Colosas 1
1
Kalparaswi
1Yang, Pal, Jisaskrais aposnitel Papang isning lani kat āwanayangna kidika, wirah Timoti karak, 2parastanauh Colosas kau tawan holi pakkidika yakat, wirah balna Krais kau barangni balna kidika. Mapapangki#1.2 Tingkau ulna balna kidika minitkau lakwi: dawak Dawan Jisaskrais. yaklauwi tingnikih kidika utuhna karang, dawak bik kulnin aslah kidika manna mamatna yakat karang.
Pal minityulna kulyang balna yulnina
3Manna yulmana mikitnayultayangna kidika Papang yakat tingkih kalatayangna, Madakiwan Jisaskrais Papangni kidika yakat. 4Manna Krais Jisas kau kasak kultamana kidika dakanayangna dawak dalani lani bik dutamana kidika Papang tawanni muihni balna bitik yakat, 5kidika tahanin yaklauwi kulnamna dulauna kidika, makau kisang yakat pamana ridi yamna yulni. Adika laih uman yuyulwak dakanaman yul rahm duwa kidika yul wisamni yamni yakat 6bahang kidika laih manna kat kaiwi kana kidika. Adika yulni laih barakwi, dawak minik bik yakwi sau bitik yakat, manna pasmangna kau kalahna kapat, Papang minikun talnin duwa kidika dakanamana kaupak, dawak bik rahmni kidika amanglanamana kaupak bik. 7Adika laih Epafras namangnakana,#Col 4:12; Flm 23. witing laih yangna karak wark kalahna, dawak manna bik Krais dini yamyang yamni as kalkultamana kidika. 8Witing duaina manna yulmana kidika, dawak Spirit yaklauwi dalani lani manawa kidika bik.
9Adika bahang yangna, dakanayangna mani kaupak, manna yulmana mikitna yultayangna kidika datasyangna, Papang yakat kalyultayangna namangnakana atnin witing kulnin lani kidika, dawak sins lani tuhni balna kidika mananin, dawak amanglanin spiritni kidika bik. 10Kaput awanama manna, Dawan muihni balna amput kidika, witing dukih kalawa kidika yamtanama, dawak wark yamni balna minik kidika yaktanama, dawak Papang yakat bik yamni amangnilatanama. 11Witing yakat kalyuldi parasni nuhni yaksihn kidika kau, parasni manayamnin; kaput laih manna sip awanama wauhnin parasni awanama kulnamna laihwattanama, dawak alasna awanama 12Papang yakat tingkih kalatanama, witing sip manayamna kidika yaringni yakat dunamna yulni, witing yaklau dini pahni diawarang kidika witing tawanni muihni balna yakat. 13Papang yaklauwi puksani parasni kaupak mailaihwi yakna#Ef 6:12. dawak witing Walanibis dalani kingni lani yakat maiduwi kiuna, 14witing munah laihwi yaknin kidika dudi, dawak madutki balna bik dawak disna.#Ef 1:7.
Papang karak kulnin aslah laniKrais dauna munah
15Krais kuduh Papang wayani lāih kidika, dawak bik sip taldas kidika mamikpa kau; kidika laih Walanibis tatuna al kidika, di balna yamwas tanit kaupak ban kidika. 16Witing munah di balna makau kisang dawak sau kau bangkidika bitik yamna, talda dini balna dawak taldas dini balna bik, kaput bik spirit duyang muihni balna, la muihni balna dawak parasni muihni balna kidika kauna.#Ef 6:12. Kidika balna bitik witing munah yamna dawak witing dini yamna. 17Krais laih di balna bitik tanit kaupak ban ki, witing munah di balna kidika pāni kat kat ki.#Jn 1:1-3,18; Hib 1:2-3. 18Kidika minityakat, Krais laih muihni nuhni kidika tunan, kidika kuduh suts.#Ef 1:22-23; 4:15. Witing laih tatuna kaupak ki, dawak witing tatuna dauna kaupak yaklauna, kaput laih witing kidika di bitik yakat tatuna ki.#Ap.w 26:23; Rib 1:5. 19Kat Krais yakat kalanin kulna Papang parasni bitik kidika, 20dawak witing munah Papang yaklauwi di yamna balna bitik kidika watwi yamni kalahna, witing munah pāni kat kat āna, sau kau dawak makau kisang kau kidika balna bik, kulnin aslah yamna Krais āni munah, pan prihni yakat utuhna kidika.#Ef 2:16.
21Manna kidika muhnilau laih pa ūk muihnimana dai, dawak Papang waihnila mana dai kulnamna yakat, di dutni balna yamtamana dai kidika yulni, 22kauna waralaih Krais yaklauwi watwi mawanaihki karak yamni maiyakna, witing sau akat kaiwi dauna kidika munah. Witing yamna, manna kidika manadunin witing muhni yakat, holi, sani laihna dis dawak pāt dis. 23Kauna kidika laih, manna barangni atnamna ki kasak kultamana yakat, manna tahanin as dutamana kidika kaupak data alahwanamna awaski, yulni wisam yamni dakanamana kaupak. Adika yulni kuduh sau bitik yakat sumalwi awaihna kidika, dawak, yang Pal, ilp diyamtik sumaltayang.
Pal laih suts dini yamnin kalyakna
24Waralaih alasnayang manna yulmana wauhtayang kidika, kat aput laih uitik papattayang, yang muihki yakat, Krais wauhna balna kidika baisa suts yakat kiwi kawas kidika, bahang kidika kuduh witing muihni nuhni. 25Papang yaklauwi yayamna yang adika suts dini yamyang atnik, witing yang akat yamnin yana kidika, manna yamni atnamna yulni,#Ef 3:2. witing yulni kidika pa bitik yakat sumalnin, 26yuldarangkat, warkni malnikau kidika kurih andat balna bayakwi kaina dawak sulani balna bik, bahang Papang laih malnikau duwasakdai, kaunah waradika laih tawan holi yakat niningkana. 27Witingna yakat Papang yaklauwi niningnakanin kulna, ritsni yaksihni warkni balna malni kau sakkidika nisan balna bitik niningna yakat. Kidika warkni malni kau sakkidika kuduh Krais manna pasmangna yakat sakki,#1.27 Krais manna pasmangna yakat sakki: satuk wirlanin sipki: Krais kidika manna pasmangna yakat sumalna ki. kidika kuduh tahanin yaksihni dunamna kidika.
28Mayang Krais yulni kidika sumaldi, yul manayuldi, manasumaldi sins lani tuhni kidika karak, kaput laih Krais yakat duwi kiunin barangni yamni palni. 29Adika wark yulni parasni war alahwayang, Krais paraski yawa kidika karak.
Currently Selected:
Colosas 1: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
