Apastil Balna Warknina 7
7
Esteban tanit dakna
1Sumalyang nuhni yaklauwi Esteban yakat kalyulwi dakana, rahm kaputyah man yulma yuyulwa kidika, 2dawak witing yaklauwi nangnitlana: “Wirah balna dawak papang balna, yadakanauh: Mayang Mapapangki kidika, mamuihkibarak Abraham yakat lāih kalahna Mesopotamia yakat sakdai mani balna yakat, Harán yakat kiwi yalahwas tanitkauh, 3dawak kalyulna: ‘Sauma dawak wanaihma balna bik datah, dawak yawah yang lawik sau as namangkaki kidika yakat.’#Gn 12:1. 4Kaput laih Abraham kidika Caldea kaupak kalahwi kiwi Harán yakat yalahna.#Gn 11:31. Kidika usnit kat Papangni dauna, dawak Papang yaklauwi Abraham kidika adika sauni akat duaina, waradika manna yalahtamana adika.#Gn 12:4. 5Kaunah witing palni dini kapat laih kalawasdai kidika yakat; pa as bik kalawasdai kalni ataknin. Kaunah kalanin laih pramis yamna dai, kaput laih witing dauwak usnit kat sulani balna dinina atnin#Gn 12:7; 13:15; 15:18; 17:8. (Abraham kidika baisa walanibis disdai kaunah). 6Kidika minit yakat, Papang yaklauwi kalyulna, sulani balna kidika tringsar kapat pa ūk yakat karang, dawak bik muih dinina yayamwarang, dawak bik kurih 400 praisni dutni diyayamna karang. 7Kaput kaunah, aput bik kalyulna: ‘Angdik ninisan yaklauwi pakwak dini yayamwarang kidika yakat wah kalaki, dawak kidika usnit kat kidik pāni kaupak kalalahwarang, dawak adika pāni akat yang diki yayamwarang.’#Gn 15:13-14; Ex 3:12. 8Aslah kalahna kidika, Papang yaklauwi Abraham yakat pakna, Papang sainni kidika dunin.#Gn 17:10-14. Kaput bahang witing walanibis Isaac kidika batahndawak ma tiaskaubās kat Papang sainni kalana.#Gn 21:2-4. Isaac bik sihm kaput yamna walanibis, Jacob yakat,#Gn 25:26. dawak Jacob bik sihm kaput yamna walanibis balna yakat, bahang witingna kuduh Israel balna papangnina 12 dai kidika.#Gn 29:31—35:18.
9“Jacob walanibis balna kidika kuduh, mayang mamuihkibararak balna dai kidika, bahang witingna laih José wirahnina yakat tutumna dai,#Gn 37:11. dawak wauhwi bakakanna Egipto yakat duwi uina atnin yulni.#Gn 37:28. Kaunah Papang laih José karak dai bahang,#Gn 39:2,21. 10kulnin bukna balna kidika bitik laihwi yakna dai. Sins tuhni kidika kalana, dawak kalyamwak Fero bik yamni kaltalna dai, bahang José kidika kabamint āna dai Egipto yakat king ūni yakat bik.#Gn 41:39-41.
11“Egipto sauni yakat yuh lakna dai, dawak kulnin buknin bik nuhni palni, dawak Canaán yakat bik, mamuihkibararak balna kidika witingna kasnin dini disdai.#Gn 42:1-2. 12Jacob witing dakana Egipto yakat laih kasnin dini manaski atwak, bahang kaput laih walanibis ahal balna kidika sihna, yuldarang laih, mamuihki bararak balna. Adika kuduh tatuna palni uina dai kidika. 13Dawak wat bu uiwayakat, José kidika witing lāih kalahna dai wirahni balna muhnina yakat,#Gn 45:1. kaput laih Fero amanglana, witing kidika ais nisan dai kidika José.#Gn 45:16. 14Kidika usnit kat, José yaklauwi pakna witing papangni kidika duwi kiunin, dawak wanaihni balna bitik,#Gn 45:9-10,17-18. witingna bitik kat muih 75 dai,#Gn 46:27. bahang Egipto yakat duwi uina. 15Kaput laih, Jacob kidika Egipto yakat kiwi yalahna;#Gn 46:1-7. dawak yakat dauna,#Gn 49:33. dawak mamuihki bararak balna bik yakat dadauna. 16Jacob wakalni balna kidika Siquem yakat duwi uiwi nununa, Abraham sau-ū as bakanna dai kidika Hamor walanibis balna kaupak, Siquem yakat.#Gn 23:3-16; 33:19; 50:7-13; Jos 24:32.
17“Papang yaklauwi Abraham yakat pramis yamna kidika kaiwi kalahnin ulis kat, Israel muihni balna kidika mahni kakalna dai Egipto yakat, 18bahang kidika mani balna yakat Egipto yakat king ūk kana dai, bahang witing laih José kidika amangnilawasdai.#Ex 1:7-8. 19Adika kingni, matawanki yakat alas kalyulna#Ex 1:10-11. dawak dutni diyamna mamuihkibararak balna yakat; taihwi diyamna walaninabis balna kidika batahn dawak ruhmwi dadawak dauna atnin.#Ex 1:22. 20Kidika mani yakat Moses kidika batahndana. Muihbin as tanit nuhnibin dai, papangni balna yaklauwi ūnina yakat mumuhna waiku bās praisni.#Ex 2:2. 21Witingna mahka ruhmwi dadawak, Fero walanibis yal yaklauwi laihwi duna, dawak witing walanibis kapat muhna.#Ex 2:3-10. 22Kaput laih Moses kidika Egipto muihni balna sinsnina tuhni kidika sumamalna, bahang witing laih al as parasni dai, yulwa balna kidika dawak yamwa kidika bik.
23“Kurih 40 laihwak, Moses kidika Israel balna yakat ditalna kiuna dai, bahang kidika laih witing palni tawanni dai. 24Talwak Egipto muihni as yaklauwi Israel muihni as kau dutni kalyamwak, Moses yaklauwi nanitdakna, kaput laih Egipto muihni yakat īna. 25Moses kulwādai, witing wanaihni Israel balna kidika amanglalawarang, witing munah Papang yaklauwi dilaihwi yakwarang, kaunah witingna amanglalawasdai. 26Payahwak, Israel muihni balna bu kalbabauwak talna; dawak kulninna aslah dunin yulni diyulna: ‘Manna laih kalwirahmana; ¿bahang ais yamta biri biri dalani dutamana?’ 27Kaput laih, as yaklauwi bauwa muihni kidika Moses yakat tukna, dawi kalyulna: ‘¿Wais yaklauwi yangna paskingna akat wihta mahanayah? 28¿Yaikuhtimahn, damai mani Egipto muihni as īnaman kapat?’ 29Moses kidika dakawi, Madián sauni yakat kiri kiuna.#Ex 2:11-15. Bahang kidika pāni yakat tringsar kapat likdai, dawak walanibis bu duna.#Ex 18:3-4.
30“Kurih 40 bayakwak usnit kat, kauhmak wanilang Sinaí asangni yaihnit yakat insal as lāih kalahna dai, pan wakal as dahlwa munah. 31Moses witing talna, kaunah yamni talkuhti yaihnit yakat kiuna, dawak Papang dinit yulwak dakana, bahang aput yulna dai: 32‘Yang kuduh, muihmana bararak balna Papangni. Yang laih Abraham Papangni, Isaac Papangni dawak Jacob Papangni.’ Dawak Moses yamaduwak kalyukna, bahang witing sip wauhyaklauwi talwasdai. 33Kaput laih Dawan yaklauwi kalyulna: ‘Susma yaktah, kat ataktaman sauni kidika laih Papang dini bahang. 34Yang lāih talnayang, tawanki ampus wauhwa kidika, Egipto yakat. Kakaida kidika dakanayang, bahang aiwik lakwanayang laihtik yaknik yulni. Kaput bahang aiwah, Egipto yakat masihki ki.’#Ex 3:1-10.
35“Witingna Moses kidika ruruhmna dawak kalyuyulna: ‘¿Wais yaklauwi tunan dawak wihta mahanayah?’, Papang yaklauwi tunan muihni kapat sihna, dawak bik laihwi yakyang, bahang kidika laih pan wakal dahlwa munah yulna Papang innisal. 36Kaput laih Moses yaklauwi Egipto kaupak yakna, mamuihkibararak balna dai kidika, bahang witing sain balna yamna dawak di taldas kidika bik kurih 40 kidika sauni yakat,#Ex 7:3. Kuma Pauni yakat,#Ex 14:21. dawak kauhmak wanilang yakat bik.#Nm 14:33. 37Sihm adika Moses yaklauwi Israel balna yakat diyulna: ‘Papang yaklauwi yamwak manna paskaupak prapit as kalahwarang sihm yang apāt.’#Dt 8:15,18. 38Dawak Israel balna kidika kauhmak wanilang yakat uduhna sakkat, sihm Moses kidika yul wirlawasakdai insal kidika Sinaí asangni kaupak yulbauwak kidika#Ex 19:1—20:17; Dt 5:1-33. mamuihki bararak balna karak, dawak witing kuduh sangka atnin yulni balna duna dai mayang akat mayanin yulni.
39“Kaunah mamuihki bararak balna yaklauwi yulni dakanin yuyulwasdai, kaunah nawatkauh laih Egipto yakat nawatwi uinin kukulna. 40Aarón yakat kalyuyulna: ‘Dawan dauh yamta mayatangkat matakituna kawang, kat amangladaski Moses yaklauwi Egipto kaupak yanayakna kidika ais kalahnapa.’#Ex 32:1. 41Kaput laih dawan dauh as yamna, turuh wayani kapat, dawak tinglau ihina, dawan dauh witingna yayamna kidika risnipik kau.#Ex 32:2-6. 42Kidika bahang, Papang kidika witingna kaupak naikau kalahna, dawak damukwak makau kisang kau yala balna yakat minitnayuyulna. Kat prapit balna wauhninataya yakat kaput ulna bahang:
‘Israel balna,
¿Kauhmak wanilang kau kurih 40 bangmana dai kidika
yakat sakripais dawak minitdis kalanin kidika yanamana dai katpah?
43Nawatkauh laih,
Moloc, dawan dauh kidika wayani truknamana
dawak dawan dauh Refán yalani kidika bik,
dawan dauh wayani balna manna
yamnamana kidik, kidika yakat mamatna yulnamna.
Kidika bahang manna laih pa ūk yakat maruhmting yawanama
Babilon sauni tanityakau.’#Am 5:25-27.
44“Muihmana bararak balna kidika duduwadai kauhmak wanilang yakat, pramis ūni labanni#7.44 Pramis ūni labanni: Y.y. witnis yulnin ūni labanni. kidika, Papang yaklauwi Moses yakat pakna kaput yamna dai kidika, kat witing yaklauwi kalyulna dai bahang amput kalyulna yakat dawak bik talna kaput yamnin.#Ex 25:9,40. 45Mamuihki bararak balna kidika ūni labanni kidika witingna yakat dinina diana dai, dawak Josué karak yalalahna balna kidika, sau ūk balna kidika niningna yakat kalbauwi saunina dakyakwi duduna yakat duwi aina dai,#Jos 3:14-17. kat kidika laih Papang yaklauwi tingnina yakat āna dai bahang. Bahang kidika laih sakdai Devid mani balna dai yakat bik. 46Witing laih Papang kaupak ilp kidika duna dai, dawak kalyulna dai kalana atnin pa as, kidika yakat Jacob sulani balna#7.46 Sulani balna: Y.y. ūni. Tingkau ulna ūk yakat: Papang. kidika yalahnin;#2 Sam 7:1-16; 1 Cr 17:1-14. 47kaput kaunah Salomón yaklauwi Papang ūni kidika yamna dai.#1 Re 6:1-38; 2 Cr 3:1-17. 48Papang makau palni sakkidika, muih al tingni kau ū yamna kidika kawas kaunah. Prapit yulna kaput:
49‘Makau kisang kidika laih yang tronki,
dawak sau kidika laih yang kalki ataktayang.
¿Ais satni ūni yamwi yayawarang?, Papang yulwi;
¿Angdika karang urupnik pāni kidika,
50yang lawik adika balna bitik yamnayang kidika?’#Is 66:1-2.
51“Kaunah manna —Esteban baisa tanit yakat yulwi kiuna— laih nining tapdadasmana, dawak tapamana dutamana dawak ismangna laih Papang dis balna kidika mana. Dawak nining Spirit Holi niningkauh mana. Muihmana bararak balna dai kapat mana.#Is 63:10. 52¿Angdika pranipit balna kat, manna muihmana bararak balna yaklauwi dutni diyayamwasdaih? Witingna yaklauwi ihina, holi muihni kaiwarang yulni yulna muihni balna yakat, dawak waralaih holi muihni kidika kaina, dawak manna lawa laihta īnamana. 53Manna, insal munah lā dunamana kidika yakat daka yamtasmana.”
Esteban dauna
54Kidika yulni balna dakawi kulninna daukalwi, ananina bik parasni kakasna, Esteban niningyakat. 55Kaunah witing laih Spirit Holi kidika buhng dai bahang, makau kisang yakat talna, Papang alasnina yaksihn kidika, dawak Jisas bik Papang tingnipal yakat yaklauna sakkat. 56Kaput dawak yulna:
—¡Talnauh! Makau kisang kidika apahna kat talayang, dawak muih Walanibis al kidika Papang tingnipal yakat sakki.
57Kaunah witingna tapanina puputna, dawi parasni sarahwi, witingna bitik Esteban niningkauh yaklalauna. 58Tawan nuhni kaupak ahni yakat yakwi kipala kau babahrna, witing niningkauh witnis kalalahwa balna kidika laih asninana dababangna wahma as ayangni Saulo kidika tingni yakat, maintalnin.
59Kipala kau babahrwakat, Esteban minityulwi yulna: “Dawan Jisas, dutah yang spiritki.”#Sal 31:5; Lc 23:46. 60Usnit kat limbabahwi parasni sarahna: “¡Dawan, adika dutni witingna yakat dikulwinih!”#Lc 23:34.
Kidika yulna usnit kat dauna.
Currently Selected:
Apastil Balna Warknina 7: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
