1 Samuel 7
7
1Bahang Quiriat-jearim muihni balna uiwi Dawan lani baksni kidika duwi uina dai, dawak Abinadab ūni yakat ahana dai, kidika laih asangtuna as kau tusdai; kidika usnit kat walanibis Eleazar kidika Papang dini yayakna dai witing yaklau maintalna atnin yulni.#2 Sam 6:2-4; 1 Cr 13:5-7.
Samuel laih Israel muihni balna taninatuna
2Quiriat-jearim yakat la baksni kidika uiwi kalalana mani kaupak kurih 20 bayakna, dawak Israel muihni balna bitik laih dukih palni wawalwadai Dawan yakat. 3Kidika yulni Samuel yaklau Israel muihni balna bitik yakat diyulna dai: “Manna Dawan yakat ismangna bitik palni wirlawanama kat, dawan dauh balna dutamana kidika bitik ruhmta datanamaki dawak Astarté daniwan dauh balna kidika bik danamnaki, dawak sangmanaka kidika Dawan warkni yamta, witing yakat manah prinias yamta atnamna. Bahang kaput laih filisteo muihni balna tingnina dinit kaupak manalaihwi yakna karang.”
4Israel muihni balna dawan dauh Baal sat sat kidika dawak Astarté kaupak bik dawan dauh balna kidika bitik witingna kulninna kaupak yakwi dawi Dawan yakat manah prinias yayamna dai. 5Kidika usnit kat Samuel yaklau diyulna: “Israel muihni balna bitik kau Mizpa sauni yakat kaluduhtanauh, dawak yang lawik Dawan kalni dinit bukkiki manna yulmana.”
6Israel muihni balna Mizpa sauni yakat kalududuhna dai dawak kidika pāni yakaupak was yakwi ututuhna dai Dawan yakat minitdis kalanin dini as. Kidika mani witingna di kakaswas dai dawak bik muihni balna muhnina yakat laih kalalahna dai witingna kidika rahm Dawan muhni yakat dutni yayamna dai kidika. Mizpa yakat Samuel kidika Israel muihni balna taninatuna kanadai. 7Dawak filisteo muihni balna witingna amanglalana mani kat, Israel muihni balna kidika Mizpa sauni yakat kalududuhna bangdai kidika, filisteo muihni balna taninatuna balna kidika yaklau Israel muihni balna niningna yakat kawi uinadai. Israel muihni balna amanglalana kat, yamaduduna dai 8dawak Samuel yakat kalyuyulna dai: “MaDakiwan Papang yakat yangna yulkina kalni dinit buktaman kidika dawinih, filisteo balna parasnina kaupak mailaihwi yakna atnin yulni.”
9Samuel witing sīp bin kurih as duwa kidika laihwi sakripais karauni kauna yamwi Dawan yakat kalana dai; kidika usnit kat Dawan yakat kalni dinit bukna dai Israel tunan minit, dawak Dawan yaklau nangnitlana dai. 10Bahang Samuel witing sakripais kidika karauni kauna yamwasakkat, filisteo muihni balna laih tanitna yakat uinadai Israel muihni balna yakat dikalbauna atnin yulni; bahang Dawan yaklau alwana parasni witingna minitna yakat ruhmwi bilninalauna dai, bahang aput laih Israel muihni balna yaklau minitna bayayakna dai. 11Kidika minitni yakat Israel muihni balna kidika Mizpa kaupak kalalahna dai filisteo muihni balna yakat uiwi uina atnin, dawak Bet-car kaupak parahyakau uiwi dikalbabauna dai. 12Kidika usnit kat Samuel kipala as duwi Mizpa dawi Sen walsah yakat laksakna dai, dawi ayangni paknadai Eben-ezer,#7.12 Hibru kau laih yulwi, Eben-ezer kidika tanka laih ilp kinipala. bang yulna: “Warmani kat Dawan yaklau ilp mayana.”
13Filisteo muihni balna laih sip awas kalalahna dai dawak watbik Israel sauni kidika yakat kakawas dadana dai; dawak Samuel sangka mani balna yakat, Dawan laih filisteo muihni balna niningnakauh dai. 14Israel tawanni nunuhni filisteo muihni balna yaklau duduna dai kidika, Ecrón kaupak Gat kat, watwi Israel muihni balna dinina kalna dai. Aput laih, Israel muihni balna kidika saunina duduna dai filisteo muihni balna tingnina dinit kaupak, kaput laih Israel muihni balna dawi amorreo muihni balna karak kulnin aslah lani kidika duduna dai.
15Samuel laih Israel muihni balna taninatuna kanadai sangnika bitik yakat, 16dawak kurih bitik kidika Betel, Gilgal dawi Mizpa kidika balna yakat kiwadai, Israel muihni balna yulnina kidika dakana atnin yulni. 17Kidika usnit kat Ramá yakat nawatwi kiwadai, ūni sakdai yakat, dawak kidika kaupak Israel yakat king kāwadai. Dawak bik kidika pāni yakat sakripais busnin pāni bik as Dawan yakat yamwi kalana dai.
Currently Selected:
1 Samuel 7: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
