2 Crónicas 22
22
Ocozías king kana
(2 Re 8:25-29)
1Jerusalén muihni balna kidika Joram pāni yakat, walanbis bin kauh Ocozías kidika king ahana dai, kat di malyang balna kidika árabe balna karak kalpakwi, ū lababanni balna yakat uiwi kakana dai, dawak Joram Judá kingni walanibis bararakni balna kidika bitik ihina dai. Kaput laih Joram walanibis Ocozías kidika Judá kingni kana dai. 2Witing king kana, kurih 22#22.2 22: Tingkau ulna yakat laih kaput yulwi, grik dawak 2 Re 8:26 yakat bik. Hibru kau laih yulwi 42. duwa kat, dawak Jerusalén yakat kurih as king kana dai. Witing nanangni ayangni laih Atalía, bahang witing laih Omri sulani dai. 3-4Dawak Ocozías bik Acab usnit uina dai, kat nanangni bik yul dutni sumalwadai bahang, dawakat witing kidika Acab ūni pas muihni balna kidika kalwanaih kidika yulni witingna aslah bahang, witing di yamwa kidika dutni manah dai Dawan minikpa yakat. Witing papangni dauna usnit kat witingna kidika yul sumamalwadai, kaput bahang dutni yakat kalduwi uina.
5Witing yulni dakawa kidika bahang, Ocozías kidika Acab walanbis Joram Israel kingni kidika karak aslah kalalahna dai, Siria kingni Hazael Galaad sauni kau tawan nuhni Ramot yakat sakkidika niningyakat kalbauna atnin yulni. Kaunah Siria muihni balna yaklauwi Joram yakat tutusna dai, 6dawakat witing laih Jezreel yakat nawatwi kiuna, Ramot kau, Siria kingni Hazael niningyakat kalbauwak tutusna pilauni kidika yamni kalahna atnin yulni. Kaput laih Joram kidika siknis tusbahang, Ocozías kidika Jezreel yakat kiuna dai kaltalna atnin.
Jehú yaklauwi Ocozías yakat īna
(2 Re 9:27-29)
7Papang kaput kulna dai, Ocozías kidika Joram yakat kiwi talwalikkauna dauna atnin. Kiwi kawa minitni yakat Joram karak kalahwi uiwa, Nimsi walanbis al Jehú karak kalpakna atnin yulni. Kaunah Papang yaklauwi Jehú kidika walwi yakna dai, witing yaklauwi Acab sulani bitik iwi disyamna atnin. 8Jehú kidika, Acab sulani balna niningna yakat lanina yamwa sakkauna, Judá tanituna balna dawak Ocozías wanaihni balna karak bik kalpakwadai, bahang kidika balna laih witing dini yayamwa dai, dawak kidika bitik imukna. 9Ocozías yakat bik walnin sihna dai, bahang witing kidika Samaria yakat yakmaldana sakdai, dawakat laihwi Jehú yakat duwi uiwak ipamna. Kaunah nununa, kat Josafat walanbis dai bahang, dawak witing kidika bik Dawan yakat walna dai. Kaput laih Ocozías wanaihni as bik disdai, sip atnin kingni lani kidika laihwi duna atnin.
Atalia yaklauwi king trunni kidikalaihwi dakyakwi duwi
(2 Re 11:1-21)
10Ocozías nanangni Atalía kidika, dakana walanbis dauna kidika, dawak kiwi Judá king sulani balna kidika bitik imukna. 11Kaunah king Joram walanbis yal Josaba kidika yaklauwi pirini lana dai, Ocozías walanbis al Joás kidika, yal maintalwa yakarak, king walanbis as balna kidika iwasakkat, Atalía kaupak malpamna, payayahwa pāni as kau. Kaput laih ihiwas dana. Kidika kuduh Josaba yamwa dai, Joram walanbis yal, Ocozías wirahni yal, dawak sumalyang Joiada yalni dai kidika. 12Dawak Joás kidika yayal balna karak yakmaldana dai Dawan ūni yakat. Bahang kaput laih Atalía witing kidika sauni yakat king kana.
Currently Selected:
2 Crónicas 22: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
