1 Reyes 6
6
Salomón makatyulnin ūni yamwi
(2 Cr 3:1-14)
1Salomón witing Israel yakat king kana kurih arungka laihwa yakat mahka Dawan kau makatyulnin ūni kidika yamna, Ziv wainiku yakat, kidika laih kurih kawa kaupak waiku bu kidika ki, kidika laih Israel balna Egipto kaupak kalalahna kidika kurih andat 4 minitkau 80 laihna yakat dai. 2Makatyulnin ūni king Salomón yaklauwi Dawan yakat pakwi kalana kidika laih naini metro 27 duwadai, panuhni laih metro tiaskauarungka dawak maluihni laih metro 13 minitkau papusbah dai. 3Makatyulnin ūni muhnitkau kiwi kawa yakat pa panuhni pakdai kidika, naini laih metro tiaskauarungka duwadai, makatyulnin ūni panuhni duwa kaput dai, ūni kidik muhnit kau kidika laih metro arungka minit kau papusbah duwadai. 4Salomón yaklauwi makatyulnin ūni winnidar balna kidika laih ayan lilingni kau āna dai. 5Dawak bik kidika ūni yaihnit kau itikwi awaihna dai kidika yakat apis tang-āna dai, kidika laih ahnikau daklana kidika niningyakat, ahni panuhni papuskau pakkidika yakat bik dawak dangnittani kau rum balna kidika yakat bik, dawak kaput bik laih rum dibinina bik yayamna dai. 6Ūni kidika dinit kauh tang āna kidika laih metro bu minit kau centímetro 25 duwadai panuhni; dawak papuskau kidika laih duwadai metro bu minit kau centímetro 70, dawak makau kidika laih metro bās minit kau centímetro 15 duwadai, kat ahni niningkauh kidika laih dibin kalnadai bahang, ūni dinit kau pan nunuhni rabutni lakna balna kidika makatyulnin ūni daklana rahni balna yakat kalawak taihwas atnin yamna dai bahang. 7Makatyulnin ūni yayamna kidika yakat kipala balna ahana kidika laih pahrna manah kat duwi ahana dai, kaput bahang witingna ūni kidika yayamna kat, amar kau tisna satni balna ayan dini balna kau duwi babauhwak parasni yulwak as bik dakakawasdai, kaput laih ap wark kalalahna dai. 8Ū sau kauh, rum daklana dibin dūrni kidika laih tingpal niningyakat sakdai; dawak kidika kaupak papuskau, dawak uptis bās yakat kilwi kiunin kat tani kilitna wiwirni as sakdai bahang kidika munah kikilwadai.
9Salomón witing makatyulnin ūni kidika yamwi dahndana kat, suhun panan rabutna yaksihni pahrwi yamna balna kidika karak āwi awaihna dai. 10Kaput bik laih yamna dai makatyulnin ūni awaih kau tang-āna balna kidika bitik, tang-āna kidika maluihni laih metro bu minit kau centímetro 25 duwadai, dawak ahni kau itikwi awaihni kidika yakat suhun panan rabutna balna kidika ilwi taihna dai. 11Kaput dawak Dawan kiwi Salomón yakat kalyulna: 12“Makatyulnin ūni paktaman kidika, yuldarang kat, yang lāki balna yakat yamma kat, yang prakimis, man papangma Devid kau yamnayang yakat yamki, man yakat; 13dawak Israel balna pasyakat yalahki, dawak bik ruhmtik datas awaki Israel kidika, yang tawanki.”
14Salomón witing makatyulnin ūni kidika yamwi dana. 15Dawak paskau kidika laih suhun tatni kau manah itikwi lana dai. 16Makaupak saukat kidika suhun tatni kau manah āna dai, dangnit niningkauh yakat metro tiaskauarungka kidika yamni yamna dai, kidika yakat holi pāni atnin.#Ex 26:33-34. 17Makatyulnin ūni, holi pāni muhnitkau kidika,#6.17 Holi pāni muhnitkau: grik kau ulna kidika laih kaput yulwi. Adika yulni laih Hibru wauhnitaya yakat kalahwas ki. naini metro 18 duwa dai. 18Paskau āna balna kidika laih suhun tatni manah dai, dawak kidika tatni minit yakat pahrwi diwaya balna yamna dai, dipulu satni dawak di minik satni balna bik. Kidika bitik laih suhun tatni manahdai. Kipala as bik talwasdai. 19Makatyulnin ūni yakat holi pāni kidika yamna dai, kidika yakat Dawan pranimis baksni kidika āna atnin. 20Holi pāni paskau kidika laih naini, panuhni dawak maluihni bik sihm metro tiaskauarungka duduwadai. Dawak holi pāni muhnit kau yakat Salomón yaklauwi sakripais busnin pāni as suhun kau yamna dai, dawak minit yakat gol kau kahna dai. 21Sihm kaput bik laih makatyulnin ūni paskau kidika laih gol kau kahwi lana dai, dawak holi pāni kidika bik, dawak kidika tanit yakat gol sīnni kau āwi lana dai. 22Kaput laih makatyulnin ūni bitik kidika gol kau manah bitik kahwi lana dai, kaput bik laih holi pāni muhnit kau sakripais busnin pāni pakkidika bik.#Ex 30:1-3.
23Kaput bik laih olib panan kau di lawani duduwa balna kidika bu yamna dai, holi pāni kidika dini. Kidika dini balna kidika aslah metro arungka minit kau papusbah duwadai, 24dawak lawanina kidika naini metro arungka minitkau centímetro 25 duwadai. Kaput bahang lawani sutni kaupak sutni as kat kidika naini metro arungka minitkau papusbah duwadai. 25Di lawani duyang balna kidika bupak sihm kapaputdai; yuldarang kat bupak metro arungka minit kau papusbah duduwadai, dawak bik bupak sihm kapapat dai wayani kidika. 26Maluihni bik metro arungka minit kau papusbah duduwadai. 27Salomón yaklauwi holi pāni yakat duwi kiwi āna dai. Dawak kidika dini balna lawanina kidika ririh duduwadai, kaput laih as lawani sutni kidika daklana yakat sukdai, dawak ūk kidika lawani bik sihm kaput nakastawa niningkauh yakat sukdai, dawak lawanina as balna bu kidika laih biri suk duduwadai holi pāni yakat. 28Kidika usnit kat Salomón yaklauwi kidika dini lawani duwa balna kidika gol kau manah kahwi lanadai,#Ex 25:18-20. 29dawak makatyulnin ūni paskau kidika dawak ahnikau kidika bitik laih tat yakat pahrwi di lawani duwa balna kapatnah wayanina manah yamna dai, dawak kuku satni dawak dipulu satni balna kapatnah wayani balna bik yamna dai. 30Kaput bik laih makatyulnin ūni sau ataknin kidika bitik laih gol manah kahwi yakna dai, pasyakauh dawak ahnikau kidika bik. 31Holi pāni dūrni kidika laih olib panan kau yamna dai, dawak ma niningkauh dawak rahni balna kidika karak libitwak wayani as muhni singka kalna dai. 32Dūrni putnin bu kidika laih olib panan kau duwi yamna dai, dawak kidika yakat pahrwi di lawani duwa balna kidika wayani yamna, dawak kuku, kaput dipulu wayani balna bik yamna; usnit kat wayani balna yamna kidika gol kau manah kahwi lana dai. 33Makatyulnin ūni kau panuhni as papuskau pakkidika yakat kiwi kawa yakat, rahni balna āna dai olib panani kau, bahang diwaya as kapat yamna dai. 34Dūr putnin bu yamna kidika panan laih awas kau yamna dai, dawak bupak laih wiwirwadai. 35Kidika yakat pahrwi di lawani duwa balna kidika wayani yamna, dawak kuku panan wayani dawak dipulu wayani bik yamna dai, dawak kidika wayani balna kidika gol kau kahwi lana dai. 36Watak pas niningkauh kidika yamna dai kipala pahrna balna kidika kau parna bās, dawak suhun panan rabutna balna kidika parna as.
37Salomón king kana kurih arungka laihwak, Ziv wainiku yakat, Dawan kau makatyulnin ūni rahni balna kidika āna dai; 38dawak witing king kana kurih 11 laihwak, Bul wainiku yakat, kidika laih waiku tiaskaubās yakat ki kurih kawa kaupak, kaput kidika yakat ū kidika bitik palni yamwi dana dai. Kurih tiaskaubu laihwak yamwi dana dai.
Currently Selected:
1 Reyes 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
