Rut 4
4
Booz dawi Rut karak kalduduna
1Ma ūk kat, Booz kiwi yalahna dai tawan kiwi kawa yakat, kidika pāni yakat muih kalududuhwadai. Kidika minitni yakat kiwi bayakna dai wanaihni dai kidika. Dawak Booz yaklauwi kalyulna:
—Akat aiwa yalahda.
Kaput laih wanaihni dai kidika kiwi yalahna. 2Usnit kat Booz yaklauwi muihbararak salap yulwi dukiuna, dawak diyulna witingna karak yalahna atnin. Kaput laih witingna yalah dadawakat, 3Booz yaklauwi wanaihni yakat kalyulna:
—Noemí, Moab kaupak nawatwi kaina, bahang mayang mawanaihki Elimelec sauni dai kidika bakanpamnin kulwi. 4Dukih yawi amanglanam, kaput man bakannin kultaman kat, waradika yamtah witnis balna muhnina yakat. Kat man laih Elimelec wanaihni ulis man bahang, rahmma dutaman sauni kidika bakannin. Kaunah man bakantasman kat isingpaktah, kat man kaupak usnit yakat laih yang rahmki dutayang bakannik.
Wanaihni kidika yaklauwi nangnitlana:
—Bakanki ki.
5Booz yaklauwi adika lāih kalyulna:
—Amanglanamki, Noemí sauni kidika bakannam kat, Rut karak kaldunamna ki, Moab kaupak yal tingmak kidika, kaput laih sau kidika muih dauna ayangni yak ban dunin.
6Kidika dakawi wanaihni dai kidika yulna:
—Kaput kat sip awasyang bakanna atnik, kat diki pahni kidika sip dutni alahwinik. Man bakannin kultaman kat bakantah; yang rahmki kidika man yakat matayang.
7Kidika mani balna yakat lā as duduwadai Israel balna: witing rahmni kidika wanaihni yakat tilahwakat, kidika awaskat di bakanin as barangni putwakat, rahmni kalawa muih kidika, kidika awaskat wauhwi bakanwa muihni kidika susni as dakyakwadai, dawi asyakat kalawadai. Kidika lani duduwa yakarak 8Booz wanaihni kidika susni as yakwi Booz yakat kalawi aput kalyulna:
—Man bakantah.#Dt 25:7-10.
9Kaput dawak Booz yaklauwi diyulna muihbararak balna dawak yaihnit kau muih balna bangyakat bik:
—Manna bitik witnis mana, Noemí kaupak bakantayang, Elimelec, Quelión dawak Mahlón balna dinina dai kidika. 10Dawak bik witnis mana, Rut adika yang yalki dutayang, Moab yal as tingmak adika, kaput laih, adika di balna Mahlón ayangni yakat atnin, witing alni dauna kidika. Kaput laih Mahlón ayangni kidika uswiyakna awaskarang, dawak bik dinitkahwas karang adika tawanni#Dt 25:5-6. kaupak. Warmani manna witnis.
11Muihbararak balna dawak, yakat muih bangkidika bitik yuyulna:
—Witnis mayang. ¡Dawan yaklauwi yamwarang, yal ūma yakat kawarang kidika laih Raquel dawak Lea kapat karang, Israel balna bitik kidika sulani mayang!#Gn 29:31. Dawak man al as ayangma nuhni karang, Efrata yakat, Betlehem yakat al as yamni. 12Dawan yaklauwi walamabis mahni manakarang adika yalni kaupak. Wanaihma mahni duma Fares dai kapat Tamar walanibis, dawak Judá.#Gn 38:27-30.
13Kaput laih Booz kidika Rut karak kalduduna dai. Dawak yal kidika karak kalpapakna dai, dawak Dawan yaklau kalawakat muih karuk dawi walabis as dunin dai.
14Kaput laih yayal balna kidika Noemí yakat kalyuyulwadai:
—¡Dawan ayangni nuhni yamna karang, warmani māma as mana mainmatalna atnin! ¡Māma kidika Israel pasyakat ayangni nuhni karang! 15Witing yaklauwi kulnam dulauwarang, muihbarak kaltang witing malaihna karang, dawak man namang yakat walamabis tiaskaubu minitkau kaput ki.
16Noemí muihbin kidika duwi barahnimak minit yakat ilna; witing duna muhna atnin. 17Uni yaihnitkau yayal balna kidika talwi kalyuyulwadai:
—¡Noemí walanibis as batahnna!
Ayangni papakna Obed. Adika laih Isaí papangni kalna, dawak Devid kukungni.
Devid tanitkauh muihni balna
18Fares sulani balna laih adika balna: Fares laih Hezrón papangni, 19Hezrón laih Ram papangni, dawak Ram laih Aminadab papangni, 20Aminadab laih Naasón papangni, dawak Naasón laih Salmón papangni. 21Salmón laih Booz papangni, dawak Booz laih Obed papangni, 22Obed laih Isaí papangni, dawak Isaí laih Devid#1 Cr 2:10-14; Mt 1:3-6. papangni.
Currently Selected:
Rut 4: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998