Números 36
36
Yayal dini kulna kidika
1Galaad sulani balna tanina tuna, dawak Maquir Manasés duwak José sulani balna palni kidika balna Moses yakat uiwi kaltatalna dai, dawakat Israel sulani tanina tuna balna yakat bik, bahang aput diyuyulna dai:
2—Moses, Dawan yaklauwi man yakat mayulna Israel balna saunina kidika sahyakta dianam, dawakat bik mayulna Zelofehad witing dunin dai kidika, walanibis yayal yakat kalana atnin.#Nm 27:7. 3Kaunah yayal balna kidika Israel sulani ūk karak kalduduwarang kat, saunina kidika angdika sulani al karak kalduduna kidika yakat wiryaklawarang. Bahang kaput laih suerkinati kidika yakat kalahna karang. 4Israel laihwi yakna kurihni kidika kiwi kawarang kat, sauni kidika Israel sulani ūk yakat bukna karang ki, bahang yangna sulakina dini awas kalwarang ki.
5Dawan yaklauwi Moses yakat lā kalana kaput, Israel balna yakat pakwadai:
—José sulani balna kidika rahm yuyulwi. 6Dawan yaklauwi bik diawakat Zelofehad walanibis yayal angdika alni dukih kat duduwarang, kaunah papangnina sulani balna kaina kidika karang kat. 7Israel sulani balna sau duduna kidika sulani ūk, ūk yakat tilalahwas karang, Israel bitik witingna dinina kulna kidika apakwi duduna karang sulanina kat kat, 8Israel sulani angdika karang, kat yal as sau duwarang kat, witing al dunin kat, sihm papangni sulani kat kalduduna karang. Kaput laih Israel bitik kau papangnina di diana kidika apakwi duduna karang. 9Dinina kidika sulani ūk ūk yakat tilahnin awas karang, Israel sulani balna sau duduna kidika apakwi duduna karang.
10-11Zelofehad walanibis yayal balna, Maala, Tirsa, Hogla, Milca, Noa witingna Dawan yaklau Moses kalyulna dai kaput yayamna dai, witingna bikinina balna karak kalduduna dai, 12Manasés sulani balna dai, José walanbis balna. Kaput laih dinina kidika papangni sulani balna pasyakat watna dai.
13Adika lani balna Dawan yaklauwi diana dai Israel balna yakat, Moses munah, Jericó muhnit kau Jordán yaihnit Moab wanilang yakat.
Biblia Sumo
Texto © Sociedad Bíblica de Nicaragua 1998