Amós 7
7
Sisin balna kalalahwarang kidika niningna kana
1Adika Papang yaklauwi nikingkana: Di dahna balna kidika mahka ukuswi kalahwa yakat, kidika laih witni kau dadahna balna dai kidika, bahang kidika laih king dini kidika bahwi dulauwak usnit yakat dadahwi, bahang yang talnayang dai Papang yaklauwi sisin#Jl 1:4; 2:2-11. balna kidika yamwak talnayang. 2Sisin balna kidika dibasta balna bitik kasmumukna witni kau bayakna duldul dai yakat kakaswa yakat, yang yulnayang:
—¡Papang dutkina datang diswang! ¿Man tawanma Jacob kidika amput sip karang yah, witing dibin kidika?
3Papang yamnin kulna dai kidika kaupak dapamwi, aput yulna:
—¡Adika kaput laih kalahwas karang ki!
Kuhpau kalahwarang kidika niningkana
4Adika Papang nikingkana: Talnayang wah as sihwakat, kuhpau, bahang kuma tuhni nuhni kidika bitik laih buhlakna dai, dawak asangpas balna bik laih dahn kalwasakdai.#Jl 1:19-20. 5Yang yulnayang:
—¡Papang, laihwatta plisma! ¿Man tawanma Jacob kidika amput sip karangyah, witing dibin kidika?
6Papang yamnin kulna dai kidika kaupak dapamwi, aput yulna:
—¡Adika bik kaput kalahwas karang ki!
Plum niningkana kidika
7Papang adika dini bik nikingkana: Witing daklana as yaihnit yakat yaklauna sakdai, dawak tingni yakat plum as duwa sakdai, simint dau ū yamwi yusyayamwa dini kapatnah. 8Dawak yayulwi dakana:
—¿Amós, man ais talamanh?
Dawakat nangnitlanayang:
—Plum as.
—Adika plumni kau yang tawanki Israel kidika kultik talki ki, witing ampus barangni kidika. Wat as bik dutni dating diswas karang ki baisa minit yakat. 9Isaac pāni maisihni dis balna kidika bitik laih daukalmukki, dawak Israel minit yulwa uni balna kidika bitik laih daukalna karang. ¡Jeroboam sulani balna niningna yakat isparah dulauki!
Amasías niningyakat yaklauwi Amós
10Betel sumalniyang nuhni Amasías yaklauwi sihna, Israel kingni Jeroboam yakat kalyulna atnin: “Amós dai kidika Israel balna pasyakat likki, bahang man namangkauh yaklaunin yamwa likki. Adika sauni muihni balna adika baisa sip wawauhwas ki, yul yulwalik kidika. 11Bahang yakat yulwa likki: ‘Jeroboam kidika isparah kau dauwarang ki, dawak Israel muihni balna kidika bitik laih sau ūk yakat laihwi duwi uina karang ki.’ ”
12Usnit kat, Amasías yaklauwi Amós yakat pakna:
—¡Akaupak naikau yawah, prapit! Man sumaltaman kidika kaupak di yakta dunam kat Judá sauni yakat yawah: 13Di kalahwarang dini balna kidika baisa yulwinih Betel akat, kat king pāni maisihni dis as bahang, dawak bik king kawa sauni akat makat yulnin uni tanit nuhni kulna kidika sakbahang.
14Kauna Amós yaklauwi nangnitlana:
—Yang prapit awasyang, dawak bik prapit kalnin bik kultas yang kulnik yakat. Yang dukih yawa balna kidika yaktik dutayang sīp maintalna, dawak ani damni asangpas kau bahang kidika minik waltik#7.14 Dawak anana: Y.y. dawak tusna Pan as ayangni sicómoro, kidika laih ani damni asangpas kau kapat ki, bahang minik kidika minit yakat tus tus dadawak sirihni lalahwak wauhwi bakakanwadai, kaunah minit sipar. bik, 15kauna Papang yaklauwi sīp maintalayang dai kidika kaupak yadakyakna, dawi yayulna: ‘Yawa yang ayangki kau yakta yultah, tawanki Israel yakat.’ 16Kaput bahang Papang yulni kidika dakah. Adika man yultaman: ‘Papang ayangni kau yakwi di as bik yulwinih, Israel niningyakat, dawak bik Isaac sulani balna niningna yakat bik di as bik yulwinih.’ 17Kauna adika Papang yulwi: ‘Man yalma kidika al suhlsuhl kalahwarang, tawan nuhni pasyakat, dawak walamabis ahal, dawak yayal balna kidika bik isparah kau dadauna karang; dawak sauma kidika sahyakwi duduna karang, suerte kau ruhmwi talwi; man laih Papang kulwas balna saunina yakat daunaman karang, dawak Israel balna kidika sau ūk yakat duwi uina karang, man sauma kaupak naikau.’
Currently Selected:
Amós 7: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
