1 Samuel 1
1
Papang yaklauwi Ana yakat walanibis al as kalawi
1Efraín asangni balna yakat pa as ayangni Ramá, kidika yakat muih al as yalahwadai, kidika laih Zuf sulani dai, bahang witing ayangni laih Elcana: Witing laih Jeroham walanibis dai dawak Eliú mani dai. Witing buhni laih Tohu, Zuf walanibis dai, bahang witing laih Efraín sulani paskaupak dai. 2Elcana laih yayal bu duwa dai. As laih ayangni Ana, dawak ūk kidika laih Penina. Penina laih walabis duwadai, kaunah Ana laih walabis disdai. 3Kurih balna kaiwa bitik yakat Elcana kidika tawanni kaupak kalahwi Silo yakat kiwi prias yamwadai dawak sakripais bik yamwadai Dawan parasni bitik duwayak. Kidika yakat sumalyang Elí walanibis ahal bu tuludai, ayangnina laih Ofni dawak Finees, witingna bik Dawan sumalniyang balna dai.
4Elcana kidika sakripais yamwa mani kat Penina yakat bik kalawadai walanibis ahal dawak walanibis yayal kidika balna dinina, 5kaunah Ana yakat laih tanit yamni kidi kalawadai, kat uba palni dalani kaltalwadai bahang, Dawan yaklauwi walabis kalawas danadai kaunah. 6Kidika bahang Penina witing niningkauh yaklauwa muihni kidika, uswi sarahni kalyulwadai witing yakat, sau yakat kallakwadai Dawan yaklauwi walabis yaknin awas kalyamna dai kidika yulni.
7Kurih kaiwa bitik yakat, Dawan ūni yakat uiwa mani kat, Penina yaklauwi aput yamwi uswadai; kidika yulni Ana kidika kaidadai dawak di bik kaswasdai. 8Kaput laih witing alni Elcana yaklauwi kalyulwadai: “Ana, ¿ais yamta aidamahn? ¿Ais yulni kulnam bukwak di kastasmahn? ¿Man namang yakat walabis salap kidika karak dawak yang kauh tanit awasyang?”
9Wat as kat Silo yakat raukat, di kakaswak usnit kat Ana kidika yaklauna. Sumalyang Elí kidika sinini nuhni yakat yalahna sakdai, Dawan ūni dūrni kung yakat. 10Dawak Ana witing kaidi sangnika kidika tapalhni manah kalbangna dai dawak Dawan yakat minit yulna 11dawak adika pranimis kalyamna dai: “Dawan parasma bitik dutaman kidika: Man dima yamyang yal kulnin bukna adika yamni talma karang kat dawak yang akat ismangkatta walabis al as yama karangkat, yang lawik paktingkat sangnika bitik yakat man dima yamwarang, bahang kidika sainni laih basni kidika dakwas karang.”#Nm 6:5.
12Ana kidika Dawan muhni yakat nai minityulwa sakdai bahang, Elí yaklauwi tinpas yakat talna dai; 13kaunah witing kulnin dinitkau manah minityulna dai. Dinit yulwa kidika dakawas dai; kungnimak manah yamwadai. Kaput laih Elí kulna wasak dauna sakki, 14dawak kalyulna:
—¿Mampat kat wasak dauna sak awamayah? ¡Wain kidika uman datah!
15—Kaput awaski yang dakiwan —Ana yaklauwi nangnitlana—. Yang wain ditasyang, dawak dinin dini pararasni kidika bik ditasyang, kaunah nawatkauh laih kulnik kidika kaidi bahang Dawan muhni yakat kidika bitik yaktayang. 16Man kulwinih yang adika yal as dutniyang, kaunah adika mani balna bitik akat mikit yulnayang kat uba palni kulnik bukna kidika yulni.
17Kulnam aslah alahyawah —Kaput kalyulna dai Elí yaklau—, dawak Israel Papangni kidika yaklau mawarang ais kalyulnaman dini kidika.
18Yal kidika yaklau nangnitlana:
—Tingkih palnih.
Kidika usnit kat Ana nawatwi kaina dai angkut kaina dai kat yakut dawi kiwi dikasna dai, dawak kidika kaupak watwi laih kulnin bukwasdai. 19Kidika payahwak mapiris puk kau yaklalauna dai dawak Dawan yakat minitna yulwi usnit kat ūnina yakat nawatwi uina dai Ramá yakat. Kidika usnit kat Elcana witing yalni Ana karak watwi kallibibitna dai, dawak Dawan yaklau dakana dai ais kalyulna dai kidika. 20Kaput dawak Ana witing muih karuk dana dai, dawak muihbin dunin mani kiukana mani kat muihbin al bin as duna dai dawak kidika ayangni laih Samuel#1.20 Hibru kau laih Samuel kidika yulni laih sihm yulwi dunin, atwa kidika kapat yaihnit yulwi. pakna dai, kat Dawan yakat kalyulwi pramis yamna dai kidika yulni.
21Kidika usnit kat Elcana laih wanaihni balna bitik kau duwi kiunadai silo yakat, witing pranimis yakat yamni atnin yulni dawak sakripais bik as yamwa atnin yulni kurih as pasyakat; 22kaunah Ana laih kiwas danadai, kat pāt alni yakat kalyulna dai bahang:
—Angkat mani muih bin adika ta dakki kat yawakiki. Kaput laih Dawan yakat kalakiki dawak kaput laih yakat barang watwarang.
23Alni Elcana yaklau nangnitlana:
—Angdika kauh yamni kapat talaman kidika yamtah. Bahang wattah angdika mani kat ta dakma mani kat. Dawak Dawan yaklau pramamis kat yamwarang.
Kaput laih muih yal kidika watnadai dawi walanibis kidika ta dakyakpamwi kat muhna dai.
24Dawak ta dakyakpamna mani kat, dawak bik witing kidika baisa muihbin yakauna bik mahka laih Silo kau Dawan ūni yakat duwi kiuna dai. Kidika yakat dukiuna dai turuh ahalmuk wawahma bas, plawar minik batal 22, dawak di unitak kau wain wasni puna kidika bik as. 25Bahang kaput laih turuh almuk as sakripais yamwi dawi muihbin kidika Elí yakat niningkakana dai. 26Dawak Ana yaklawi kalyulna dai:
—Yang dakiwan, dutki datang diswang, rahm man sangka man kapat, yang kuduh yal as akat Dawan kau minit yulwa sakdai kidika man yaihmat yakat. 27Adika muihnibin adika Dawan kau kalyulnayang dai yana atnin, dawak witing yaklauwi yana. 28Yang nikingkauh laih Dawan tingni yakat atik danayang, dawak witing sangka karang mani yakat witing dini yamwarang.
Dawak Elí limbabahwi sau kat abukni kiubukna, Dawan muhni yakat.
Currently Selected:
1 Samuel 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998