2 Samuel 15
15
Absalón yaklauna Devid niningkauh
1Ma as bayakwakat, Absalón witing yakna dai war kalbaunin kārni as, dawak aras bik, kaput laih kalbauyang muihni balna 50 uduhna dai witing palni ahalni balna. 2Mapiris palni yaklauwi ta kung yakat wawatwa dai, tawan nuhni kiwi kawa yakat, muih bitik uiwa kidika king yakat lanina yamna atnin, yulni, witing kalbibilna karang kat yulni, witingna yaklauwi yulwak uiwak diyulwi dakawa dai witing kidika angdika tawanni kaupak kaiwapa. Witingna kidika Israel sulani mayang atwarang kat, 3Absalón yaklauwi diyulwa dai: “Rahm palni laih man yultaman kidika aitani ki, kaunah king yaklauwi muih as bik awaski lama yamna atnin kidika.” 4Dawak baisa minityakat lakwi yulna: “¡Adika sauni akat wihtayang kat laih, muih balna lanina yamnin manas duduwa kidika aiwak la kat lanina yamtitikdai!” 5Muih as witing yaihnit yakat kiwi kalparaswarang kat, Absalón yaklauwi wakaihwi kalparaswi muhni yakat umwādai. 6Adika yamwa kidik laih Israel muihni balna bitik king yakat uiwa kidika lanina kidika laihwi yamwi diana atnin yulni. Kaput yamwi Israel balna kulninna kidika laihwa dai.
7Kurih arungka#15.7 Arungka: ulna umani balna buas yakat laih kaput yulwi. Hibru kau laih 40. bayakwakat, Absalón yaklauwi king yakat kalyulna:
—King, kalma dinit yakat buktik yultayang, yadatang kat Hebrón yakat yawik Dawan kau pramis kalyamna yang kidika yamkuh. 8King man dima yamyang adika Siria sauni Gesur pāni yakat yalahtayang kat, Dawan yakat pramis yamnayang dai, witing yaklauwi watwi yāwak Jerusalén yakat yawaki kat, witing yakat prinias as yamki.
9King yaklauwi kalyulna:
—Ismanglak yawah.
Kaput laih Absalón kidika Hebrón yakat kiuna. 10Kaunah mahka laih yul sihwa dai Israel sulani balna bitik yakat: “Manna trumpit puhwak dakanamakat, manna yultanama Absalón laih Hebrón yakat king ahana.” 11Baisa minit yakat Jerusalén kaupak muih 200 kapat yulwi dukiuna dai, kidika balna laih uina dai kulninna yamni karak, di kalahwa kidika amanglalawas dai. 12Kaput bik laih, Absalón yaklauwi Devid yaihnit kau lā sumalyang balna duwa dai kidika yulwi dukiuna dai, ayangni laih Ahitofel, witing laih Gilo tawanni nuhni yakat yalahwa dai, kaput laih witing sakripais buswarang kidika yaihnit yakat atnin. Kaput laih witingna niningkauh yaklaunin yulni aslah kalalahna kidika baisa parasni duna dai, dawak bik Absalón usnit uiyang balna kidika bik baisa mahni kalalahna dai.
Devid Jerusalén kaupak kalahwi kiri
13Yul muryang as kiwi Devid yakat kalyulna, Israel balna laih Absalón yakat wiryaklawa bangki. 14Kaput laih Devid yaklauwi yaihnitkau kalbauyang tunan muihni balna duwasak dai yakat diyulna:
—¡Warmani mahka maīrang, kidika awas karang kat Absalón tingni kaupak sip maīri malawas karang! ¡Bainah yamtanauh, kidika awaskat mailaihwarang, dawak dutni maiyamwi mai-ihiwarang bitik kau tawan nuhni pas-akat!
15Dawak witingna yaklauwi king yakat nangnitlalana:
—Yangna laih king man ais yulma kidika yamnikna manah bangyangna.
16Kaput laih, king witing ūni kau muih bangdai kidika bitik kalpakwi kalahwi uina, kaunah witing yalni binina balna kidika 10 dawi kalahwi kiuna dai, ūni kidika maintalnin yulni. 17King witing mahka kalahwi kiuna usnit kat witing karak bangkidika muihni balna karak, uiwi minit as wawatna, tawan nuhni kung kau, witni palni kau ū sakkidika yakat. 18Witing yaihnit yakat uina, kalbauyang taninatuna balna dai kidika bitik, kaput bik laih cereteo dawak peleteo king witing palni duwa sakdai kidika kalbauyang, dawak kaput bik laih geteo balna 600 balna Gat kaupak usnit uiwi aina dai kidika witing tanit yakat kalpaparna. 19Kidika minitni yakat king yaklauwi Itai, Gad kaupak dai yakat kalyulna:
—¿Ais yamta man bik yangna karak aiwanamahn? Tanit yamni ki, man nawatta yawama kat king wisam yakarak atnam, kat witni kat man laih tringsar, pama kaupak malaihwi duahaina bahang. 20Damai mani aiwanaman, dawak waradika ¿amput yang lawik mayulkiyah, yangna karak aiwah, dawak yang palni bik amanglatasyang angkat yawayangpa? Tanit yamniki nawatta yawama kat, dawak pa aslah muihni mana balna kidika duta yawama kat. ¡Dawan yaklauwi blis mayamwarang dawak witing mankarak karang ban kaput!
21Itai yaklauwi king yakat nangnitlana:
—Dawan ayangni dawak king man ayangma bik yaktik yultayang, king man kidika angkat sak-awama kat, sangka atnin kidika awaskat daunin karang bik, man dima yamyang muihni adika yakat sakkarang.
22Devid yaklauwi kalyulna:
—Kaput kat yangna karak aiwah.
Kaput laih Itai kidika Devid karak kiuna, muih ahal duwa balna bitik dawak, muih balna witing karak balna kidika bitik. 23Muih bitik laih tapalhni palni kakaida dai. Dawak Cedrón wasni kidika dakyaklalana; kidika usnit kat king kidika dakyaklana, dawak muih bitik laih witing tanit yakat uina kauhmak wanilang tani kiwa kidika yakat. 24Dawak Sadoc bik libait balna kidika bitik karak kalpakwi kiuna, bahang kidika balna laih Papang baksni kidika duwi uina, dawak kaput bik laih Abiatar yaihnit yakat#15.24 Abiatar yaihnit yakat: kaput kapat ulna ki. Hibru kau laih dawak Abiatar yaklau kilwi kiuna. dadana, tawan nuhni kaupak muih balna kidika bitik kalahna usnit kat. 25Kaunah king yaklauwi Sadoc yakat kalyulna:
—Papang baksni kidika watta nawatta tawan nuhni yakat duyawah, Dawan yang ilpki yamna karang kat, yamwak nawattik aiwaki, dawakat kaput laih baksni kidika pāni yakat ban tuskat talki. 26Kaunah witing yamni talasyang yatarang kat, yang witing tingni yakat yang, akat, witing amput yamni talwa yakat yayamna karang.
27Dawak bik, king watwi sumalyang Sadoc yakat kalyulna:
—Talah, man dawak Abiatar karak manna nawatta yawanauh tawan nuhni yakat, manna walamanabis bu kidika karak. Man walamabis Ahimaas, dawak Abiatar laih walanibis Jonatán karak. 28Dawak yang laih kauhmak wanilang langni yakat watki, manna ais yul kalahwa kidika yasihtanama kat.
29Sadoc dawak Abiatar karak watwi Papang baksni kidika nawatwi Jerusalén yakat duwi uina, dawak yakat wawatna. 30Devid witing kilwi kiuna Olib asangni yakat; witing kalpas manah kaidīnah kilwi kiuna, witing tunan mukwi dawi kiuna, dalani wauhwa kidika yulni. Dawak muih balna bitik witing karak kalpakwi uina kidika balna bik tunanina mukwi kaidīnah kilwi uina. 31Dawak Devid yakat kalyuyulna Ahitofel bik Absalón karak kalpakwi witing niningyakat yaklauna kalatwak, Devid witing Dawan kalni dinit yakat bukwi yulna, Ahitofel witing warkni balna kidika dauh yamna atnin.
32Devid, witing asangtuna yakat kilwi yaklana, kidika yakat Papang kau ayangni nuhni yayamwa dai, kidika yakat Husai Devid niningkauh kalahna, bahang witing laih arquita sulani kaupak dai, bahang witing asnina iswi bisna dawi tunan yakat sau uhna dai. 33Devid yaklauwi kalyulna:
—Yang karak aiwama kat, yang truknik tikini as awama; 34kaunah Jerusalén yakat yawama Absalón yakat kalyulma: ‘King adika man dima yamyang adika, man dima yamwarang, muhnilau man papangma dini yamwa dai kapat’, kaput laih Ahitofel yamnin kulwa balna kidika dauh yampamma, 35kat kidika yakat tingmasut lalaihwarang sumalyang balna Sadoc dawak Abiatar karak. Kaput bahang man king ūni yakat ais yul dakaman balna kidika witingna yakat diyulma. 36Witingna walanibis Ahimaas dawak Jonatán balna bik yakat rauki, kaput bahang, aiskat witingna munah ising paktanama, yul balna dakanama kidika bitik.
37Dawak Husai, Devid karak kaltalyang yamni dai kidika, Jerusalén yakat kiuna, bahang kidika minitni yakat Absalón bik Jerusalén tawanni nuhni yakat kiwi kawa dai.
Currently Selected:
2 Samuel 15: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
