2 Crónicas 1
1
Salomón, Papang yakat sins lani yulwi
(1 Re 3:3-15)
1Salomón, Devid walanbis al kidika, Dawan parasni munah witing kingni lani kidika baisa parasni yamna, witing parasni kidika baisa nuhni yamna. 2Bahang witing Israel muihni balna bitik yulwi uduhna: kalbauyang tanina tuna balna, kabamint warkni yamyang balna, dawak witingna ū duyang tunan muihni balna bitik, witingna Israel yakat parasnina duduwa balna dai kidika. 3Dawak muih balna kalududuhna kidika bitik karak kalpakwi Gabaón kau prias ūni as sakdai yakat uina, kat yakat sakdai bahang Papang karak kalpaknin ūni labanni dai kidika, dawak kidika laih Papang dini yamyang Moses yaklauwi yamna dai kauhmak wanilang pasyakat. 4Kaunah Devid yaklauwi Papang lāni baksni kidika duwi kiuna Quiriat-jearim kaupak, witing pāni ridi yamna dai yakat, kat Jerusalén yakat ū labanni as dulauna dai bahang.#2: Sam 6:1-17; 1 Cr 13:5-14; 15:25—16:1. 5Hur mani, dawak Uri walanibis al Bezaleel,#Ex 38:1-7. yaklauwi sakripais busnin pāni bras kau yamna dai kidika bik, Gabaón, Dawan ūni labanni dulauna muhni tani yakat sakdai. Salomón dawak muihni balna bitik kidika yakat uina dai yulwi dakana atnin.
6Salomón kilwi kiuna, sakripais busnin pāni bras kau yamna Dawan muhni yakat sakdai kidika yakat, kidika laih Papang karak kalpaknin ūni labanni muhni tani yakat sakdai, bahang kidika yakat sakripais tausin as busna dai.
7Kidika puknita, Papang lāih kalahna dai Salomón yakat, dawi kalyulna: “Ais dukih mawa kidika yayultah, kaput laih yang lawik maki.”
8Salomón biriwi Papang yakat nangnitlana: “Man kulnam yamni kidika papangni Devid yakat kalanaman dai, dawak witing pāni yakat yang king yahanaman. 9Kaput bahang, Papang dawak Dawan, waralaih yang papangki Devid kau kalyulnaman dai kidika yamtah, kat uman king yahanaman bahang tawan as muih mahni palni sihm sau yahamni kapat yakat.#Gn 13:16; 28:14. 10Kaput bahang, sins lani nuhni kidika yatah, adika tawanni adik tunan āwik duyawinik; kat ¿wais sipkarangyah man tawanma nuhni palni adika kabamintni kanin?”
11Papang yaklauwi Salomón yakat nangnitlana: “Adika dini kidika man dukih mawa bahang, man yultasman dai ritsni balna kidika, di yayamni balna dawak risnipik nuhni kidika, dawak waihmala balna dauninna kidika, dawak man sangmaka naini atnin kidika bik yultasman dai, kaunah man yulnaman kidika laih sins lani nuhni kidika yang tawanki kidika tanituna kawi duwi kiuna atnin yulni, kidika yakat yang king mahanayang kidika, 12sins lani nuhni kidika dawak di amanglanin kidika bik matayang, kaunah baisa kidika minit yakat ritsni, di yayamni dawak risnipik bik, man tamat yakat king balna kidika kaput duduwasdai, dawak bik man usmatkauh aiwarang kidika balna bik duduwas karang.”
13Kidika usnit kat, Salomón witing Jerusalén yakat nawatwi kiuna, kidika holi pāni Gabaón kau pakdai yakaupak,#1.13 Holi pani...yakaupak: sara mani kau ulna balna kidika kaput yulwi. Hibru laih yulwi holi pani...yakat. Papang karak kalpaknin ūni labanni balna kidika awaihwi talna usnit yakat, Israel yakat king kana dai.
Salomón witing wauhwi bakannakār dawak aras
(1 Re 10:26-29; 2 Cr 9:25-28)
14Salomón yaklauwi uduhna kār dawak aras kilyang balna bik. Witing duwadai kār 1,400 dawak 12,000 aras kilyang balna,#1 Re 4:26. kidika balna bitik laih sihna dai kalbauyang ūni parasni kau war kārni bangyakat, dawak Jerusalén kau king yaihnit yakat kalbauyang balna duwasak kidika balna yakat. 15King yamna, Jerusalén yakat lalah manas atnin dawak gol bik manas atnin sihm kipala mahni kapat;#Dt 17:17. dawak bik suhun kidika manas atnin sihm langnikau asangpas anini manas kapat. 16Salomón aniras balna kidika laih duwi uiwadai Muzri#1.16 Muzri: Kaput ulna kidika yamni kapatki. Hibru kau laih yulwi Egipto. kaupak, dawak Cilicia kaupak bik, kat king yaihnit kau di wauhwi bakanyang balna bangkidika yaklauwi kidika pāni balna kaupak bakakanwi duwi uiwadai.#Dt 17:16. 17Egipto kaupak kār as bakanwi duwi uiwa kidika minit laih lalah 600 dai, dawak aras as kidika laih 150. Kaput laih hitita dawi Siria kingni balna kidika, Salomón muihni balna munah bakanwi duduwadai.
Currently Selected:
2 Crónicas 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998