1 Timoti 6
6
1Muih dinina yamyang balna kakalna kidika laih, daninawan balna yakat rispik dikulna atninna ki, Papang ayangni daukalnin awas dawak yangna sumalnayangna kidika yulni bik. 2Dawak muih balna buas daninawan kidika kulyang balna kat, rispik diyayamwa kidika daninna awaski rahm kulnin lani yakat wirahnina kidika yulni. Nawatkauh, baisa yamni dini yamninna ki, kat witingna warknina yamni duduwa balna kidika laih kulyang balna dawak dalani muihni balna bahang.
Rahm palni ritsni kidika
Adika sumaltah: 3Muih as witing kulnin lani balna taldas kidika sumalwarang kat dawak Madakiwan sumalna yulni yamni kidika karak dawak masutski sumalwa kidika karak bik kapat awas karang kat, 4kidika muihni laih witing manah kapat kaldakayang as di amanglawas ki. Witing yakat bilnin kidika laih sihm siknis as kapat ki; dawak kidika kaupak tumnin lani balna, sahwi kalahnin lani balna, dutni yamnin lani balna, yamni kalkulwas atnin lani balna 5dawak kalbaunin lani balna saran dis muih sinsni daukalna dawak di rahm amanglawas kidika pasyakat, dawak suts kidika laih sihm rits tani as kapat kulwa kidika.#6.5 Tingkau ulna balna buas kidika laih aput minitlalakwi: witingna kaupak naikau alahwah. 6Dawak lāih ki suts kidika laih rahm rits nuhni as tani kidika, kaunah angdika muihni ais duwa kidika karak isninglak kaldakawa kidika manah. 7Kat adika sauni akat di as bik duaidasdai, dawak di as bik dumawas karang ki;#Job 1:21; Sal 49:17; Ec 5:15. 8kasnin dini dawak mahawinin dini dudakat, maisinglak kaldakanin ki. 9Wirlawakat, angdika muihni balna duyang kaldang atwa kidika laih wauhnin kidika minitbayayakwaski, dawak laihnin dini yakat bubukwi dutni dukih diawa kidika dawak daukalnin balna yakat bik, muih balna kidika yakat daukalnin dawak pāt yakat bik ditaihwa kidika. 10Kat lalah yakat dalani talnin kidika laih di dudutni satni balna bitik riknina;#Hib 13:5. dawak muih balna buas buas, sahwi kalahnin lani yulni, rahm kulnin lani tani kaupak naikau kalalahna dawak witingna sangninaka kidika laih wauhnin dini balna manah babangna.
Rahm kulnin lani kaukalbaunin yamni kidika
11Kaunah man Papang alni, adika dini balna bitik kaupak irah. Sangnika as barangni, minikun talnin, rahm kulnin lani, dalani talnin lani, wauhnin balna yakat parasni atnin dawak ismang yakat buknin lani bik dutah. 12Rahm kulnin lani kalbaunin yamni kidika kalbautah; sangmaka ban kaput atnin kidika datangkat disnin awaski, bahang kidika yulni Papang yaklau mayulwakat aiwanaman dawak kidika yulni bik man rahm kulnin lani dutaman kidika lāih yaknaman witnis balna mahni muhnina yakat. 13Waralaih, Papang muhni yakat, witing yaklauwi di balna bitik kau sangninaka diawa kidika, dawak Jisas Krais muhni yakat bik, witing bik yul yamni yulwi yakna kidika dawak witnis bik yulna kidika Pailat#Jn 18:37. muhni yakat, yamnin mayultayang 14kidika kat daka yamtah, di as bik wirlatas, di as bik yulni mabiltas atnik. Dawak kaput yamtah Madakiwan Jisas Krais kaiwarang mani kat. 15Mani kiwi kawarang mani kat, adika dini Papang yaklau yamwarang, kat witing kuduh aslah dawak king yamni kidika, king balna kingnina dawak Dawan balna Daninawan. 16Witing manah ki dauwas kidika, witing laih yaringni as muih as bik sip yaihnit yakat kiwas pāni yakat yalahwi.#Sal 104:2. Muih as bik talwas ki dawak bik sip talwas ki. ¡Rispik lani dawak parasni kidika laih witing dini balna! Kaput karang.
17Adika sangnika akat rits balna duduwa kidika yakat, diyultah witingna manah kapat kaldakaninna awaski dawak bik ritsnina balna yakat tahanin lani duwas atninna, kat rits balna kidika laih di rahm awaski. Baisa yamni ki, witingna tahanin lani duduwa kidika Papang tingni yakat āninna, witing yaklau di balna bitik minitbayak dawak dunin dini bik mayawa kidika. 18Diyultangkat di yamni kidika yayamwang, wark yayamni balna kidika yakat yamwi di duyang kakalwang dawak witingna kulninna aslah duduwang di duduwa kidika kaupak muih ūk balna yakat bik diana atninna. 19Kaput laih rits balna kidika duduwarang dawak tanitna yakat ma balna kaiwarang kidika yakat yamni karang, dawak rahm sangka atnin lani kidika#6.19 Rahm sangka atnin lani kidika: tingkau ulna balna buas kidika laih aput yuyulwi: ban kaput sangka atnin kidika. bik duduwarang.
Timoti yakat witni yamnin kalyulna kidika
20Timoti, man yamni maintalah di mana dini kidika. Yul dauh balna dawak panimanah, kulnin lani dauh balna rahm sinsni lani balna atwa kidika yakat bik dakawinih; 21bahang muih buas balna kidika satni sinsni lani yakat kukulwa kidika, rahm kulnin lani tani kaupak naikau kalalahna.
Dawan minikun talnin lani duwa kidika manna mamatna yakat lakna karang.
Currently Selected:
1 Timoti 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
