Daniel 2
2
King Nebokatnesar amana talna
1Witing king kana kurih bu laihwakat, Nebokatnesar amana manas talna dai, bahang kidika yulni kulnin yamni duwas dai, kaminin bik kamas dai. 2Kaput laih, witing sins duyang#2.2 Hibru kau laih: Caldeos balna, sahyakna dibin 4 dawak 10 yakat sihm kaput ki: tanka kidika pani kaupak muihni balna awaski. Mesopotamia kaupak awas balna kidika laih sins duyang balna kukulwa dai, yuldarangkat yala tanka lan kakalwa muihni balna, caldeos muihni balna laih ayangnina kidika nuhni dikukulwa dai yala balna kidika tanka walwi lankakalwa dai bahang. balna, sukyah balna, dawak uk uk balna bitik yulwi duwi kiuna, witing amana talna balna kidika tanka kalyulna atnin. Witingna king muhni yakat uiwi yaklalauna, 3dawakat diyulna:
—Yang amana as talnayang bahang uba kulnik yamni awaski bahang amanglakih yāwi, amana kidika ais dai pa.
4Sins nuhni duyang muihni balna kidika king yakat kalyuyulna:#2.4 Hibru kau laih minit lakwi yulwi: Arameo tūnikau. Bahang adika kaupak 7:28 kat kidika laih Arameo tūnikau ulna ki.
—¡King ban kaput sangka ki! Man lawa dima yamyang balna yakat diyultah bahang kaput laih tanka kidika mayuyulna karang.
5—Bahang yang aput kultayang —king yaklauwi yulna—: Manna amput amana talnayang kidika dawak ais tanka duwa balna kidika bik yayultas awanamakat mana īkiki ūmana balna bitik laih dismukki. 6Kaunah manna yang amana ais talnayang kidika dawak ais tanka duwa kidika bik yayultanama kat, yang kaupak di dutanama, dawak bik manna kidika nuhni kaltanama. Kaput bahang manna yāyultanauh ais aminnayang, dawak bik ais tanka duwih.
7Sins nuhni duyang muihni balna dai kidika watwi kalyuyulna:
—King maiyultah, bahang yangna lawik manyakat tanka kidika mayultanaki.
8King yaklauwi yulna:
—Yang yamni amanglatayang, manna taim wantmana, yang ais kulnin dutayang kidika amanglanamana bahang. 9Kaput bahang, yang ais amana talnayang kidika yayultas awanama kat, manna bitik simh lani kidika aslah manabukna karang, kat manna kalpakta yulbauta tala kulnamna aslah alahwanamna yang akat alas yayulna atnamna, dawak tahatamana talna atnin satuk wirlawak adika tranibil. Yayultanauh, amana talnayang kidika, bahang kaput laih amanglaki, manna sipmana kidika tanka bik lāih yakta yāyulnamna.
10King yakat kalyuyulna:
—Sau akat muih as bik diski, king man amanglakih mawa kidika. Dawak, ūk yakat laih king as bik parasni nuhni duwa karang bik, sukyah as kau kaput kalyulwas dai. 11King man yultaman kidika laih dadasni palni ki, muih as bik sip yulwas ki, dawan balna manah laih sipki, ¡kaunah witingna kuduh muih pasyakat yalalahwas ki!
12King, kidika dakawi kulnin daukalna, bahang paknadai sukyah balna kidika bitik imuknin, Babilon kau bang dai kidika balna. 13Kidika lani muih bitik yakat isningna pakna kat, mahka Daniel yakat bik wawalna dai, dawak wanaihni#Dn 1:20. balna yakat bik imukna atnin.
Daniel yaklauwi lāih yakwi yulna king amana talna kidika
14Kaput laih Daniel witing kalyulna dai Arioc yakat, sins lani kau, kalbauyang balna taninatuna nuhni yakat, witing mahka sins duyang muih balna yakat inin yamwak. 15Kalyulwi dakana:
—¿Ais yamwi king kidika lā as kaput ānayah?
Arioc yaklauwi tanka kidika kalyulna dai. 16Kaput laih Daniel witing king yakat kiwi kaltalna, dawak kalyulna apis tani tahana atnin, bahang kaput laih adika amana talna kidika kalyulwarang, dawak ais tannika duwa kidika bik yakwi kalyulna atnin. 17Usnitkat ūni yakat kiwi, witing aslah bangkidika balna yakat bitik diyulna, Ananías, Misael dawak Azarías balna yakat. 18kaput laih Papang kisang kau sakyakat ilp yulna atnin, Babilon kau sins duyang balna dawak witingna bitik daunin awas yulni. 19Kidika pukta yakat amanakau niningkana dai, dawak Daniel yaklauwi Papang yakat ayangni nuhni yamna dai, 20adika yulni balna karak:
“Yamni palni ban kaput karang Papang ayangni kidika,
witing dini balna ki, sins lani nuhni dawak parasni nuhni kidika bik.#Job 12:13; Pro 2:6.
21Witing yaklauwi ma balna kidika satuk yamwi,
king balna kidika yakwi dawak watwi āwi,
sins lani tuhni balna kidika sins duyang balna yakat diawi,
sins duyang balna yakat diawi,
sinsni sirihni kidika bik.
22Witing yaklauwi di malni balna kidika lāih yakwi,
puksani kau sakkidika bik amanglawi,
kat yaringni kidika witing karak bahang.#Job 12:22; Sal 139:11-12.
23Man, muihkibararak balna Papangnina,
man yakat tingkih mayultayang dawak ayangma bik nuhni yamtayang,
kat man lawa sins nuhni yānaman dawak parasni bik yayamna man bahang;
dawak waradika nikingkana man, di mayulnayangna kidika:
king kulnin yakat dutni wauhwa kidika manikingkana man.”
24Adika usnit kat, Daniel witing Arioc yakat kiuna, Babilon kau sins duyang balna bitik imuknin muihni dai yakat, dawak aput kalyulna:
—Sins duyang muihni balna kidika īwinih. King muhni yakat yaduyawah, bahang yang lawik amana talna kidika lāih yaktik kalyulki.
25Usnit kat Arioc yaklauwi Daniel kidika king muhni yakat duwi kiuna, dawak king yakat kalyulna:
—Ju balna panina kaupak yakwi duahaina pasyakat muih al as yaknayang, man amana talnaman kidika lāih yakwi mayulnin.
26King yaklauwi Daniel yakat kalyulwi dakana, bahang witing yakat Beltsasar kalatna dai:
—¿Man sipmanh, amana talnayang kidika yayulnam dawak ais tannika duwa kidika bik?
27Daniel yaklauwi nangnitlana:
—Sins duyang muihni as bik diski, sukyah, yala balna tannika lankalna muihni kidika balna bik sip-waski man amanglanin kultaman kidika yakwi mayulna atnin. 28Kaunah kisang yakat Papang as sakki di amangladas dini balna kidika yakwi manikingkawi, bahang witing yaklauwi lāih kingman yakat namangkana, matakitkau ma balna kaiwarang kau di balna kalahwarang kidika. Yang lawik amana talnaman kidika mayulna awaki, dawak ais tanka duwa kidika bik mayulki; 29king, man pāma yakat alangwana tusman kat; man kulnaman dai, tanit kau ma balna kaiwarang yakat ais kalahwarang kidika, bahang di malni kaupak lāih yakwa alni kidika yaklauwi laih namangkana. 30Dawak yang akat bik di taldas dini kidika nikingkana, kaunah kidika laih yang kauh sins nuhni dutayang tanka laih awaski ahal ūk balna karak, kaunah kidika laih yang lawik king man yakat lāih yaktik namangkana atnik amana talnaman tanka balna kidika, dawak kaput laih king man amanglama kulnin lani balna man sinsma yakat kana kidika.
31“Amana talnaman yakat, man talnaman dai muihwaya nuhni yaringni as, yamadangni dai. 32Diniwaya tunan kidika laih gol manah dai; pasni dawak tingni balna kidika laih lalahkau dai; bani-u dawak barahnimak balna kidika laih bras dai; 33kalniba kidika laih ayan kau dai, kalni pīs apis kidika bik ayankau dai, dawak pīs ūk kidika laih saukarak dai. 34King man talasakman kat, asang as kaupak kipala as kalahwi kaina, kaunah kidika kinipala muih as bik ruhmwas dai, kaunah kaiwi muih wayani sakkidika kalni yakat barhwi bahna dai. 35Kidika minitni yakat, ayan, sau, bras, lalah dawak gol kidika yahamni manah kalna dai, simh kurih manikat plawar minik unitak yayakwa kapat, bahang unitak balna kidika wing kaiwi duwi kiwak di dis dawakapat dana dai. Kaunah kipala kaiwi muih wayani kalni yakat barhna dai kidika laih mahni kalwi asang as kalna dai, dawak kidika asangni laih sau pani adika bitik bungdana dai.
36“Kidika ki amana talnaman dai kidika. Waralaih, king man yakat mayulki ais tannika duwa kidika. 37Man laih king balna pasyakat man kauh tanit nuhniman, kat Papang kisang kau sakkidika yaklauwi mana bahang, parasni dawak ayangni nuhni kidika bik 38muih, asangpas dini balna, dawak di lawani balna sau kau bangkidika balna bitik minitna yakat, kidika balna bitik laih man parasma dinit yakat āna ki, bahang kidika tanka laih tunan gol duwa dai kidika. 39Kidika usnit kat, man king awaman lani kidika kaupak, king kawa lani ūk kaiwarang, kaunah kidika laih kuihwas karang man karak dawakat, kidika kaupak bās yakat kaiwarang king kawa lani bras kidika, bahang kidika yaklauwi sau bitik yakat taihna karang. 40Kidika usnit kat king kawa lani arungka kidika kaiwarang, parasni karang simh ayan kapat, ayan kidika yaklauwi bitik bahwi disyamwa kapat, bahang kidika kingni yaklauwi kaput bahwi disyamna karang, king uk balna bitik yakat.
41“King man talnaman dai, kalni balna kidika sau bik duwa dai ayan karak, kidika tanka laih adika kingni laih sahwi yakna karang ki, kaunah ban parasni apis duwa karang ki ayan kapat. 42Kalni bikis balna kidika ayan dawak sau bik duwa dai, kidika tanka laih adika kingni lani laih parasni karangki dawak bik parasni dis bik karang ki. 43King, man talnaman dai kidika, ayan dawak sau karak bahana kat, tanka laih sau kingni balna kidika bitik aslah kalalahna karang; kaunah witingna sip muihni aslah kalalahwas karang, simh ayan dawak sau karak aslah bahawas kapat. 44Adika witingna king kakawarang mani balna yakat, Papang kisang kau sakkidika yaklauwi king as āwarang, kaunah kidika kingni laih nesan as bik sip daukalwas karang dawak bik taihwi duwas karang, nawatkauh laih witing yaklauwi as balna yakat disyamwarang, dawak witing laih ban kaput karang sarani dis. 45Kidika tanka kuduh king man talnaman dai kidika kipala as asang kaupak kalahwi kaiwak, kaunah kidika muih as bik rumhwas dai kidika; kipala kidika yaklauwi ayan yakat yahamni manah yamwa dai kidika, bras yakat bik, sau, lalah dawak gol yakat bik. Papang nuhni kidika yaklauwi, king man yakat di namangkana, ma balna kaiwarang kau di balna kalahwarang kidika. Amana talnaman kidika laih di ramh palni ki, dawak tanka wirlatik yulnayang kidik bik rahm ki.
46Kaput dawak, king Nebokatnesar dai kidika yaklauwi Daniel kalni dinit yakat limbabahwi tunan kidika saukat lakwi yulna sakripais dawak walapni bik busna atnin. 47Usnit kat Daniel yakat kalyulna:
—Rahm palni manna Papangmana kidika laih tanit nuhni ki dawan ūk balna karak dawakat; kidika laih king balna Papangnina, di taldas balna lāih yakwa kidika, bahang man laih sipman dai adika dini lāih yakta yulna atnam.
48Usnit kat king yaklauwi Daniel kidika wark tanit yamni as kalana dai, dawak di minit dis balna bik manas kalana dai; kidika minit yakat kabamint āna dai Babilon sauni yakat, dawak sins nuhni duyang balna tanina tuna bik āna dai, kidika sauni yakat.
49Daniel yaklauwi yulwakat, king yaklauwi Sadrac, Mesac dawak Abed-nego balna kidika tunan nunuhni āna dai Babilon sauni yakat. Daniel laih king yaihnit yakat watna dai.
Currently Selected:
Daniel 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
