2 Tesalónica 1
1
Parasnin yulni
1Pal, Silvano dawak Timoti kauna Tesalónica#Ap.w 17:1; 1 Ts 1:1. tawanni nuhni muihni kulyang balna yakat pararaswi, Mapapangki yakat dawak Madakiwan Jisas Krais yakat bik aslah bangkidika. 2Mapapangki dawak Madakiwan Jisas krais kauna yaklau minikun talnin lani duwa kidika dawak kulnin aslah lani duwa kidika bik manna mamatna yakat lakna karang.
Papang yaklau dutni yamyang muihni balna kidika lanina yamna karang watwi Krais kaiwarang mani kat
3Wanaih balna, yangna laih ban kaput Papang yakat tingkih kalanikna ki manna yulmana, la kat yamtayangna kaput, kat manna rahm kulnin lani dutamana kidika dawak biri biri dalani lani dutamana kidika laih ma balna bitik yakat baisa nuhni kalwa bahang. 4Kaput bahang yangna laih alasna manna yulmana kidika yultayangna Papang sutsni balna kidika yakat, parasmana dawak rahm kulnin lani duta uinin lani dawak wauhnin balna wauhtamana kidika pasyakat lāih yaktamana kidika yulni. 5Adika laih Papang yaklau la kat la yamwa sainni as ki dawak lāih yakwi witing yaklau barangni la yamna kidika witing king kāwa lani yakat kana atnin, kidika yulni wauhnin balna wauhtamana.
6Bahang yamni ki Papang yaklau diyamwakat wauhninna manna yakat manayayamwakat wauhtamana kidika muihni balna yakat, 7dawak manna wauhtamana kidika yakat laih, urupdanamna manana atnin sihm yangna yakat yanana kaput. Adika dini laih Dawan Jisas witing innisal balna pararasni kidika karak kaiwarang kidika mani yakat karang ki, kisang kaupak kuh dahlwa pasyakat kaiwarang kidika. 8Angdika muihni balna Papang yakat amangnilalawas dawak Dawan Jisas yulni wisam yamni kidika yakat dakakawas balna kidika yakat wah diana atnin yulni kaiwarang ki. 9Adika balna laih barang daukalnin wahni diawarang ki, dawak Dawan alasnina yaksihni dawak parasni kidika kaupak naikau ruhmna karang ki, 10kidika mani Dawan kaiwarang mani kat witing tawanni pasyakat rispik kalyamna atnin yulni dawak kulyang balna bik yamni kaltalna atninna yulni; bahang manna laih rahm kulnamana yangna lawik yulnayangna yulni balna kidika.
11Adika yulni yangna ban kaput mikitna yultayangna manna yulmana, Mapapangki yakat kalyultayangna witing yaklau barangni manayamna atnin manayulwakat aiwanamana kidika yakat, dawak bik witing paraski karak yamwang manna di yayamni balna dukih manawa kidika dawak manna rahm kulnin lani dutamana kidika kau wark balna yamtamana kidika. 12Kaput laih, Madakiwan Jisas ayangni kidika rispik yamna karang manna yulmana, dawak witing yaklau rispik yamna karang Papang dawak Dawan Jisas dalani lani duwa kidika kau.
Currently Selected:
2 Tesalónica 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998