Daniel 3
3
Gol kau di wayani yamna yakat ayangni tanit nuhni yamnin
1King Nebokatnesar yaklauwi pakwak gol kau di wayani as yayamna dai, naini niningkauh metro 30 duwa dai, dawak panuhni niningkauh laih metro bās duwa dai, dawak dipakna dai Dura wanilang yakat dukiwi dulausaknin, bahang kidika laih Babilon sauni yakat dai. 2Usnit kat kabamint tunani muihni balna bitik yulwi dukiuna, kalbauyang balna taninatuna, lalah maintalyang balna, wihta balna dawak tunan muihni uk uk balna bitik yulwak uina dai, witing sihwakat di wayani yamna alasnina pasyakat atnin. 3Adika nesan tunan muihni nunuhni balna kidika bitik uina dai di wayani yamna kidika yakat alasnina duna atnin. 4Adika alasnina tunan bahwarang muihni kidika yaklauwi yulni parasni sarahwi yulna: “Yamni dakanauh tawan muihni balna bitik, nesan balna bitik kau, dawak tūni sat sat yuyulwa balna bitik kau: 5Manna trompit puhwak dakanamakat, bara bik puhwak dakanama, paswi yakisdinin dini bik dakanama, dawak puhwi yakisdinin kapat dawak yakisdinin dini satni balna bik dakanama kat, manna king Nebokatnesar yaklauwi gol kau di wayani yamna yakat limbabahta mamatna yultanama. 6Wais kat limbabahwi minityulwas karang kat, di wayani yakat, kidika muihni laih kuh pasyakat rumhna karang.”
7Kaput laih, muih mahni kalududuhna sakkidika, puhnin dini kidika dakakana kat mahka limbabahwi minitna yuyulna, gol kau di wayani yamna yakat.
8Caldeos balna buas witingna king muhni yakat uiwi Ju wawahnima balna yulnina yayakna, 9aput yuyulna:
—¡King ban sangka kaput karang dawak ayangni kidika laih dinitnakahwas ban duduwarang! 10King man lawa lā as ānaman, puhnin dini balna kidika puhwak dakakawarang kat, muih bitik gol kau di wayani yamna man yakat limbabahwi minitna yulna atnin, 11angdika muihni yamwas karang kat kuh daihni yakat rumhana atnin. 12Ju muihni balna buas bangki, man lawa tunan muihni ānaman dai kidika Babilon sauni akat, man yakat rispik binibin bik mamawas ki, dawan dauh balna yakat bik minitna yuyulwas ki, dawak gol kau di wayani yamna yakat bik minitna yuyulwas ki. Kidika balna laih, Sadrac, Mesac dawak Abed-nego.
13Nebokatnesar kulnin daukalna, dawak yulwak duwi uina Sadrac, Mesac, dawak Abed-nego. Witing muhni yakat bangkat, 14diyulwi dakana:
—¿Ramhyah manna dawan dauh balna yakat mamatna yultas mana kidika dawak gol kau di wayani pakting yayamna yakat bik mamatna yultasmana kidika? 15¿Manna ridi manah, puhnin dini kidika puhwak di wayani yamnayang kidika yakat limbabahta mamatna yulnamna? Manna mamatna yultas awanama kat, warminitni kuh pasyakat mana rumhana karang; ¿angdika daniwan sipyah manalaihwi yaknin?
16—Adika yulni sip kalbildas ki, —wawahma bās kidika kaput yuyulna—. 17Yangna Papangkina kau mikitna yultayangna kidika yaklauwi kuh dalhwa paskaupak yanalaihwi yakwarang, dawak man, king, yangna kau dutni yanayamnin kultaman kidika bitik yanalaihwi yakna karang. 18Kaunah baisa kaput yamwas karang bik, king dakah, man damawan dauh balna dawak gol kau di wayani yamna man yakat bik limbabahtik mikitna yultas awanaki ki.
Wawahma bās kidika kuh daihni paskaupak laihwi yakna
19Nebokatnesar adika yulni dakawi, muhni bitik pauni kalna dai, kulnin daukalwakat, adika wawahnima balna bās niningna yakat. Kaput laih pakwak kuh kidika baisa biwi daihni yayamna minit yakat wat tiaskaubu praisni; 20usnit kat kalbauyang balna tanit pararasni yakat pakna, Sadrac, Mesac, dawak Abed-nego balna yakat sitwi kuh payakat rumhana atnin. 21Wawahma bās kidika, witingna muih nunuhni praknina kakana yakauna laihwi sitwi kuh payakat rumhahana. 22King yaklauwi yulna kidika minitni yakat yamnin yulna bahang, kuh kidika uba dahlna sak dai, bahang kalbauyang balna yakat paknadai kidika, wawahma bās kidika laihwi kuh yakat rumhana atnin, witingna kauh dibusyamna dai, 23dawak wawahma balna kidika tingnina sitna yakat kuh pasyakat kawi uina dai.
24Kaput dawak king Nebokatnesar muihsakdauwi yaklauwi, lā sumalyang muihni balna yakat diyulna:
—¿Muih ahal bās sitdi kuh pasyakat rumhadas daih?
— Agha —kaputki kalatwi kalyuyulna dai.
25—Yang talayang muih ahal arungka tingnina uluhna tuluki, kuh pasyakat lapapakwi di as bik dilaihwas ki, ahal arungka kidika laih ensal kapatki.
26Dawak Nebokatnesar dai kidika adika yulwīnah, kuh dalhwa sakkidika yaihnit yakat kiwi sarahna:
—¡Sadrac, Mesac, dawak Abed-nego, Papang makau sakkidika dini yamyang balna alahwa akat aiwanauh!
Bāspak kuh dalhwa paskaupak kalalahna, 27dawak Babilon sauni kau tunan muihni balna kaluduhna bang dai kidika bitik yaihnit yakat uina, dawak kidika ahalni balna muihnina yakat apis bik buswas dai, basnina bik dawak asninana balna bik kuh wayau pur bik awas dai.
28Kidika minitni yakat Nebokatnesar parasni sarahwi yulna: “¡Ayangni nuhni yamna ki Sadrac, Mesac dawak Abed-nego balna Papangnina yakat, kat witing innisal balna sihwak aiwi dilaihwi yakna, witing dini yamyang kasak balna kidika, king yulna yakat yayamwas dai, kau yamni kukulna dauna atnin, witingna Papangnina awas yakat minitna yulnin karak dawakat! 29Kaput bahang yang lā ātayang angdika muihni adika balna Papangnina yakat dutni yulna karang kat, sarhna karangki muihnina kidika dawak ūnina kidika bik bahwi dis yamna karang, angdik, angdik pani kaupak karang bik, ais tūni yulwa karang bik, kat Papang ūk diski kaput laihwi yakna atnin.”
30Kidika usnit kat, wawahma bās kidika Babilon sauni yakat wark tanit yamni kidika diana dai.
Currently Selected:
Daniel 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
