1 Timoti 5
5
Kulyang balna karak amput atnin kidika
1Muihbarak yakat bilwinih; nawatkauh, yul kalyultah sihm man papangma kapat; dawak wawahma balna yakat laih sihm man wirahma balna kapat diyamtah. 2Muih yayal muihbararak balna kidika laih sihm man nanangma kapat diyamtah; dawak yayal sirarau balna kidika laih, sihm man wirahma yayal balna kapat diyamtah, maisihni lani dis karuk.
3Yayal tingmak muih as kau bik uinin muihni dis kidika balna yakat ilp diatah. 4Kaunah yal tingmak as walanibis ahal kidik awaskat mani balna duwa laih, witingna kidika ki tatuna wanaihnina balna yakat ilp dianinna muihni balna kidika dawak papangnina balna dalani kidika yakat bik dinina yamna atnin, kat adika laih Papang yamni talwa bahang. 5Rahm yal as tingmak kidika laih, witing alas watna kidika, witing tahanin lani kidika Papang tingni yakat āwi dawi dawak madah, pukta minit yulwi kalni dinit bukwa kidika bik dawas ki. 6Kaunah yal tingmak as alasna lani yakat kāwa kidika laih, sangnika kidika laih dauna. 7Adika dini balna bik yamnin diyultah, kaput laih dibilwas atnin yulni. 8Bahang angdika muihni witing dini balna kidika yulni kulwi kalbauwas kidika laih, dawak witing sulani balna palni yulnina, kidika laih rahm kulnin lani kidika dana dawak kulwas muihni balna kidika laih baisa dutni ki.
9Yayal tingmak balna ayangnina ahana kidika laih kurih 60 minitkauh duduwa balna kidika manah bang-atnin ki dawak marid al aslah duduna dai kidika. 10Kidika muihni balna laih witingna di yayamwa kidika munah amangninalana atnin ki, walaninabis balna yamni mumuhna kidika, witing ūni yakat muih balna uiwakat yamni diduna kidika, kulyang balna kalnina suhna kidika dawak dalani wauhyang balna yakat ilp diana kidika yulni bik. Witni kat, wark yayamni balna bitik yamna kidika yulni.
11Kaunah yayal tingmak balna kurihnina kuihwas duduwa kidika laih ayangnina āwinih; kat witingna silp dukih diawa kidika yulni Krais kaupak naikau kalalahwi, watwi marid malahwang atwi 12dawak praninamis kidika yakat dutni yamna kaldakakawi. 13Baisa kidika minityakat ū ūk ūk kau uiwi, dawak baskiwah kakalwi; dawak baskiwah manah bik kakalwaski, kaunah muih yulni yulwi karinin, di balna bitik yakat kakawi dawak yulnin dini awas kidika bik yuyulwi. 14Kidika bahang yang dukih yawi yayal tingmak sirarau balna kidika marid kalahna atninna, walaninabis duwa atninna, ū yakat wark balna yamna atninna dawak witingna niningnakauh yaklalauwa balna yakat didadawakat niningnakauh yulninna awas. 15Bahang yayal tingmak balna buas laih uman naikau kalahwi sitan usnit uhuina.
16Muih yal kulyang muihni as#5.16 Muih yal kulyang muihni as: tingkau ulna balna buas laih aput yuyulwi: Kulyang muihni al as kidik awaskat kulyang muihni yal as. witing sulani balna pasyakat yal tingmak as duwakat, ilp kalanin ki, suts truknin dini awas atnin; kaput laih suts kidika yaklau tingmak yayal balna muih as kau bik uinin muihni dis kidika balna yakat ilp diana karang.
17Muihbararak balna suts yakat yamni tunan duduwa balna kidika laih wat bu praisni yamni diyamna atnin ki,#5.17 Wat bu praisni yamni diyamna atnin ki: wirlana ūk yakat laih aput yulwi: wat bu minitna duninna karang ki. sumamalwa muihni balna kidika yakat. 18Bahang ulna yakat aput yulwi: “Wark tuniruh almuk plawar minik unitak yakwa tinpas kidika sitwinih.”#Dt 25:4. Dawak aput bik yulwi: “Wark kalahyang muihni kidika laih minit duna atnin rahmni duwi.”#Mt 10:10; Lc 10:7.
19Man dakawinih muihbarak as niningkauh yulni yayakwakat, witnis muihni bu kidik awaskat bās ilpni kakawas kat.#Dt 17:6; 19:15.
20Angdika muihni balna ban tanitna yakat dutni yayamwa kidika laih, muih balna bitik muhnina yakat dibilna atnam ki, muih ūk balna kidika yamaduna atninna yulni.
21Papang, Jisas Krais dawak insal balna walwi yakna kidika muhnina yakat yamnin mayultayang, adika lani balna usnit uitah muih balna kidika satuk satuk talas dawak yamni talas karak bik. 22Muih as yakat bik tingma dulauwinih yamni kulta talasman tanityakat, muih ūk balna dutnina kidika yulni man bik pāt dunam awas yulni. Di dudutni balna bitik kaupak maisihni dis awah.
23Man bama yakat siknis man kidika, was manah diwinih, kaunah wain bik apis ditah.
24Muih buas balna dutnina kidika laih lāih palni ki lanina yamwas tanitkauh yakat, kaunah ūk balna kidika laih usnit kat lāih kalahwi. 25Sihm kaput bik, wark yayamni balna kidika bik lāih kalahwi; dawak yayamni awas balna kidika laih ban kaput malni yakat wawatwas karang ki.
Currently Selected:
1 Timoti 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
