1 Crónicas 29
29
1Usnit kat king Devid yaklau muih kalududuhna balna bitik yakat diyulna: “Yang walakibis Salomón, witing yakat manah Papang yaklau walwi yakna, muih al wahmabin as kurihni dibindauh kat, wark kidika laih nuhni palni ki, kat muih al aslah ūni yamnin yulwas ki kaunah Dawan ūni kat yamnin yulwi. 2Wark parasni alahwik Papangki ūni yamnin dini balna kidika ridi yamnayang: gol, lalah, bras, ayan dawak tat kidika yamnin dini balna kat kat. Dawak kipala pauni sa kidika, kipala yaringni minit kau ilwi birnin balna kidika, kipala sahna bikisni balna karak banawarang kidika, kipala satni yayamni balna kidika bitik dawak kipala pihni balna kidika bik minit bayak.#1 Cr 22:5. 3Kaunah baisa makat yulnin ūni yamna atnik di balna bitik ridi yamnayang kat dutayang kidika minit yakat, dawak yang Papangki ūni yakat dalani lani dutayang kidika, makat yulnin ūni yamnin yakat ātayang gol dawak lalah yang diki balna kidika: 4gol manah paun 200,000, lalah manah 460,000 ū balna kidika itikna atnin. 5Gol dini balna dawak lalah dini balna yamnin balna kidika yamna atnin, dawak di satni yamyang balna wark yamninna duduwa kidika. Dawak waralaih, ¿wais dukih kalawih Dawan yakat di as kalana atnin?”
6Bahang kalwanaih balna kidika bitik taninatuna balna, Israel sulani balna taninatuna balna, kalbauyang muihni uduhna nunuhni balna kidika taninatuna balna, dawak king warkni yamyang balna kidika taninatuna balna, witingna kulninna dukih di ahana dai, 7makat yulnin ūni warkni yakat ahana gol paun 330,000 dawak gol lalahni dadasni#29.7 Y.y. dáricos. Talah Paun anin, lalah dawak kulwi talwa balna kidika yakat. manah 10,000, lalah manah paun 660,000 dawak bras manah paun 1.200,000 dawak ayan manah paun 6.600,000.
8Dawak kipala yayamni duduwa dai kidika bik makat yulni ūni lalahni yakat ahana dai, kidika laih Gersón sulani Jehiel tingni yakat sakdai.
9Muih balna kidika alasna kalalahna dai adika kulnin yamni kidika yulni, kat Dawan yakat malwas adika dini balna kalalana dai kidika yulni. King Devid bik sihm alasna kalahna dai.
10Bahang Devid yaklau Dawan yakat yamni palni kalyulna muih balna kalududuhna kidika bitik muhnina yakat, aput yulwinah: “¡Dawan, maPapangki Israel Papangni man laih ayangma nuhni kidika ban kaput yamna karang! 11¡Dawan man dima balna ki, nuhni kidika, parasni kidika, ayangni nuhni yaksihni kidika dawak king kidika! Kat kisang yakat dawak sau yakat di balna bangkidika bitik man dima balna bahang. King kawa lani kidika#Mt 6:13. kidika bik man dima, kat Dawan man laih di bitik minittang yakat man bahang. 12Man kaupak aiwi rits balna kidika dawak rispik lani kidika. Man lauwa kabamint āwaman di bitik yakat. Parasni kidika man tingma yakat ki, dawak bik sihm man tingma yakat ki nuhni atnin dawak bitik yakat parasni kalana atnin kidika. 13Kidika bahang, yangna Papangkina, waralaih tingkih lani matayangna dawak ayangma nuhni yaksihni kidika bik nuhni yamtayangna; 14bahang, ¿yang adika waisyang dawak yang tawanki kidika ais takat di satni mahni man yakat matanakiyah? Rahm kidika laih, di bitik kidika man kaupak kaiwi dawak man kaupak dunayangna kidika manah matayangna. 15Man muhma yakat laih sau ūk muihni watwas tanitna yakat uiwa kapat yangna, yangna muihkina bararak balna dai kapat, dawak sau akat yangna sangkika adika laih sihm sanni as kapat ki, tahanin lani as bik dis.
16“¡Dawan, yangna Papangkina, man dima balna dawak man kaupak aina adika ritsni balna bitik ridi yamnayangna adika makat yulnin ūni as yamna atnin man ayangma holi yakat! 17Yang Papangki, yang amanglatayang, man lauwa kulnin lani balna kidika laihta talaman dawak barangni kidika bik yamni talaman. Kidika bahang, kulnin lani barangni karak adika balna bitik manayang. Dawak waralaih alasna karuk talnik sipyang, man tawanma akat kaluduhwi kulnin lani yamni karak minit dis kalanin dini mamana kidika. 18Dawan, Abraham, Isaac dawak Israel yangna muihkina bararak balna Papangnina, kulnin bukwas lani kidika ban kaput datah man tawanma pasyakat, dawak witingna sangninaka kidika tanitna awa man namang yakat diduyawah. 19Yang walakibis Salomón yakat bik isning yamni as kalatah man lama balna kidika kat laihwi yamna atnin yulni, dawak makat yulnin ūni kidika yamna atnin yulni di balna ridi yamnayang kidika kau.”
20Kidika tanit yakat Devid yaklau kalududuhna muihni balna bitik yakat diyulna: “Waralaih Papangmana Dawan yakat ayangni nuhni yamtanauh.” Bahang kalududuhna muihni balna kidika witingna muihnina bararak balna Papangnina Dawan yakat ayangni nuhni yayamna dai, dawak Dawan muhni yakat dawak king muhni yakat bik limbabahna dai. 21Kidika payahwakat Dawan yakat sakripais dawak sakripais karauni kauna bik bubusna dai: turuh ahalmuk wawahma 1,000, sip ahalmuk 1,000 dawak sip kurih as duduwa balna kidika 1,000, minit dis kalanin dini wain kauna dawak Israel bitik yakat sakripais mahni palni bubusna dai. 22Kidika mani alasna palni kakasna dai, dawak bik didina dai Dawan muhni yakat. Usnit kat wat bu yakat Devid walanibis Salomón kidika king yayakna dai, dawak Papang muhni yakat Papang dini yakwi king ahana dai, dawak Sadoc yakat laih sumalyang ahana dai. 23Kaput laih, Salomón witing Dawan tronni kidika duwi king kana dai, papangni Devid pāni yakat,#1 Re 2:12. dawak baraknin lani nuhni palni duna dai. Israel muihni balna bitik witing yulni dakakana dai. 24Dawak tatuna balna dawi kalbauyang muihni balna bitik, king Devid walanibis balna bitik karak ilp kalalana dai king Salomón yakat. 25Dawan yaklau Salomón yakat nuhni kalyamna dai Israel balna bitik muhnina yakat, dawak witing kingni lani kidika yaringni kalana dai muhnilau witing tanitkauh Israel yakat king as bik disdai kaput.
Devid dauna
(1 Re 2:10-12)
26Isaí walanibis Devid, Israel bitik yakat king kana dai. 27Israel kingni dai kurih 40 pasyakat, Hebrón yakat kurih tiaskaubu king kana dai dawak Jerusalén yakat laih kurih 33 king kana dai.#2 Sam 5:4-5; 1 Cr 3:4. 28Muihbarak yamni kauna dauna dai, kurih mahni, rits balna dawak rispik lani bik duwa dai. Witing pāni yakat walanibis Salomón king kana dai.
29King Devid yulni umani balna kidika, tuna kaupak witni kat kidika, prapit Samuel wauhnitaya balna yul umani ulna yakat, Prapit Natán wauhnitaya yul umani balna ulna yakat, dawak di talyang Gad wauhnitaya balna yul umani balna ulna yakat ulwi dana, 30king lani balna kidika, parasni kidika, dawak di balna witing yakat, Israel yakat dawak sau ūk balna yakat kalahna balna kidika bik ulwi dana.
Currently Selected:
1 Crónicas 29: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998