilang yakat mawanadai, kuma pauni tani kiwa munah, Dawan yaklauwi yangkau amput yamnin yayulnadai kat kaput, dawakat ma mahni palni Seir asangni yaihnit munah lapakna mayang dai.#Nm 21:4. 2Bahang Dawan yaklauwi aput yayulna: 3‘Ma mahni palni adika asangni yaihnit balna yakat awaihtamana; bahang waralaih tingpal niningyakat yawanauh. 4Adika yulni tawan muihni balna yakat diyultah: Manna Esaú sulani balna saunina munah bayaktanama ki, Seir tawanni kau yalalahwa balna kidika#Gn 36:8; Nm 20:14-21. dawakat kidika balna laih manna wanaihmana balna. Witingna bik manna yakat yamamanaduduwi; kaput bik, manna amung talnauh 5dawak manna lauwa usnamna awaski, kat kidika yamtanama kat yang lawik kidika sauni pis asbik manatas awaki, kat Seir asangnipas balna kidika kuduh Esaú sulani balna saunina. Adika sauni kidika laih yang lawik witingna yakat dianayang. 6Manna lauwa witingna yakat diyultanama, di kasnin dini balna kidika manabakanna atnin, di bitik kidika minitlautanama, was dinamna kat bik minit launa awanama.’ 7Dawan dawak manna Papangmana yaklauwi di yamnamana balna bitik yakat blis yamna; bahang adika kurih 40 bayakna yakat manna pasmangna yakat dai, dawak bik yamni main manatalna dai adika kauhmak wanilang nuhni paskau lapaknamana yakat, dawi bik manna yakat di bitik palni manawadai.
8“Kidika usnitkat Arabá, Elat dawi Ezión-geber tani kaupak naikau malahwi mawanadai, dawi mawanaihki balna Esaú sulani Seir sauni kau bangdai kidika munah bayakdi mawana, dawak kidika yakat awaihnamayang dai Moab kauhnimak walang tani yakat malahwana atnin yulni. 9Bahang Dawan yaklauwi yayulna: ‘Moab muihni balna niningnayakat diuswinih, dawak bik dikalbauwinih, kat witing kuduh Lot sulani balna,#Gn 19:37; Nm 21:10-20. kat kidika yamtanama kat kidika sauni dibin bik manatas awaki. Yang lawik witingna yakat Ar sauni kidika barang dianayang.’ 10(Adika sauni adika sara manikau emita muihni balna yalalahwadai, kidika balna laih muih nunuhni dawak bik muih mahni dai, ahal nanaini sihm muih al nuhni Anac sulani balna kapatdai. 11Dias rahm kidika laih, muih balna kidika kukulwadai, refaíta muihni balna, kaunah Moab muihni balna yaklauwi laih diyuyulwadai emita muihni balna. 12Seir sauni adika sara mani kau laih horeo muihni balna yalalahwadai, kaunah Esaú sulani balna yaklauwi sauni muihni balna yakat imumukna dawi sauni kidika yakat kawi duwi kurih mahni palni yalalahna sihm Israel muihni balna yakat Dawan yaklauwi sau diawakat dakyakwi duduna kaput.) 13‘Kaunah waralaih —Dawan yaklauwi aput yulna—, manna mahka lapakta yawa Zered wasni kidika daklawanauh.’ Bahang mayang kidika wasni kidika madaklawana dai.
14“Cades-barnea sauni dadi malahwana kaupak, Zered wasni dakdi malawana manikat laih, kurih 38 bayakna dai. Bahang adika kurih balna bayakna pasyakat, sulani ahal kalbauyang muihni balna tawan yakat bangdai kidika bitik palni daulalana dai, Dawan yaklauwi amput pramis yamna dai kat kaput.#Nm 14:28-35. 15Dawan parasni nuhni kidika witingna minitna takat bukna, bahang kaput laih bitik palni daulalana dai.
16“Bahang kalbauyang muihni balna ahal kidika bitik daulalana usnitkat, 17Dawan yaklauwi yang akat yulyabauna dawi aput yayulna: 18‘Warmani palni Moab sauni kiwi watwa kidika bayakta data Ar sauni niningyakat yawama, 19kaunah amonita muihni balna karak kalpakma manikat, usnam awaski dawak bik kalbaunam awaski, kat witingna bik Lot sulani balna bahang,#Gn 19:38. kaunah kidika yamtanama kat yang lawik witingna saunina kaupak apis bik matas awaki, kat yang lawik witingna saunina dianayang bahang.’ 20(Adika sauni bik sara manikau refaíta muihni balna bang awadai, kat witingna sara mani kau yalalahwadai kidika yulni, bahang adika sulani balna yakat amonita muihni balna yaklauwi ayangnina papakna dai zomzomeo balna;#2.20 Sipki yulbauwa kaput atnin kidik awaskat tuni amangladas yulwa kaput atnin, grik balna yaklau tuni ūk yuyulwa muihni balna yakat “sins dis” diyuyulwa dai kaput. 21adika sauni adika nuhni palni dai dawak muih bik mahni palni bangdai, muihni balna bik ahal nunuhni sihm Anac sulani balna kapatdai, kaunah Dawan yaklauwi Amonita muihni balna tingnina yakat āwak bahwi dis yayamna dai dawak witingna laih kidika sauni yakat watwi ban kaput atnin yakat yalalahna dai. 22Adika yulni bik sihm Esaú sulani balna yayamna kidika karak kapapat dai, witingna Seir sauni yakat bangkauna horeo muihni balna yakat imumukna kidika, kidika sauni yakat watwi yalahna atninna yulni. 23Heveo sulani balna niningnakauh bik sihm kapat kalahna dai, witingna bik Gaza sauni yaihnit yakat yalalahwadai, kaunah filisteo muihni balna yaklauwi Creta sauni kaupak aiwi saunina kidika didakyakwi witingna kauh kawi yalalahna dai.) 24Dawan yaklauwi yulna: ‘¡Mawanang, lawa lapakta yawa Arnón wasni kidika daklawanauh! Yang lawik yamtingkat amorreo muihni Sehón kidika tingmana yakat buknakarang, Sehón kuduh Hesbón kingni kidika, dawakat witing sainni kidika bik manna tingmana yakat ana awaki. ¡Witing sauni yakat yawa awa data witing niningkauh kalbautanauh! 25Warmani kaupak yang lawik yamtingkat, manna namangna yakat sau muihni balna bitik kidika yamamanaduduna karang. Manna yulmana dakakawarang manikat, witingna diyukna karang dawak yamadunin kidika bik witingna pasningna yakat karang.’
Israel yaklauwi Sehón kingni yakat minit bayakna
(Nm 21:21-30)
26“Cademot kauhnimak walang kaupak, Hesbón kingni Sehón yakat yul muryang balna buas sihnayang, witing yakat dalani lani munah adika yulni kalyulnin yulni: 27‘Man sauma munah bayaknik kultayang, ta muih wawatwa munah kaunah sauma pis ūk yakat laih āwinik kultasyang. 28Di kasnin dini balna kidika lalah kau bakantanaki, dawak was ditanaki kidika bik minit lautanaki. Kaunah di aslah mayultayangna kidika kuduh man lauwa yanadatang kat ta munah bayaktik yawinikna kamanah mayultayangna, 29Esaú sulani balna Seir sauni kau bangkidika, dawak Moab muihni balna Ar sauni kau bangkidika witingna yanadadawak bayaknayangna kaput, Jordán wasni kidika daklawik Papangkina Dawan yaklau sau yanawarang kidika kat yawik āwinikna.’
30“Kaunah king Sehón yaklauwi, witing sauni pas munah yanadawak bayaknikna kidika yulwasdana, kat manna Papangmana Dawan yaklauwi witing kulnin yakat kalawak yulwasdana, kaput kaupak witing kidika manna tingmana yakat ānin yulni, warmani kat bik adika kulnin lani kidika ban sak kaput.
31“Bahang Dawan yaklauwi aput yayulna: ‘Warmani kaupak king Sehón dawi witing sauni bitik kidika man tingma yakat ātayang; bahang sirihni palni sauni yakat āwa laihta dutah.’
32“King Sehón manikingkauh kalbauyang muihni balna bitik duwi kalah'kaiwadai, Jahaza sauni yakat kalbaunin parasni as kalbauna atnin yulni; 33kaunah Dawan yaklauwi yamwakat mayang matingki yakat bukna dai, bahang kaput laih witingna yakat, walanibis balna yakat dawak kalbauyang balna yakat bik kalbaudi minitna bayaknamayang dai. 34Witing tawanni nunuhni balna bitik kidika mayang matingki yakat bubukna dai dawak daukalnin niningyakat wirlanamayang dai; muih ahal, yayal dawak walabis bik idi disyamnamayang, muih as bik sangka dadas dai. 35Di balna as as dunamayang kidika kuduh tinglau balna dawi di minit nunuhni duduwa kidika balna manah dunamayang kidika. 36Aroer tawanni nuhni kaupak, Arnón wasni kung kau pakkidika, dawak asang sar kau tawan nuhni pakkidika kaupak Galaad kat, tawan nuhni as bik mayang manikingkauh yaklaunin sip-awasdai; mapapangki Dawan yaklauwi yamwakat, bitik kidika mayang matingki yakat bubukna dai. 37Sau balna as as niningnakauh kalbaudasdai kidika laih adika balna dai: Amonita balna tawannina, Jacob wasni kung bitik, asang balna kau tawan nunuhni bang bangdai kidika dawak ūk ūk balna mapapangki Dawan yaklauwi daukalnin mayawasdai kidika balna laih usdas danamayang dai.
Currently Selected:
Deuteronomio 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998