Amós 6
6
Israel daukalwi disna kidika
1¡Alakaih, kidika muihni balna Sayan yakat wark yudutni manah yayamwa kidika!
¡Alakaih, kidika muihni balna Samaria yakat kulninna kalalawa kidika,
dawak sau balna yakat tatuna nunuhni balna kidika
Israel yakat uiwa kidika bik!
2Calne yakat yawa talnauh,
kidika munah bayakyawanauh Hamat nuhni yakat,
dawak filisteo balna panina Gat yakat lakwa yawanauh.
¿Manna kauh tanit yamni manakatpa, kidika sauni karak dawakat?
¿Manna saumana kidika kauh tanit yamni yah,
witingna saunina karak dawakat?
3Manna kulkih manawaski ma dutni kaiwarang yakat,
kauna dutni nuhni kidika laih yaihmatna yakat duaitamana.
4Pa yaksasihn yakat alangwamana,
dawak alasna nuhni yamta sīp binina kidika ita kastamana,
dawak turuh ahalmuk salalani kidika balna bik;
5puhnin dini sip-awas mana bik putamana,
Devid yamwa dai kaput,#1 Cr 23:5; Neh 12:36. unbaunin dini satni manas kalyakwi yayamwi:
6Sutak nunuhni kau wain wasni kidika didiwi,
dawak walapni kalkakahwa kidika bik tanit yamni kidika kalkakahwi,
¡tawan daukalna sak-adika laih kukulwas ki!
7Manna kidika tatuna yawanama ki kauhmak wanilang yakat,
dawak di kasta alasna dutamana kidika bitik laih dahn kalwarang.
8Papang witing alas ayangni kau yakwi yulna, witing parasni nuhni duwa kidika aput yulwi:
“Jacob tawanni witing manah kapat kaldakawa kidika dutni kaltalayang;
uni nunuhni yamna balna kidika talkih yawas ki;
adika tawanni nuhni laih waihla tingni yakat ana awaki,
paskau di balna bangkidika bitik kau.”
9Kaput laih, ū as pasyakat muih ahal salap wawatwarang kat, salap kidika bitik dadauna karang. 10Yamadangni kidika nuhni palni karang, muih as witing wanaihni dauna kat dulauwi ūpas kaupak yakkuhtik,#6.10 Yamadangni kidika nuhni...kaupak yakkuhtik: kaput kidika yamni wirlana kapatki; hibru kau laih amangladas ki. muih ūk ū paskau likyakat kalyulwarang: “¿Muih ūk as man karak likyah?” As kidika yaklauwi yulwarang, “Dikah.” Dawak tatuna dai kidika yulwarang: “¡Ap awah, pini kat Papang ayangni yulma!” 11Kat papang yaklauwi wah kalawak kiwarang ki ū nunuhni balna minitna yakat, dawak ū binina balna minitna yakat bik, dawak bitik laih daukalmukna karang ki.
12¿Aras balna kidika sipyah kipala nunuhni balna kidika minit munah kilwi yaklanin?
¿Sipkat pah, kuma pasyakat sau tuknin kapat tukna atnin?
¡Manna lawa la kat yamnin kidika puisin yakat wirlanamana,
kaput bik la kat minik yakna kidika tapalhni yakat wirlana mana!
13Manna dauh palni alasna duta yultamana:
“Mayang alas maparaski munah parasni nuhni kidika dunamayang.”
14Israel balna manna yamni talnauh;
Papang parasni nuhni duwa kidika yulwi:
“Yang dulauki muih buas manna namangna yakat,
manalaihwi manawiwirna karang yamni palni,
wadah niningkauh sutni kaupak,
tingpal niningkauh sutni nakas kat.”
Currently Selected:
Amós 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
