2 Crónicas 3
3
Salomón Papang ūni paknin
(1 Re 6:1-38)
1Salomón mahka Dawan ūni kidika yamna, Jerusalén Moriah asangni yakat, kidika pāni yakat witing papangni Devid yakat lāih kalahna dai Dawan kidika, kidika pāni kidik laih Devid yaklauwi ridi yamna dai, yuldarang kat jebuseo muihni Ornán witing plawar minik unitak yakwa pāni dai yakat. 2Witing king kana kurih arungka laihwi bayakwak waiku bu kawak ma bu yakat mahka ū kidika yamwadai.
3Salomón witing makat yulnin ūni pakna kidika laih nuhni aput dai: naini metro 27 dawak panuhni laih metro tiaskauarungka. 4Makat yulnin ūni muhnit kiwi kawa kau watak pakdai kidika laih naini metro tiaskauarungka duwadai, sihm makat yulnin ūni pirihta kaput, dawak maluihni bik metro tiaskau arungka#3.4 Tiaskau arungka: sarakau ulna balna yakat buas kaput yulwi. Hibru kau laih 54. dai. Salomón yaklauwi, watak kiwi kawa kau pakkidika pasniningkauh kidika gol kau manah yamna dai, 5ūni nuhni palni pasniningkauh kidika laih awas tatni kau manah āna dai minit yakat gol tanit yamni kau kahwi lanadai, dawak pan kuku satni balna kidika āna dawak sīn bik, 6duwak minit yakat kipala minit nuhni duwa balna kau lakwi lana. Witingna gol yus yayamna kidika laih tanit yamni dai. 7Ūni paskau kidika bitik laih gol kau manah āna dai: rabutni nunuhni sau kauh taihwa kidika balna, dūr kiwi kawa kau kidika, itikna balna kidika dūrni putwa balna, dawak itikna kidika yakat di wayani lawani duwa balna kidika yamna dai.
8Dawak Holi Palni Pāni kidika bik yamna dai.#Ex 26:33-34. Naini kidika duwadai metro tiaskauarungka, sihm makatyulnin ūni pirihta kaput, dawak panuhni bik metro tiaskauarungka duwa dai. Kidika usnit kat, gol tanit yamni kidika kau kahwi lanadai, bitik kat kilo 20,000 yus yayamna dai. 9Silak balna kidika laih tikini gramos 550 duwa dai aslah. Dawak makau uptis kidika bik gol kau manah kahwi lanadai.
10Holi palni pāni yakat dipakwak di lawani duyang balna kidika wayani bu yamna dai, dawak kidika balna bik minitna yakat gol kau kahwi lana dai. 11Kidika lawani duduwa balna kidika laih naini metro tiaskauarungka duwadai; kidika aslah naini metro bu minitkau centímetro 25 duwadai, ahni pakkidika daklana yakat uiwi sukdai, dawak nakaskau kidika bik sihm kaput dai, lawani sutni kidika, ūk lawani sutni yakat uiwi sukdai. 12Sihm kaput bik laih, adika lawani duyang ūk kidika bik sihm as kaput dai, lawani sutni kidika daklana yakat uiwi sukdai, dawak sihm kaput bik laih lawani as kidika, lawani duyang ūk lawani yakat uiwi sukdai. 13Adika lawani duyang balna laih, lawanina kidika bitik kat naini metro tiaskauarungka dai, bahang witingna yaklauna raudai, muhnina kidika yuna raudai ahni panuhni papus kau pakkidika yakat.#Ex 25:18-20. 14Dūr rinin asnina balna bik yamna dai#Ex 26:31. asna paisa sa kau, paisa kau, dawak linin asnina kau bik, dawak kidika asnina balna yakat di lawani duyang balna wayanina kidika trit kau ulna dai.
Ū rahni bu kidika
(1 Re 7:15-22)
15Salomón witing ū rahni bu yamna kidika nanaini metro 16 kanin manahdai maluihni, kidika laih makatyulnin ūni kidika ahni niningkauh yakat dini dai. Dawak rahni tunan kau āwa kidika laih metro bu minitkau centímetro 25 dai. 16Dawak sīn bik yamna dai sihm alah kapat,#3.16 Alah kapat: kaput ulna kidika yamni kapat ki. Hibru kau laih yulwi holi palni pani yakat. dawak rahni balna tuna yakat alahna dai, dawak baisa minit yakat granado minik wayani andat as yamwi sīn yakat āna dai. 17Rahni balna kidika makat yulnin ūni ahni niningyakat āna dai, as laih tingpal niningyakat āna, dawak ūk kidika laih wadah niningyakat āna. Tingpal niningkauh rahni āna kidika ayangni pakna Jaquín, dawak wadah niningkauh kidika ayangni laih Boaz pakna dai.
Currently Selected:
2 Crónicas 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998