2 Crónicas 20
20
Moab dawak Amón kidika balna yakatminitbayakna
1Ma as as bayakwak usnit kat, moabita dawak Amonita balna kidika meunitas#20.1 Meunitas: grik kau ulna kidika kaput yulwi. Hibru kau laih yulwi amonitas. karak aslah kalpakwi Josafat niningyakat kalbabauna; 2kaput muih as as uiwi kalyulna: “¡Edom#20.2 Edom: kidika mani yakat kaput dai. Hibru kau laih yulwi Siria. kaupak kidika laih kuma dauna nakasyakau kalbauyang muihni balna mahni aiwi man namangyakat!” (Hazezon-tamar, kidika laih sihm ki En-gadi.)
3Josafat yamaduna, bahang Dawan yakat kalwalna. Kaput laih Judá muihni bitik yakat isningnapakna di kaswas yuh wauhnin, 4dawakat Judá muihni balna kidika kalududuhna Dawan yakat ilp yulnin. Judá tawanni nunuhni balna kaupak muih uina dai. 5Josafat, witing Judá tawanni balna kaluduhna sakkidika Jerusalén yakat, kidika pasyakat yaklauna, Dawan ūni watakni muhnit yakat, 6dawi sarahwi yulna: “Dawan, muihkinabararak balna Papangni, ¡man laih makau kisang kidika Papangniman, dawak nisan balna bitik kidika kabamintni man! ¡Man tingma yakat sakki parasni kidika dawak sip atnin kidika bik: muih as bik sip man namangyakat yaklauwas ki! 7Yangna Papangkina, man lawa tawanma Israel muhni kaupak adika sauni muihni balna kidika ruhmta yaknaman dawak Abraham sulani balna yakat ban kaput atnin dianaman, man karak kaltalyang yamni kidika.#Is 41:8; Jm 2:23. 8Adika sauni akat kawi duduna usnitkat, man ūma as papakna, dawi yuyulna: 9‘Di dutni as maniking akat kaiwarangkat, wah as kapat, war karangpa, siknis, yuh, kaput karangkat adika ūma muhnit akat aiwanaki, kat man laih adika makatyulnin ūni akat sakman bahang yangna kulnikna kaida kidika yulni man yakat ilp yultanaki, dawak man daka yanalaihta yakma.’ 10Kaput bahang, akat bangki amonita, moabita dawi Seir asangnipas muihni balna bik bangki, man kidika sauni balna yakat Israel walanbis balna Egipto kaupak aiwa kidika kanin dukih mawas,#Dt 2:4-19. nawatkauh laih kidika balna kaupak naikau kalalahna, dawak iwi dis yayamwas dai. 11Kidika minit warmani yangna nikingna yakat kalbabauwi man sauma adika kaupak yanayaknin yulni, sau yangna dikina yananaman kidika kaupak. 12Papang, ¿man lawa wah diatas awamayah? Kat yangna laih paraskina nuhni dutasyangna, kidika kalbauyang muihni balna mahni niningna kau yanakalbauna aiwa kidika niningna yakat lawinikna. ¡Yangna amanglatas yangna ais yamniknapa; kaput bahang yangna miknapa kidika man yakat matalayangna!”
13Judá muihni balna bitik kidika Dawan muhni yakat yaklauna bahang dai, yulnina balna dawak walaninabis bala bitik, walaninabis dibinina kidika bitik duwi uina dai. 14Dawakat tawan muihni bitik kaluduhna bangkat, Jahaziel laih Zacarías walanbis dawak Benaía mani, dawak Benaía kidika laih Jeiel walanbis al dawak Matanías mani dai, dawak libait as Asaf sulani kaupak kat Dawan spiritni kallaihna 15dawakat yulna: “Yamni dakanauh, Judá muihni balna dawak Jerusalén muihni mana bik, dawak man, king Josafat. Dawan yaklauwi manayulwi: ‘Muihsak dadauwinih dawak bik yamaduduwinih kidika kalbauyang balna mahni kidika niningyakat, kat adika kalbaunin laih manna wārmana awaski kaunah Papang wārni. 16Yahan mani lakyawa kalbautanauh. Sis sauni lau kidika munah kilwi aiwi, dawak manna laih waskung nakas yakauh yakat kalpaktanama, kidika laih Jeruel kauhnimak wanilang kidika muhnit yakat ki. 17Adika wārni laih manna kalbautas awanama ki. Manna kalbaunin pāni duta kus bang-awanama, dawak talnama Dawan yaklauwi amput manalaihwi yakwarang kidika. ¡Jerusalén muihni balna dawak Judá muihni balna manna yamaduduwinih dawak muihsak bik dadauwinih; yahan mani witingna niningna yakat yawanauh, kat Dawan laih manna karak bahang!’ ”#Dt 20:1-4.
18Kaput laih Josafat limbabahwi abukwi muhni kidika sau kat lakna dawak Judá muihni balna, kaput bik Jerusalén muihni balna bik abubukna Dawan ayangni nuhni yamnin yulni. 19Dawakat Coat sulani libait balna dawi Coré sulani bala kidika bik yulnina parasni sarahwi Dawan, Israel Papangni yak ayangni dulalauna dai.
20Kidika payahwakat mapiris palni yaklalauna Tecoa kauhnimak wanilang nining yakat lapakna atnin. Bahang mahka kalahwi uiwa yakat, Josafat witing yaklauna diyulna: “Yadakanauh, Jerusalén dawak Judá muihni balna bik: manna Damanawan Papang yakat yamni kalkultanauh, bahang kaput laih rahm yamni muih as bik dutni manayamwas kaldakanama; pranipit balna yakat bik kulnamna āta dutanauh, kaput laih di bitik yamni kalahna karang.”
21Tawan karak yulbauwi dakana usnit kat, unbauyang balna buas āna, kaput laih witingna kidika asna Papang dini yakna balna kidika kau kawi kalbauyang balna taninatuna yakat yaklawi uiwi Dawan ayangni nuhni yamwi unbauwinah uinin aput: “Dawan yakat tingki kalatanauh, kat witing dalani kidika laih ban kaput bahang”#2 Cr 5:13; 7:3; 16:34,41; Esd 3:11; Sal 100:5; 106:1; 107:1; 118:1; 136:1; Jr 33:11.
22Usnitkat, witingna unbaunin alasna as unbabauwak, Dawan yaklauwi kulninna pini manah yammukna#20.22 Kulninna pini manah yammukna: kaput ulna kidika yamni kapat ki. Hibru kau laih yulwi isningna aiwas kat dikalbabauna. dai amonita, moabita dawak Seir asangnipas muihni balna bik, bahang kidika balna laih Judá niningyakat kalbauna aina dai, kaunah witingna sip-awas kakalna dai. 23Amonita dawi Moabita balna karak yaklauwi Seir asangnipas muihni balna niningna yakat kalbabauna bahang bitik laih iwi disyayamna, dawak usnit kat witingna biri biri kaliwi dislalana. 24Judá ahalni balna kidika pāni yakat uina kat, kidika yakaupak kauhmak wanilang kidika lāih ki, bahang waihninala balna yakat tatalna, witingna kidika bitik laih dauwi sau yakat manah bubukna dai. ¡Muih as bik sip kiri yaklawas dai! 25Kaput laih Josafat dawak witing muihni balna pāni yakat uiwi waihninala balna dinina dadana kidika duduna, kaput laih witingna turuh satni balna mahni, kalbaunin dini, asna balna#20.25 Asna balna: sarakau ulna yakat kaput yulwi. Hibru kau laih yulwi muih dadauna muihnina. dawak di minit nuhni balna kidika bitik laih duduna dai. Di mahni dai bahang sip witingna bitik duwi uiwas dai. Di mahni palni dai, bahang ma bās witingna ananana dai.
26Ma arungka laihwa yakat witingna Beraca sauni langni yakat kalududuhna, dawak kidika yakat Dawan yaka ayangni nuhni yayamna dai. Kidika bahang, kidik pāni ayangni papakna Beraca,#20.26 Hibru kau laih, Beraca tanka laih blisin. kidika ayangni warmani kat ban duwi. 27Kidika usnit kat, Judá dawak Jerusalén ahalni balna bitik, Josafat kidika tatuna yakat, witingna nawatwi isningnalak Jerusalén yakat uina, kat Dawan yaklauwi kaput alasna diana dai bahang, waihninala balna munah. 28Jerusalén yakat uina kat, Dawan ūni yakat uiwi kakana, pasnin dini balna paswi dawak trumpit bik puhwi.
29Witingna amanglalana Dawan yaklauwi kalbauna dai kidika Israel balna waihninala nining yakat, kaput laih nisan balna ūk kidika Papang yakat yamaniduduna dai. 30Kaput laih Josafat king kana kidika yamni manah dai, kat Papang yaklauwi kulnin aslah lani kidika kalana dai bahang yaihnitkau muihni balna karak.
Josafat king kana yulni bitik libitwiparahni ulna kidika
(1 Re 22:41-50)
31Kaput laih Josafat kidika Judá minit yakat king kana dai. Witing kurih 35 laihna kat king kana dai, dawak Jerusalén yakat kurih 25 king kana dai. Witing nanangni ayangni laih Azuba, dawakat Azuba laih Silhi walanbis yal dai.
32Josafat laih witing barangni dai, sihm papangni Asa yamna dai kapat. Witing di yamna balna kidika Dawan minikpa yakat barangni dai. 33Kaput kaunah, Papang kulwas balna makatyulnin ūni duduwa kidika yakmukwas dai, kat tawan muihni balna kidika barangni awasdai bahang, witingna muihnina bararak balna Papangnina yakat usnit uinin.
34Yulni umani balna ūk kidika, tatuna kaupak witni kat kidika laih Hanani walanbis al Jehú yulni ulna balna yakat ulna bangki, dawi kidika laih yakat ahana bangki Israel kingni balna yulnina uhulna yakat.
35Kidika usnit yak, Judá kingni Josafat kidika, Israel kingni Ocozías karak aslah kalpapakna, kaunah witing laih dutni manah yamwadai. 36Witing karak aslah kalahwi kuma kuring yamna Tarsis yakat kiuna atnin yulni, bahang kidika balna yamna kidika laih Ezión-geber yakat yayamna dai. 37Kaput laih Maresa kaupak kidika, Eliezer, Dodava walanbis al kidika, Josafat niningkauh adika yulni baisa kaikalahwas kidika yulna: “Dawan yaklauwi bahwi bikisni yamwarang ki man di yamnaman kidika, Ocozías karak aslah alahwanama kidika yulni.” Dawak rahm kaput laih, kumakuring kidika sahyamna dai, bahang witingna sip Tarsis yakat uiwas dana.
Currently Selected:
2 Crónicas 20: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
