Amós 4
4
1Dakanauh adika yulni yayal nunuhni balna,#4.1 Yayal nunuhni balna: barangni yulnin laih Basán tuniruh yayal balna. Basán pāni kidika laih tingpal niningkauh ma kawa saitni yakat pakdai, Jordán wasni kaupak, kidika tuniruh balna laih tanit salalani yayamni dai.
Samaria dinipulu balna, dawak tunan muihni balna
muih miniknakunni yakat taihtamana kidika,
dawak di dukih diawa balna yakat dutni diyamtamana kidika,
kaput bik almana balna yakat paktamana
wain duahaiwak dinamna.
2Papang witing dutni dis ayangni yakat pramis kalahna:
“Mani balna kidika kaiwi,
manna pan kau manassitwi manaduwi uina karang,
dawak walamanabis balna laih kuyuhl kau laihwi duwi uiwarang.
3Sulihni munah kalparta alahwanama,
dawak Hermón#4.3 Hermón: kaput ulna kidika yamni kapatki. Hibru kau laih Harmón. asangnipas yakat manaduwi uina karang.”
Papang yaklauwi yulwi.
Dutni sumalna as
4“Betel dawak Gilgal yakat bik yawanauh;
¡dutni yamtanauh, dawak niningkauh baisa lawanauh!#Os 4:15; Am 5:5.
Sakripais busnin kidika mapiris niningyakat duyawanauh,
dawak salap kalanin dini kidika ma bās bani duyawanauh.
5Plawar pupuhnin dini āwas buswa kidika kau,
tingkih kalanin dini as bustanauh,
dawak pa bitik yakat minit dis kalanin dini kidika diyultanauh,
kat kidika kuduh manna dukih manawa bahang.”
Papang kaput yulwi.
Wah wiswak bik Israel kidika sip di lankalwaski
6“Yang yamnayang manna yuh wauhna atnamna,
kidika tawanmana nunuhni bitik yakat;
yang yamnayang tawanmana muihni balna bitik yakat
di kasnin dini dis atnin,
¡kauna manna yang akat nawatta aiwas danamana!”
Papang yaklauwi yulwi.
7“Kaput bik yamnayang was lauwas atnin,
di minik balna yaktas mana tanitkauh waiku bās yakat.
Tawan nunuhni as as minit yakat yamting was launa,
dawakat ūk balna yakat laih buhlana was dis kidika yulni;
8tawan nuhni as kaupak tawan nuhni as kat muih balna kidika was walwi uina,
dawak was mahni yayakwas dai, witingna dikih diawas praisni,
¡kauna manna yang akat nawatta aiwas danamana!”
Papang kaput yulwi.
9“Manna yakat wing daihni dawak dimuihni dutni karak manawisnayang,
dawak yamnayang di dahnamana kidika,
dawak wainmana yamak balna bik kusulana atnin,
sisin balna yaklauwi ani damni panan,
dawak olib mana balna bik kakasna,
¡kaunah manna yang akat nawatta aiwas danamana!”#Dt 28:38; Jl 1:4-6; 2:4-9.
Papang kaput yulwi.
10“Manasihnayang dimuih satni as,
Egipto kau sihnayang dai kapat;#Ex 9:1-6; 12:29; Dt 28:27,60.
yamnayang wawahma balna kidika wār kalbauwi pāni yakat dauna atnin,
dawak, danayang aninaras balna kidika di dakyakna atnin;
yamtingkat muih dadauna wayani bik uhumna ūmana labanni yakat,
¡kauna manna yang akat nawatta aiwas danamana!”
Papang yaklauwi yulwi.
11“Manna yakat di dutni kau manabahtik dis danayang,
sihm Sodoma dawak Gomorra#Gn 19:24. minitkau daukalnayang dai kapat;
sihm kuh tuturni, kuh dahlwa pāni kaupak yakna kapat dai.
¡Kauna manna yang akat nawatta aiwas danamana!”
Papang yaklauwi yulwi.
12“Kidika bahang Israel manyakat bik kaput mayamki ki,
kat mayamki bahang,
¡Papangma karak kalpaknin ridi alahwah!”
13Papang asang balna yamna dawak wing bik yamna,
witing yamnin duwa balna kidika, muih al yakat bik niningkawi,
madah kidika puksani yakat wirlawi,
dawak sau maluihni balna minit yakat kiri awaihwa kidika,
Papang parasni nuhni duwa kidika laih witing ayangni.
Currently Selected:
Amós 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
