1 Samuel 6
6
Filisteo muihni balna yaklau la baksni kidika nawatwi uipapamna
1Dawan lani baksni kidika filisteo balna saunina yakat waiku tiaskaubu duwabangdai. 2Dawak filisteo muihni balna yaklau sumalyang balna yakat dawak yul malni kau yakwi yulyang balna yakat bik yulwi ududuhna dai diyulwi dakana atnin yulni:
—¿Mayang Dawan lani baksni kidika karak ais yamdarangyah? Yanayultanauh amput datik wattik pāni yakat uipamtanakiyah.
3Witingna yaklau nangnitnalalana:
—Israel Papangni lani baksni kidika nawatta duyawanamakat, di as didis laih duwi uiwinih, kaunah Dawan yakat dutni yamnamana kidika yulni prisant dini as uita kalatanauh. Kaput laihtakat manna watta muihmana kidika yamni kaltanama dawak kaput laih manna amanglatanama ais yulni wah manawa kidika.
4Filisteo muihni balna yaklau yulwi dakakana:
—¿Ais as dumawi kaladakat madutki balna dawak diswarangyah?
Sumalyang balna yaklau nangnitnalalana:
—Gol kau suru wayani yamna singka, filisteo muihni balna taninatuna kidika muihnina kat kat as as; dawak matis wayani kidika singka, sihm gol kau yamna kat, kat manna dawi tamanatuna balna karak sihm kidika wahni wauhnamana kidika yulni. 5Kidika bahang, suru wayani balna kidika yamtanauh dawak matis wayani balna kidika bik kat kidika balna kuduh sau daukakalwa kidika, dawak Israel Papangni yakat risnipik kalatanauh; kat kaput laih manna yakat wah manawas karang, dawak dawan balna yakat dawak saumana yakat bik wah diawas karang. 6¿Ais yamta manna kulnamna parasni dutamanah, sihm Egipto muihni balna dawak fero kulnin dai kapat, Israel Papangni yaklau taihwi diyamwakat Israel muihni balna yakat didamumukwakat uina kidika? 7Manna lauwa sihtanangkat di puwi tuknin dini wisam as yayamwang; kidika usnit kat turuh yayal bu binina batatahn duduwakat laihta dutanauh, dawak wark tuniruh arangni kau pan sitwa kidika kapat wat as bik sisitwas kat, dawak puwi tuknin dini yakat libitta sittanauh; kaunah datanangkat walaninabis ahalmuk wawahma binina kidika laih usnitna uiwi uinin awaski, kaunah daklana paskau awi sitnin pāni yakat āta sittanama. 8Kidika usnit kat Dawan lani baksni kidika duta puwi tuknin dini kidika pasyakat pirini nahaskau laktustanauh, dawak dutmana dawak disnin yulni gol dini balna kalatamana kidika baks as kau ābangta sihtanama. Kidika usnit kat puwi tuknin dini kidika alas dapamtanangkat kiwang. 9Kaunah adika akat talnauh: di puwi tuknin dini kidika witing palni sauni Bet-semes niningyakauh kiwarang kat, kidika laih Israel Papangni yaklau mayang akat wah mayawa kat awarang; kaput awas karanglaih, mayang amangladarangki witing yaklau wah mayawas dai kidika, kaunah dauh siknis as mailaihna dai kat awarangki.
10Kidika ahalni balna kidika kaput yayamwa dai. Turuh yayal bu binina duduwa kat lalaihna dai, dawak walaninabis ahalmuk binina kidika daklana paskau awi sitnin pāni yakat awi sisitna usnit kat, di puwi tuknin dini kidika libitwi sisitna dai; 11usnit kat Dawan lani baksni kidika di puwi tuknin dini kidika pasyakat ahana dai dawak matis wayani balna dawi suru wayani balna gol kau yayamna kat baks kau ahana dai kidika kauna. 12Kidika usnit kat turuh yayal balna kidika Bet-semes yakat kiunin tani munah uina dai, māhwinah kidika tani yakat uina dai pirini yakat bik kalalahwas. 13Bet-semes sauni muihni balna, sau langni kau plawar minit dakwa bangdai kidika, Papang lāni baksni kidika yakat wauhyaklauwi talwi alasna palni kalalahna dai. 14Di puwi tuknin dini kidika Bet-semes kaupak Josué di dahwa pāni yakat kiwi kana mani kat, kidika pāni yakat watna dai. Kidika pāni yakat kipala nuhni palni as sakdai. Bahang kaput laih Bet-semes muihni balna yaklauwi di puwi tuknin panani balna kidika kau kuh duwi turuh yayal balna kidika Dawan yakat sakripais karauni kauna bubusna dai. 15Libait muihni balna uman witingna la baksni kidika, dawak gol dini balna baks kau bangdai kidika di puwi tuknin dini paskaupak yakwi kipala nuhni sakdai kidika minit yakat lalakna dai; dawak kidika mani yakat Bet-semes muihni balna yaklau Dawan yakat sakripais karauni kauna dawak sakripais ūk ūk bik bubusna dai. 16Adika tatalna usnit kat, filisteo muihni balna taninatuna singka kidika, witingna sihm kidika mani kidika Ecrón sauni yakat nawatwi uina dai.
17Filisteo muihni balna yaklau suru wayani singka gol kau yamwi Dawan yakat kalalana dai kidika dutnina dawak disnin yulni, kidika balna laih Asdod, Gaza, Ascalón, Gat dawi Ecrón witingna balna dinina dai; 18dawak matis wayani balna gol kau yamna dai kidika laih filisteo balna taninatuna balna singka dai kidika tawannina nunuhni balna kidika ampus kat sihm kaput dai, tawan nunuhni daklana dadasni duduwa balna kidika dawak tawan binina daklana dis kidika bitik banawi kukulwakat. Kipala nuhni as#6.18 Kipala nuhni as: ulna umani balna yakat laih kaput yulwi. Hib. kau laih yulwi was nuhni as. minit kau Dawan lani baksni lalakna dai kidika waradika kat bik Bet-semes kaupak Josué di dahwa pāni yakat talnin sipki.
19Kaunah Bet-semes muihni balna yakat Dawan yaklau as as kau diyamwakat dadauna dai la baksni kidika pasyakat laihwi tatalna dai kidika yulni. Kaput laih muih ahal 70 yakat sangninaka didakna dai,#6.19 Kaput yulwi grik kau ulna kidika. Hib. kau laih minitlakwi yulwi: muih ahal tausin manah andat papusbah. dawak tawan muihni balna kidika kakaidana Dawan yaklau yamwakat witingna pasyakat uba palni muih dadauna dai kidika yulni. 20Bahang Bet-semes tawanni muihni balna yaklau yuyulna dai: “¿Wais sip karangyah Dawan niningyakat yaklauna atnin, Papang holi adika niningyakat? ¿Wais niningyakat kiwarangyah mayang kaupak kalahkiwarang mani kat?” 21Dawak Quiriat-jearim muihni balna karak adika yulni sisihna: “Filisteo muihni balna witingna watwi Dawan lani baksni kidika nawatwi duwi uina; bahang aiwa dutayawanauh.”
Currently Selected:
1 Samuel 6: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
