2 Crónicas 23
23
1Kurih tiaskaubu laihna yakat, Joiada yaklauwi kalbauyang tanituna balna yakat diyulna uina atnin: Jeroham walanbis al Azarías, Johanán walanbis al Ismael, Obed walanbis al Azarías, Adaía walanbis al Maasías dawak Zicri walanbis al Elisafat, dawak witing karak aslah kalpakna atnin. 2Witingna Judá sauni yakat awaihwi tatalwa dai, dawi Judá sauni yakat libait balna bitik ududuhna, dawak Israel yakat papang balna kidika bitik, bahang witingna bitik laih kalpakwi Jerusalén uina. 3Yakat uina balna bitik kidika king karak pramis yayamna aslah kalahnin, bahang kidika laih Papang ūni yakat yayamna dai.
Joiada yaklauwi diyulna: “¡Manna akat dutamana king walanbis al kidika! Witing kuduh king kanin kidika, Dawan yaklauwi pramis yamna dai kaput Devid sulani balna yakat.#2 Sam 7:12. 4Adika manna yamtanama ki: manna sahyakna bās kidika as, sumalyang balna libait balna yakurupdinin mani#23.4 Yakurupdinin mani: kidika laih satadi mani. yakat di yayamwa balna kidika, makatyulnin ūni dūrni yakat main tatalnakarang; 5sahyakna bās ūk kidika laih king ūni yakat bangkarang; dawak sahyakna bās witni kidika laih dūr rahni ukna balna yakat bang karang. Kaput laih, tawan muihni balna bitik kidika makat yulnin ūni watakni balna yakat bang karang. 6Kaunah muih as bik makatyulnin ūni yakat kanin awaski, sumalyang balna dawak libait balna awaskat, kat witingna laih diyayamwa bahang. Witingna manah sipki kanin, kat Papang dini yakna balna bahang; kaunah tawan muihni balna laih yaklauwi maintalwa bangkarang Dawan risnipik kidika yulni. 7Libait balna kidika king yaihnit yakat awaihwi dadakwarang, witingna bitik tingnina yakat kalbaunin dini kidika duduwakarang, dawakat angdika muihni makatyulnin ūnipas yakat kanin yamwarang kat daunakarang. Bahang kaput laih king angkat kiwarang kidika yaihnit yakat karang.”
8Libait balna dawi Judá muihni balna bitik kidika prapit Joiada ais yulna yakat yayamna. Tunan āna balna kidika mahka tunan kakana muih uduhna balna yakat uiwi, yakurupdinin mani yakat maintatalwarang muihni balna kidika, kaput bik maintalwa bangkauna kalalahwa kidika balna, sumalyang Joiada yaklauwi dipakna dai bahang uinin-awas. 9Kaput laih Joiada yaklauwi langsa balna kidika diana kalbauyang muihni balna taninatuna balna yakat, dawak nanitna daknin satni balna Devid duwa dai kidika balna, dawak kidika dini balna laih Papang ūni yakat bangdai. 10Usnit kat, muih balna bitik kidika dūrni kawa yakat uduhwadai, makatyulnin ūni tingnipal niningkaupak wadahni niningyakat, dawak sakripais busnin pāni yaihnit awaih yakat, witingna bitik tingnina yakat langsa duwabangdai, king tanit daknin yulni. 11Kaput laih Joiada dawi walanbis balna karak kalpakwi king walanbis kidika yayakna, dawi kraunni papakna, dawak king sainni ūk balna bik papakna, dawak minit yakat dia utuhwi dawi king ahana. Kidika usnit kat muih bitik sarahwi yuyulwa dai: “¡King sangkaki!”
12Atalía witing muih balna sarahwi kiri king yuyulwak dakana, bahang Dawan ūni yakat kiwi talna, muih bitik bangdai yakat. 13Kidika yakat king kidika talna dai dūr kiwi kawa kau kalparna bangkidika yaihnit yakat. Yaihnit yakat bangdai tunan muihni balna dawak unbaunin kat paswi yakisdinin muihni balna kidika bik, dawak muih balna kidika alasna manah dai trumpit bik pupuhna; unbauyang balna kidika laih paswi yakisdinin dini balna kau, ayangni nuhni yamnin kidika unbabauna. Kaput laih Atalía parakni iswi biswi sarahna:
—¡Kidika laih alas! ¡Kidika laih alas!
14Sumalyang Joiada yaklauwi pakwak kalbauyang balna taninatuna balna kidika kalalahna, witingna kidika kalbauyang balna kidika tunan duwa bangdai bahang, dawak diyulna:
—¡Kalparna bangkidika kaupak yaktanauh, dawak angdika muihni kat usnit uiwak dinimak kuhbil atanauh!
Kat sumalyang kidika yaklauwi yulna dai bahang Dawan ūni yakat laih inin awas, 15laihwi yayakna aras kau kilwi kalbauyang balna dūrnina munah king ūni yakat, dawak kidika yakat ihina.
16Kidika usnit, Joiada yaklauwi pramis yamna tawan muihni balna dawak king karak bik, kidika laih witingna kidik Dawan tawanni balna atnin. 17Kidika usnit kat Baal kau minitna yuyulwa ūni yakat uiwi wayani sakdai kidika bitik laih tuklalakna, sakripais busnin pāni wiswi babahna dawak daniwan dauh kidika bik. Dawak Baal sumalniyang Matán laih, dinimak dadakna dai sakripais busnin pāni balna muhnit yakat. 18Kidika usnit kat Joiada yaklauwi Dawan ūni main talnin muihni balna āna dai, sumalyang balna dawak libait balna tingnina dinit yakat main talnin, kidika balna kuduh Devid yaklauwi warknina yamnin sahyakwi āna dai kidika, makatyulnin ūni yakat sakripais karauni kauna Dawan yakat buswi kalana atnin, Moses lāni yakat ulna kaput, dawak alasna unbaunin, Devid yaklauwi yamnin yulna dai kaput. 19Kaput bik laih Dawan ūni dūrni yakat maintalnin āna dai, kaput laih muih as kat bik maisihni likkauna kanin awas. 20Kidika usnit kat kalbauyang balna tanituna balna kidika duwi, dawak muih nunuhni dikulna balna kidika bik, tawan kabamintni balna, dawak muih balna bitik, dawak king kidika Dawan ūni kaupak kalpakwi duwi uina king ūni kat, dūrni nuhni kidika munah kakana dai. Usnit kat king kidika king yalahwa tronni yakat ihilna, 21dawak tawan muihni bitik alasna duduna. Dawakat Atalía kidika isparah kau dauna bahang muih balna kidika bitik laih isningnalak dana dai.
Currently Selected:
2 Crónicas 23: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
