2 Tesalónica 2
2
Dawan watwi kaiwarang kidika yulnilāih yulnin kidika
1Wanaih balna waralaih, Madakiwan Jisas Krais watwi kaiwarang kidika dawak witing#1 Ts 4:15-17. karak kalpakdarang kidika niningkauh laih, manna yakat kalmana dinit buktayangna 2manna kulnamana lani kidika isi palni laih wirlalawinih dawak spirit yulni as bik, kidik awaskat muih as wauhtaya ulna manawi Dawan kainin mani kidika laih uman kaiwi kana manatakat yamadunamna awaski. 3Di as kau bik datanangkat alas manayulnin awaski. Bahang kidika mani kiwi kawas tanitkauh yakat Papang niningkauh yaklaunin lani kidika kaiwarang ki, muih dutni kidika kaiwi kalahwarang mani kat, daukalnin tani yakat wirlana kidika. 4Adika ki wais wais Papang ayangni duduwa balna yakat kidik awaskat ayangni nuhni yamnin#Dn 11:36; Ez 28:2. muihni kidika niningnakauh yaklauwa kidika, dawak Papang ūni kidika kat bik kiwi tronni kidika āwi duwi, Papang ayangni usnit yakat.
5¿Manna ismangnakatwasyah yang baisa manna karak sakyang dai mani adika dini manayultayang dai kidika? 6Dawak waralaih manna amanglatamana ais yaklau laihwatwa kidika, kalahnin mani kat kalahwas atnin yulni. 7Bahang dutni warkni malni yakat sakkidika laih uman tanityakat lapakna ki; waralaih papusyakat laihwatwa sakkidika yaknin kamanah ki. 8Bahang kidika dutni muihni kidika kalahna karang, Dawan Jisas yaklau tinpas#Is 11:4. kau puhwi ipamwarang kidika dawak witing yaringni nuhni karak kaiwarang mani kat daukalpamna karang ki. 9Kidika dutni muihni kidika niningkauh laih, sitan ilpni karak kaina karang; parasni nuhni duwi kaina karang, dawak sain balna dawak taldas dini#Mt 24:24. dauh balna bik yamna karang. 10Dawak dutni satni balna mahni yamna karang disnin tani yakat uiwa balna yakat alas diyulna atnin, kat yul rahm kidika duwi dalani tatalwas dai bahang laihwi yaknin lani kidika duna atnin. 11Kidika bahang, Papang yaklau dawi dutni kidika yaklau alas manayulna atnin dawak yul alas yakat rahm kulna atnamna yulni, 12witni kat yul rahm yakat kukulwas muihni balna dai kidika bitik pāt yakat ruhmna atnin laih awas, kaunah dutni yakat alasna duduwa muihni balna kidika.
Laihwi yaknin lani dunin muihni balnawalwi yakna kidika
13Kaunah yangna laih Papang yakat ban kaput tingkih kalanikna ki manna yulmana, wanaih balna Dawan yaklau dalani manatalwa kidika, kat Papang yaklau manawalwi yakna manna tatuna laihwi yaknin lani kidika duna atnamna#2.13 Manna tatuna laihwi yaknin lani kidika duna atnamna: tingkau ulna balna buas kidika laih aput yuyulwi: tatuna kaupak laihwi yaknin yulni. manna yakat Spirit yaklau holi manayamwa kidika dawak rahm yulni yakat kulnamana kidika munah bik. 14Adika yulni Papang yaklau manayulwakat aiwanamana yangna lawik yul wisam yamni yultayangna kidika munah: Madakiwan Jisas Krais alasnina yaksihni yakat dimana dunamna yulni.
15Kaput bahang, wanaih balna, tamatna yakat barangni awanauh dawak yangna palni dawak wauhtaya ulna munah bik ais yamtayangna dini balna manasumalnayangna kidika damatnakahnin awaski.#1 Kor 11:2. 16Madakiwan Jisas Krais palni dawak Mapapangki yaklau dalani maitalna kidika, ban kaput atnin mawalakiāna kidika dawak tahanin lani bik mayana kidika witing dalani lani duwa kidika kau, 17ismangna kidika dulauna karang dawak manna lawa di yamni yamnamna kidika dawak di yamni yulnamna kidika bik ban kaput manawarang.
Currently Selected:
2 Tesalónica 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998