2 Kurint 4
4
1Kidika yulni yangna kulnikna bukwas ki, kat Papang yaklau, witing dalani lani duwa kidika yakat, adika warkni yangna tingkina yakat āna. 2Yakasaldinin dini malni kau yamnin dini balna kidika yamtas danayangna; dawak sinskina sirihni karak dawak alas lani karuk bik yamtasyangna Papang yulni kidika. Nawatkauh, yul rahm balna kidika manah yultayangna, dawak aput karak muih balna bitik kulninna yakat āwayangna Papang muhni yakat. 3Dawak yul wisam yamni sumaltayangna kidika asna as kau nandakna kapat laih, didiswa muihni balna niningna yakat manah kapat ki. 4Witingna rahm kukulwas bahang, adika sauni daniwan yaklau witingna sinsnina miniknapa kidika di talwas yammukna, Krais yulni wisam yamni yaringni Papang wayani sangka kidika talwas atninna yulni. 5Yangna alas kalsumaltasyangna, kaunah Jisas Krais Dawan kidika yulni sumaltayangna; yangna laih manna dimana yamyang yangna Jisas yakat dalani talayangna kidika yulni. 6Kat Papang yaklau yaringni yakat kalyulwakat puksani kaupak kalahna kidika,#Gn 1:3. sihm witing yaklau yangna isingna yakat yaringni kidika yanana, muih ūk balna yakat yaringni diana atnikna yulni, Papang alasnina yaksihni Jisas Krais muhni yakat yaringni kidika niningnakatinah.
Rahm kulnin lani munahsangka atnin kidika
7Kaunah adika ritsni laih yangna muihkina yakat dutayangna, kidika laih sihm sau suba kapat ki, kidika parasni nuhni laih Papang kaupak kaiwa dawak yangna kaupak laih awaski. 8Kaput bik, trabil mahni karang bik, alahwinikna tani dis; kulwi kalbaunin mahni dutayangna kaunah isingna abahlwaski. 9Yanauhuiwi, kaunah yanaruhmwi dawas ki; yanatuklalakwi, kaunah yanadaukakalwaski. 10Angkat angkat yawayangna karang bik, yangna muihkina yakat Jisas dauna muihni nuhni kidika laih ban dutayangna, witing sangnika kidika bik yangna yakat lāih atnin yulni. 11Bahang yangna sangka yangna kidika laih, daunin tingni yakat ban kaput yangna Jisas yulni, kaput karak witing sangnika kidika bik yangna muihkina nuhni yakat lāih atnin yulni. 12Kaput karak, daunin lani kidika laih yangna yakat wark yamwi, dawak manna yakat laih sangka atnin lani kidika wark yamwi.
13Ulna yakat aput yulwi: “Rahm kulnin lani dutayang dai, dawak kidika yulni yulbaunayang dai.”#Sal 116:10. Sihm kaput bik, yangna bik, kidika rahm kulnin lani karak, rahm kultayangna dawak bik yulbautayangna. 14Kat yangna amanglatayangna Papang yaklau Dawan Jisas yakat watwi dulauna kidika, mayang yakat bik witing karak maidulauwarang ki, dawak manna karak aslah witing muhni yakat maiduwi kiwarang ki. 15Adika dini balna bitik kalahna manna yamni atnamna kidika yulni, Papang blinisin mahni kidika duta, muih mahni bik tingkih kalana atnamna, Papang alasnina yaksihni yakat.
16Kidika bahang yangna kulnikna bukwas ki. Bahang ahni yakat laih muihbarak kaltayangna karang bik, pasyakat laih ma balna bitik yakat wisamni alahwayangna. 17Yangna sangka yangna akat wauhtayangna kidika laih di as sirihni bayakwi; kaunah alasna yaksihni nuhni as dawak minit bayak ban atnin kidika duaiwi yanawi. 18Kat yangna laih talda dini balna yakat talasyangna, kaunah taldas dini yakat talayangna, kat talda dini kidika laih bayakwi kiunin dini, kaunah taldas dini balna kidika laih ban kaput atnin dini balna ki.
Currently Selected:
2 Kurint 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
