1 Samuel 24
24
1Dawak Saúl witing filisteo muihni balna yakat uiwalikkauna nawatwi kiuna mani kat, yul kalyuyulna dai Devid laih En-gadi kauhnimak walang yakat sakkidika. 2Bahang Saúl yaklau Israel muihni balna bitik kaupak muih ahal 3,000 walwi yakna dai dawi Devid yakat dawak kalbauyang muihni balna duwalikdai yakauna walna uinadai kipala wakakahrni balna yakat. 3Tanipas yakat kiwakat sīp buas bangkat kalpakna dai, kidika yaihnit yakat pa sulihni as sakkat kidika pāni yakat Devid dawi kalbauyang muihni balna duwadai kidika kauna yakmaldana bangdai.#Sal 57 Yulni tunan kidika Hibru kau ulna. Kidika pāni sulihni yakat Saúl witing di dukih kalawakat ka'kiuna dai, 4dawak kalbauyang muihni balna yaklau Devid yakat kalyuyulna dai:
—Dawan yaklau pramis mayamna dai kidika warmani man yakat mawi namangkauh yaklauwa muihni kidika man tingma yakat ānin yulna dai kidika. Witing yakat amput kalyamnin kultaman kidika kalyamtah.
Bahang Devid laih ap yaklauwi Saúl kalmukwa dini kidika yakat apis dakna dai; 5kaunah kidika yamna usnit kat kulnin dalani kallaihna dai, 6dawak kalbauyang muihni balna duwayakat diyulna:
—¡Dawan yaklau yalaihwi yakwang yang kingki niningyakat tingki dulautayang kidika kaupak! ¡Witing laih king, kat Dawan yaklau walwi yakna bahang!
7Kaput laih Devid yaklau kalbauyang muihni balna duwayakat dilaihwatna dai dawak didawakat Saúl niningyakat kalbauwas dadanadai, dawak Saúl laih pasulihni kidika kaupak kalahwi tanityakat lapakna dai. 8Kaunah usnit kat Devid yaklau dangnit kaupak kalahwi, sarahwi kalyulna dai:
—¡King, king!
Saúl laih dangnit yakat wiryaklawi talna, dawak Devid laih rispik sainni kalyamwi sau kat abukna dai, 9dawak kalyulna dai:
—¿King man ais yulni yulnina dakamahn, mayuyulwa kidika, yang lawik man dutma waltayang? 10King man laihta talnaman, warmani Dawan yaklau king man kidika yang tingki yakat āna dai karangbik pa sulihni dai yakat, king man yakat maīnik kidika dukihyawasdai, bahang maītasdanayang dai, kat yang alas yultik dakanayang dai king man kidika kingman, kat Dawan yaklau mawalwi yakna bahang.
11“King man yamni talah tingki yakat ais dutayang kidika: adika laih king man kalmuktaman dini kidika dakyakna as ki, yamni palni īna atnik muihni dai kidika. King, man kidika karak amanglana atnam sipman kat yang lawik manyakat madaukalna atnik dawak malnikau maīna atnik kultasyang kidika, dawak bik man yakat dutni yamtasyang kidika. Kaput kaunah, king man laih yauitaman sangkika kidika dakyakna atnam yulni. 12¡Dawan yaklau akat malaki yamwang, dawak yang lawik biritik mayamna atnik king manyakat! Yang nikingkauh laih king man namangyakat tingki dulautas awakiki. 13Sara mani kau kulnin lani as kidika laih aput ki: ‘Dutni kidika laih muih dudutni balna kaupak kaiwi’; kidika bahang yang apis bik tingki dulautas awakiki king man namangyakat. 14Kidika minityakat, ¿Israel kingni kidika wais niningyakat kalahnayah? ¿Wais yakat uiwih? ¡Yang akat, sihm sul dauna as kapatyang adika kidik awasbik sihm pisa kapatyang adika! 15Kaput bahang, Dawan witing barangni kulwi dawi yangna akat lakina yamwang; ¡witing yaklau yang dutki kidika laihwi talwang dawak takit kawang king niningyakat!”
16Devid yulbauwi dana mani kat, Saúl laih parasni sarahwi yulna dai:
—¡Kaunah yulyabauwa kidika laih Devid man, yang walakibis!
Dawak kaidi, 17kalyulna:
—Man rahmma dutaman, kat yamni yayamnaman bahang dutni mayamnayang kidika pāni yakat. 18Warmani nikingkanaman yang yamni atnik waltaman kidika, kat Dawan yaklau man tingma yakat yahana dai karangbik, yaītas danaman. 19Rahm palni kidika laih, muih as bik diski witing niningkauh yaklauwa muihni kidika yakat kalpakwi sanni dawak bik sangka kaldawakat kiuna atnin. Kaput bahang, ¡Dawan yaklau yamni karuk mamatlauwi mawang warmani yang yakat yamni yayamnaman kidika yulni! 20Warmani yang yamni amanglatayang man king awama kidika, dawak man tingma dinit munah Israel sauni kidika baraknin lani duna karang. 21Bahang, Dawan ayangni kau pramis yāyamtah, yang sulaki balna imuktas awama kidika dawak bik yang ayangki usta yaktas awama kidika yang walakibis balna paskaupak.
22Devid yaklau Saúl yakat pramis kalyamna dai, dawak usnit kat Saúl laih ūni nuhni yakat nawatwi kiunadai, dawak Devid dawi kalbauyang muihni balna duwadai kidika karak laih kalbaunin ūni parasni yakat uinadai.
Currently Selected:
1 Samuel 24: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
