1 Samuel 23
23
Devid yaklau Keila tawanni nuhni kidika laihwi yakna
1Ma as kat, filisteo muihni balna yaklau Keila tawanni nuhni kidika yakat kalbabauna dai, dawak plawar minik unitak wisam yakna dai kidika mamalna dai. Adika yulni Devid yakat kalyuyulna mani kat, 2witing kiwi dawi Dawan yakat kalyulwi dakana dai. Aput kalyulna:
—¿Yadatangkat yawik filisteo muihni balna karak kalbaukuh?
Dawak Dawan yaklau nangnitlana:
—Agha, dikalbautah dawak Keila tawanni nuhni kidika bik laihta yaktah.
3Kaunah Devid kalbauyang muihni balna duwalikdai kidika yaklau kalyuyulna:
—Judá akat bangkauna bik yamadudabahng, ¡Keila yakat mawi filisteo muihni kalbauyang balna niningna yakat kalbaunin laih baisa yamadudarang ki!
4Bahang Devid yaklau watwi Dawan yakat kalyulwi dakana dai, dawak Dawan yaklau nangnitlana:
—Keila niningyakat alahwa lapaktah, bang yang lawik filisteo muihni balna kidika man tingma yakat anayang karang.
5Devid dawi kalbauyang muihni balna duwadai kidika karak Keila niningyakat kalahwi lapapakna dai, dawak kidika yakat filisteo muihni balna niningnayakat kalbabauna dai, dawak bitikkau dikalbauwi minitnatang bayayakna dawak tuninaruh balna yakat laihwi dudunadai. Kaput karak Devid yaklau Keila tawanni muihni balna yakat laihwi yakna dai.
6Kaput bik, Ahimelec walanibis al Abiatar kidika, witing kulwi kiuna dai Keila tawanni yakat Devid karak kalpakna atnin yulni, kidika yakat sumalyang prakni nuhni kidika du'kiuna dai. 7Dawak ūk yakat laih, Saúl yakat kalyulna dai Devid kidika Keila yakat sakki, dawak kulna: “Papang yaklau yang tingki yakat āna, kat tawan nuhni akat kawi yaklawakat dūr balna kidika putwi lāk ana bahang.”
8Usnit kat Saúl yaklau kalbauyang muihni balna duwa kidika bitik kau diyulwakat uina dai, Keila niningyakat kiwi Devid dawi kalbauyang muihni balna duwa kidika yakat awaihdaknin yulni. 9Kaunah Devid amanglana kat Saúl yaklau kalbaunin kalkulwadai kidika, sumalyang Abiatar yakat kalyulna dai prak tingni kakalhni minitkau kawa dini kidika uiwi kalawakat Dawan yakat kalyulwi dakana atnin. 10Dawak Devid yaklau yulna:
—Dawan dawak Israel Papangni, adika man dima yamyang adika witing nuki Saúl witing Keila akat kaiwi daukalpamnin kulwa kidika yang yulki. 11¿Saúl adika yawalwi kaiwarang yah, amanglanayang kaput? ¿Keila tawanni muihni balna yaklau witing tingni yakat yaahawarang pah? ¡Dawan dawak Israel Papangni, man dima yamyang adika kalmadinit bukwi kalyulna atnam!
Dawak Dawan yaklau nangnitlana:
—Saúl laih kaiwarangki.
12Bahang Devid yaklau yulwi dakana dai:
—¿Keila muihni balna yaklau yang dawi kalbauyang muihni balna dutayang kidika kauna Saúl tingni dinit yakat yanaahawarang pah?
Dawak Papang yaklau nangnitlana:
—Saúl tingni dinit yakat manaahawarang ki.
13Bahang Devid dawi kalbauyang muihni balna duwadai kidika kauna, witingna muih ahal 600 dai kidika, Keila pāni kaupak kalalahna dai dawak pini uinadai. Dawak Devid witing Keila pāni kaupak kalahwi kirana yulni kidika Saúl dakana mani kat, di as bik yamwasdana dai uiwi kiuna atnin.
Devid laih kauhmak wanilang yakat
14Kaput Devid witing Zif kauhnimak walang yakat asang as kau kalbaunin ūni dadasni bangkat yakat watwi yalahna dai, dawak Saúl yaklau ma bitik yakat walwādai kaunah, Papang yaklau witing tingni yakat āwasdana dai. 15Kaput bik, Devid laih Saúl yamaniduwadai, kat ikuhti kulwadai kidika yulni. Kidika yulni Hores sauni yakat watnadai, Zif kauhnimak walang yakat.
16Ma as kat Saúl walanibis Jonatán kidika Hores pāni yakat kiunadai Devid yakat kaltalna atnin, dawak bik kulnin dulauna atnin Papang yakat tahanin duwa kidika baisa parasni yamna atnin yulni. 17Aput kalyulna:
—Yamaduwinih, kat papangki Saúl sip mawalwi yakwas karangki. Man laih Israel kingni awanaman karangki, dawak man kaupak nuhni kulna muihni kidika laih yang karangki. Adika laih papang Saúl kat bik nuki.
18Kaput laih witingna albu kalpakwi la yayamna dai, dawak Dawan kidika yakat witnis ahana dai.#1 Sam 18:3. Usnit kat Jonatán laih ūnikau nawatwi kiunadai, dawak Devid laih Hores pāni yakat watnadai. 19Kaunah Zif sauni muihni balna laih Gabaa sauni yakat uinadai Saúl karak yulbauna atnin, dawak kalyuyulna dai:
—Devid laih mayang masauki#Sal 54 Yulni tunan kidika Hibru kau ulna. yakat yakmaldana sakki, Hores pāni yakat, Haquila asangnikau kalbaunin ūni dadasni balna bangkidika yakat, kauhmak wanilang kaupak wadah niningyakat. 20Kaput bahang, king man kainin kulma mani kat, aiwama, dawak yangna lawik man tingma yakat ānayangna karang.
21Saúl yaklau nangnitlana dai:
—¡Papang yaklau blis manayamna karang yang akat mikun yatalamana kidika yulni! 22Waralaih manna kalmanadinit buktayang yawa yamni walta talnauh angdika pāni yakat sakkidika, dawak kidika pāni yakat wais talna kidika, dawak yayuyulna witing kidika alas yulyang ki dawak witing yakat bik sip alas kalyuyulwas ki. 23Yakmalda pāni balna bitik yakat yamni talnauh dawak nawatta aiwa yang akat yul rahm kidika yayultanauh, dawak yang manna karak yawaki. Dawak rahm kidika sauni yakat sakkat, yang lawik yamni palni waltik talna awaki Judá sulani balna bitik pasyakat.
24Zif muihni balna laih Saúl yakat kalparaswi dawi mahka tawanni nuhni yakat uinadai. Devid dawi kalbauyang muihni balna duwadai kidika karak laih Maón kauhnimak walang kaupak wadah niningkauh sau langni pakdai yakat bangdai, 25dawak Saúl dawi kalbauyang muihni duwadai kidika karak ta yakat kalahwi lapapakna dai walna atnin yulni. Adika yulni Devid yakat kalyuyulna mani kat, Maón kauhnimak walang kau kipala babauni sakyakat#23.25 Kipala babauni sakyakat: grik kau kaput yulwi. Hibru kau laih yulwi kipala nuhni, dawak yakat bandai. yaklakwi yakmaldana dai. Saúl amanglana mani kat, Maón kauhnimak walang yakat kiunadai Devid yakat usnit uiwi. 26Asang pirini nakas kidika Saúl dawi kalbauyang muihni duwadai kidika karak lapapakwadai dawak pirini ūk kidika yakat laih Devid dawi kalbauyang muihni duwadai kidika balna karak lapapakwadai, sirihni palni lapapakwadai Saúl kaupak dakwi naikau kalahna atnin yulni. Dawak Saúl dawi kalbauyang muihni duwa kidika karak Devid yakat dawak kalbauyang muihni duwa yakat bik uman awaihdakwi dilalaihwarang bangkat, 27yul duwi kiwa muihni as kiwi Saúl yakat kalyulna dai:
—¡King man mahka palni nawatta yawah, kat filisteo muihni balna yaklau sau kidika yakat ui'kakana!
28Bahang Saúl witing Devid yakat uiwas danadai dawak nawatwi kiwi filisteo muihni balna niningnayakat kalbauna dai. Kidika yulni kidika pāni kidika ‘Kipala dakwi kalahna’ ayangni duna dai.
Devid witing Saúl sangnika kidika dakwas ki
29 # S.b. 23:29—24:22 kidika laih S.b. 24:1-23 kat kidika simh ki hibru kau ulna kidika.Devid laih kidika kaupak kalahwi kiwi En-gadi yakat kalbaunin ūni dadasni bangdai yakat yalahna dai.
Currently Selected:
1 Samuel 23: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
