2 Crónicas 19
19
Prapit Jehú yaklauwi Josafat yakat bilna
1Judá kingni Josafat kidika yamni sangka nawatwi kiuna ūni kau Jerusalén yakat. 2Kaunah Hanani walanbis al prapit Jehú yaklauwi, king yakat kalahwi kalpakwi kalyulwi dakana: “¿Ais yamta muih dutni yakat ilp kalataman, man laih Dawan waihnila balna kidika karak yamni kalpaktamanah? Kidika yulni laih Dawan kulnin daukalna man karak. 3Kaput kaunah di as as kidika yamni ki man namangyak, kat Asera wayani balna dai kidika bitik bahyamnaman bahang adika sauni akat bangdai kidika, dawak man Papang yakat walnaman.”
Josafat yaklauwi wihta balna āna
4Josafat kidika Jerusalén yakat yalahwadai, kaunah witing niningh tawanni balna yakat awaihwi talwadai, Beerseba kaupak Efraín asangnipas balna kat, watwi Dawan yakat wiryaklana atninna yulni, witingna muihnina bararak balna Papangnina yakat. 5Kidika minit yakat Judá kau tawan nunuhni pararasni balna bitik yakat wihta balna āna dai. 6Dawak wihta balna yakat diyulna: “Manna yamtanama kidika yakat yamni talnama, kat muih al ayangni kau duta la yamtas awanama bahang, kaunah Dawan ayangni kau duta lā yamtanama bahang, manna muih lani yamtanama yakat witing manna karak karang. 7Kaput bahang Dawan yakat rispik kalatanauh, dawak man yamta kidika amungtalnauh, kat Dawan mayang maPapangki kidika laih lā awas kidika karak kiwas bahang dawak muih yakat talwas ki dawak muih yaklauwi pakwak bik yamwas bahang.”#Dt 10:17.
8Kaput bik Josafat yaklauwi Jerusalén yakat libait buas āna bangdai, sumalyang balna dawak Israel kau papang balna bik āwi dana dai, wihta atnin Jerusalén kidika muihni balna.#19.8 Kidika muihni balna: sarakau ulna kidika kaput yulwi: dawak nawatwi uina kidika. 9Amput yamnin kidika lani balna diana: “Manna Dawan risnipik kat yamnamna ki, barangni atnin kulnin yamni alas yulwas atnin. 10Kalbilnin satni balna manna pa aslah mana muihni balna kidika duahaiwarang kat, tawan nunuhni balna kidika kaupak, manna lawa lani yamna atnamna, muih as dauna kat muih yaklauwi īna pa, kidika awaskat kaput awas pa, dawak lā satni balna kidika duwi lani kidika yamna atnin, diyultanauh dutni yamnin awaski Dawan niningyakat, dawak witing manna namangna yakat dawak bik witingna niningna yakat kulnin daukalnin-awas yulni. Manna aput yamtanauh, bahang pātni kidika laih manna yakat awas karang. 11Sumalyang nuhni Amarías kidika, tamanatuna karang Papang kau ayangni nuhni yamnin warkni balna kidika, dawak Ismael walanbis al Zebadías dawak Judá sulani balna tanituna, kidika laih sau lani kidika yayamwarang; dawak libait balna laih manna tingmanasut lalaihwarang. ¡Kulnamna dulautanauh, wark kalahnin! ¡Yamni yamwarang kidika laih Dawan kidika witing karak karang!”
Currently Selected:
2 Crónicas 19: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
