Apastil Balna Warknina 8
8
1Saulo laih kidika yakat sakdai, Esteban dauna kidika yamni talna.
Saulo suts niningkauh yaklauna
Kidika mani kaupak, mahka suts niningyakat yaklauna, Jerusalén yakat. Bitik laih kalruruhna, Judea yakat, Samaria yakat uina dai, kaunah apostel balna laih ban bangdai. 2Muih ahal kulninna yamni duduwa balna kidika, Esteban nununa, dawak bik witing yulni uba kakaidana dai. 3dawak Saulo laih suts yakat laihnin uina, ūnina kat kawi laihwi muryakna ahal, yayal bik, silak kau sihna atnin.#Ap.w 22:4-5; 26:9-11.
Samaria yakat yul wisamni kidikaduwi uina
4Jerusalén kaupak kalahwi uina balna kidika, angkat uiwi bayayakna balna kidika bitik yakat sumamalna yul wisamni kidika. 5Pilip, witingna paskaupak as dai kidika, Samaria tawanni nuhni palni yakat kiuna, dawak Krais yulni sumalna dai. 6Muih balna kidika kalududuhwādai, dawak Pilip yulwa yakat yamni palni kaldakakawādai, kat witing sain balna kidika yamwak tatalwa bahang. 7Muih manas spirit maisihni duduwa balna kidika kaupak yamni diyamna dai, dawak spirit kidika witingna kaupak kalahwi parasni bik sararahna; kaput bik laih, sininwah buhlana balna kidika dawak sakahwa balna kidika bik yamni diyamna dai. 8Kidika yulni laih, muih balna alasna nuhni duduna dai kidika tawanni yakat.
9Kidika pāni yakat al as sakdai ayangni laih Saiman, muhnilau kau laih witing kidika sukyah dai, bahang Samaria muihni balna yakat alas diyulna dai, bahang witing kidika muih nuhni kapat kalkukulna dai. 10Bitik laih, dibin kaupak nuhni kat, yamni palni kaldakawi dawi yuyulna: “Adika kuduh witing yakat kalyuyulwadai kidika ‘Papang parasni nuhni’.”
11Dawak witing yulni dakawi yayamna, kat sukyah lani kau ma mahni laih alas diyulna dai bahang. 12Kaunah yul yamni Pilip sumalwa yakat kukulna kat, Papang king kāwa lani dawak Jisaskrais bik, ahal dawak yayal bik mahni was utuh'yakna. 13Dawak Saiman bik kasak kulna, dawak was kalutuh'yakna dai, dawak mahka laih Pilip karak kalpakna dai, taldas dini dawak sain nunuhni balna bik manas kalahwa kidika yamni talwinah.
14Apostel balna Jerusalén kau bangkidika dakakana, Samaria muihni balna bik Papang yulni kidika duduna atwak, kidika yakat sisihna dai Pita dawak Jan karak. 15Witingna uiwi, minitnayuyulna Samaria muihni kulyang kalalahna balna yulnina, kaput laih witingna kidika Spirit Holi kidika duna atnin. 16Kat Spirit Holi kidika baisa witingna minitna yakat kaiwasdai bahang; kat Jisas ayangni kau manah was utuh'yakna dai bahang. 17Kaput laih Pita dawak Jan karak witingna tingnina kidika minitna yakat yuyuna dai, bahang kaput laih Spirit Holi kidika duduna.
18Saiman, witing talwak Spirit Holi kidika kaina, apostel balna tingnina yuyuwak muih balna minitna yakat, dawak lalah dianin yulna, 19aput diyulna:
—Kidika parasni kidika yang akat bik yatanauh, bahang kaput laih yang bik wais minit yakat tingki yukikat Spirit Holi duwarang.
20Kaput laih Pita yaklauwi kalyulna:
—¡Lalahma karak dutni yakat mawirlawang, kat Papang prisantni kidika lalah kau bakannin kulnaman bahang! 21Man rahmma disman, duna atnam, kat ismang kidika barangni awas bahang Papang niningyakat. 22Man dutma kidika datah, dawak Papang kalni dinit yakat bukta yultah, sipkat dutma dawak diswarang, man kaput kulnaman kidika yulni. 23Kat matalayang tapahlni kidika mabahngna, dawak dutni kidika malaihna silak yakat maduwi.
24Saiman yaklauwi nangnitlana:
—Manna yang yulki Dawan kau mamatna yultanauh, manna yultanda kidika yang akat yakalahnin awas yulni.
25Witnis yulwi Dawan yulni sumalwi dawi, apostel balna kidika Samaria kau tawan binina manas yakat uiwi sumamalna yul yamni kidika, kidika usnit kat nawatwi Jerusalén yakat uina.
Pilip dawak etíope al as karak
26Kidika usnit kat, Dawan innisal as yaklauwi Pilip yakat kalyulna: “Lawa wadah niningyakat yawah, Jerusalén kaupak Gaza yakat kiwa tani yakat.” Kidika tani laih kauhmak wanilang munah bayakwi. 27Pilip yaklauwi kiuna; ta yakat Etiopía al kidika karak kalpakna. Witing laih muih nuhni as dai, Etiopía kingni yal lalahni kidika laihyang dai, bahang witing laih Jerusalén yakat Papang kau minityulna kiuna dai. 28Nawatwi sauni kau kiwalikdai, kārni yakat yalahwi, prapit Isaías wauhnitaya kidika yulwi talwinah kiuna.
29Spirit yaklauwi Pilip yakat kalyulna: “Kidika kārni yaihnit yakat yawah.” 30Pilip, witing yaihnit yakat kiwi dakana, etíope alni kidika Isaías wauhnitaya kaupak yulwitalwak; dawak kalyulwi dakana:
—¿Yulta talaman kidika amanglatamahn?
31Etíope alni kidika yaklauwi nangnitlana:
—¿Amput amanglakiyah, muih as bik tanka lāih yayulwaskat?
Dawak Pilip yakat kalyulna, witing yaihnit yakat kilwi yalahna atnin. 32Ulna yakat yulwi talna kidika laih adika dai:
“Sīp kapat ihiwa pāni yakat duwi uina;
sīp bin as ap kapat
butuni kakahrwa muihni balna muhnitna yakat,
sihm kaput bik laih witing tingpas wakahwasdai.
33Dauh kalkukulna, dawak lani yamni bik yayamwasdai;
¿wais sipkarang witing sulani balna yulnina kidika yulnin?
Kat witing sangnika kidika sau akaupak dakwi yayakna.”#Is 53:7-8.
34Etíope al kidika yaklauwi Pilip yakat kalyulwi dakana:
—Plisma yayultah, ¿prapit yulwa kidika wais yulniyah: witing silp yulniyah, kidika awaskat muih ūk yulni kat yulwih?
35Kaput laih Pilip witing laihna etíope al yulwi talwa wauhnitaya kidika kaupak, dawak Jisas yulni balna kidika sumalna. 36Kidika usnit kat, pa as bayayakwak was pakdai, dawak etíope al kidika yulna:
—Akat was pakki; ¿yang akat was utuh'yaknin kidika sip-awasyah?#8.36 Tingkau ulna kidika minitkau lakwi S.d. 37 yakat: Pilip kalyulna: —Rahm ismang bitik kultaman kat sipki. Al kidika nangnitlana: —Agha kultayang Jisas Krais kidika laih Papang walanibis al.
38Kaput laih kār kidika laihwatna; dawak albupak yaklalakna, dawak Pilip yaklauwi was utuh'yakna. 39Waspa kaupak kilwi kalalahwak, Dawan Spiritni yaklauwi Pilip kidika duwi kiuna, dawak etíope al kidika witing watwi talwasdana; kaunah witing tanit yakat ban alasna kiuna. 40Pilip kidika Azoto yakat sakdai, bahang tawan binina kidika munah bayakwi kiuna yul wisamni kidika sumalwinah, ban Cesarea kat kiuna.
Currently Selected:
Apastil Balna Warknina 8: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
