2 Crónicas 2
2
Salomón dawak Tiro kingni Hiram karakpramis yayamna
(1 Re 5:1-18; 7:13-14)
1 # S.b. 4:1-23 kidika laih S.b. 3:33—4:17 kat kidika simh ki hibru kau ulna kidika.Salomón yaklauwi Dawan yakat ū as yamwi kalanin kulna, dawak witing palni kingni ūni bik. 2Kidika warkni yamnin yulni di trukyang tausin 70 ana, dawak kipala sahwi pahryang balna kidika tausin 80 witingna laih asangpas yakat wark kalalahwadai, dawak 3,700 kidika balna laih wark minit talyang balna āna dai tunan duna atnin.
3Usnit kat Salomón yaklauwi Tiro kingni Hiram yakat yul kalsihna: “Yang kau bik sihm yamtah, papangki Devid kau yamna man dai kaput, witing yakat man lawa kalsihnaman dai suhun panan balna, king ūni as yamwi kana atnin. 4Talah, yang Papangki Dawan yakat ū as yamtik kalaki ki, witing dini yamnin yulni, witing risnipik kau di walapni kidika busna atnin yulni, dawak plawar busna balna kidika bik lakwi par dawi kalanin, dawak sakripais karauni kauna buswa kidika bik buswi kalana atnin mapiris dawak ma ulah yakat bik, dawak sihm kaput bik yamna karang yakurupdinin mani#2.4 Yakurupdinin mani: kidika laih yulwi satadi mani. balna kidika bik, waiku wisamni alasnina yamnin, dawak alasna ūk balna yamnin kidika bik maPapangki Dawan risnipik kau, bahang kidika laih nining ban kaput yamna karang Israel yakat. 5Kaunah makat yulni ūni yamki kidika laih nuhni atnin ki, kat yangna Papangkina laih tanit nuhni bahang dawan dauh balna bitik minitna yakat. 6Kaput kaunah ¿wais as sipkarangyah witing yakat makat yulnin ūni#1 Re 8:27; 2 Cr 6:18. as yamwi kalanin, makau kisang kidika sutni kat kiwi kuihnin sip-awas ki, kaput kaunah sip-awas ki Papang laih kidika yakat sak-atnin, pāni kidika dibin kalwa kidika? ¿Dawak yang adika waisyang makat yulnin ūni as yamtik kalanik, witing ayangni risnipik kau walapni busnin manah bik? 7Kaput bahang muih as yasihtah yang akat, gol kau di yamwi lan muihni kidika, lalah kau, bras kau dawak ayan kau bik di yamwi lan kidika, dawak asna niningkauh yakat asna pauni, paisa sa kidika balna. Dawak bik wayani balna yamwi lan muihni kidika bras, kipala, pan balna kau, bahang witing laih ilp diawarang kidika warkni yamwi lan balna bangkidika Judá dawak Jerusalén yakat, bahang kidika balna laih yang papangki yaklauwi warkni kidika yamnin diana dai kidika. 8Kaput bik, Líbano kaupak yasihtah suhun, ciprés dawak sándalo panan balna kidika, kat yang amanglatayang man dima yamyang balna kidika laih Líbano panan balna kidika dakwi lan ki. Kaput bahang yang diki yamyang balna kidika, man dima yamyang balna yakat ilp diayana karang 9pan mahni ridi yamwi yanin, kat makat yulnin ūni yamki kidika laih nuhni atnin bahang dawak bik taldas yaksihni karang bahang. 10Kaunah man amanglatah yang lawik kasnin dini balna kidika diaki ki man warkma yamyang balna yakat, kuh dakyang balna pan dadakwa kidika balna yakat, plawar litro milian arungka minit kau tausin andat arungka, dawak cebada bik sihm kaput diaki, wain kidika litro tausin 440, dawak disala kidika bik kaput as diaki.”
11Kaput laih Tiro kingni Hiram yaklauwi Salomón yakat wauhtaya as kalsihwi aput kalyulna: “Dawan yaklauwi man kidika Israel kingni mahana, kat witing tawanni yakat dalani talwa bahang.” 12Dawak baisa minit yakat lakwi yulna: “¡Dawan, Israel Papangni laih ayangni nuhni yamna karang, kat witing yaklauwi makau kisang kidika dawak sau bik yamna kidika yaklauwi king Devid yakat walanbis al as sins nuhni duyang as kalana, sinsni bik sirihni, bahang witing yaklauwi Dawan yakat makatyulnin ūni as pakwi kalawarang ki dawak witing king ūni bik as yamwi duwarang bahang! 13Kaput bahang masihtayang muih al as di lan palni dawak sinsni bik sirihni kidika: Hiram yakat. 14Witing kidika Dan sulani pas kaupak yal as, dawak Tiro sauni kaupak al as ki kidika karak walaninabis. Witing laih lan palni ki di yamna atnin gol, lalah, bras, ayan, kipala, pan, asna paisa, paisa sa, linin asnina, asna pauni dawak di wayani satni balna bik yamwi lan palni ki pan kau, ayan, bras kidika balna satni kau, dawak ais amput yamnin pakwarang kidika bitik laih yamwarang ki, man ahal dutasakman kidika kapatnah warkni yamwi lan balna, dawak man papangma Devid duwa dai kidika, yang dakiwan. 15Kidika bahang, dakiwan, man dima yamyang balna yakat plawar minik, cebada, disala dawak wain bik dianin yulnaman kidika sihtah. 16Duwakat yangna laih Líbano akat, man pan ampus dukihman kidika, duyawanaki, kuma munah pala kau Jope kat. Kidika kaupak laih man lawa paktang uiwi mamawarang Jerusalén kat.”
17Kidika usnit kat, Salomón yaklauwi Israel sauni yakat pa ūk kaupak muih yapak bangkidika ayangnina āna, papangni Devid yamna dai kidika usnit kat, bahang kaput laih muih bangdai 153,600. 18Kidika balna paskaupak muih 70 uduhna dai, di truknin muihni balna, kipala sahwi pahryang balna kidika asangpas yakat 80,000, dawak kidika balna minitna talyang kidika 3,600 yakna dai.
Currently Selected:
2 Crónicas 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998