1 Reyes 5
5
Salomón dawak Tiro kingni Hiram karak kalpakwi la as yayamna
(2 Cr 2:1-18)
1Tiro kingni Hiram witing dakana kat Salomón kidika king kana witing papangni Devid pāni yakat, bahang kaput laih witing ayangni kau muih yakwi sihna, kat witing laih Devid yakat yamni kaltalwadai bahang. 2Kaput laih Salomón yaklauwi yul kalsihna Hiram yakat: 3“Man yamni amanglataman, yang papangki Devid witing Papangni Dawan yakat makatyulnin ūni as yamwi kalawasdai, kat war manas kalbauwadai kidika yulni, kaunah Dawan yaklauwi witing waihnila balna kidika kalni dinit yakat taihna kat. 4Kaunah waradika laih yang Papangki Dawan yaklauwi pa bitik yakat ap yanana, waihla disyangna dawak di bik dis awasyangna. 5Kaput bahang, waradika laih yang Papangki Dawan yakat makatyulnin ūni kidika as yamtik kalakuhtiang, witing yaklauwi papangki Devid yakat pramis as kalyamna dai kaput, kalyulna dai witing walanibis as witing pāni yakat king kawarang kidika yaklauwi, witing risnipik kau makatyulnin ūni as pakna karang.#2 Sam 7:12-13; 1 Cr 17:11-12. 6Kaput bahang paktang suhun dadakwang Líbano kaupak. Yang diki yamyang balna yaklauwi man dima yamyang balna yakat tingninasut lalaihwarang, dawak yang lawik lautik maki man dima yamyang balna minitna ampus yakulma kidika, dawak bik man yamni amanglataman, yangna laih pan daktik amanglatas yangna, sidonio balna kapat awasyangna.”
7Salomón yul kalsihna kidika Hiram uba isninglak palni dakawi aput yulna: “¡Warmani Dawan ayangni kidika blisin yamna karang, kat Devid yakat walanibis sins nuhni duwa as kalana bahang, kidika nisan nuhni kidika tunan kana atnin!”
8Kidika usnit kat Hiram yaklauwi yul kalsihna Salomón yakat: “Man yul yasihnaman kidika dunayang, bahang man suhun panan dawak awas panan balna bik yulnaman kidika yakat yamna awaki. 9Yang diki yamyang balna kidika yaklauwi Líbano kaupak kuma kat yayakna karang, dawak kidika witingna pala kapat yamwi duwi uina karang, angkat pāni man lawa yayulma kidika. Dawak pala balna kidika duwi uiwi yakat ululuhna karang dawak man dunaman karang. Dawakat man yamnam kidika laih yang dukih yawa kidika, yang ūki yakat di kasnin balna kidika uita atah.”
10Kaput laih, Hiram yaklauwi suhun panani balna kidika bitik kalana dai, dawak awas panan balna bik, witing ampus dukih kalawa yakat, 11dawak Salomón yaklauwi Hiram ūni yakat di kasnin dini balna kidika kalana dai: litros milian arungka minit kau tausin 400 plawar kalana dai, dawak disala kidika laih litro tausin 4, minit kau andat 4 olib salani kidika kalana dai. Salomón yaklauwi Hiram yakat kalawa dai, adika dini balna kurih kaiwa bitik yakat. 12Kaput laih, Dawan yaklauwi Salomón yakat sins lani nuhni kidika kalana dai, witing yaklauwi kalanin yulna dai yakat. Baisa minit yakat Salomón dawi Hiram karak la yayamna dai, bahang kaput laih kulnin aslah kidika sakdai witingna pasningna yakat.
13Kaput laih Salomón yaklauwi lā as āna dai, muih kidika taihwak wark kalahna atnin Israel sauni bitik pasyakat, dawak kuma kuring kaiwi kawa pāni yakat muih ahal tausin 30 kalududuhna dai, 14kidika balna kidik Líbano yakat sihna dai tausin salap waiku as kat nawatwi ainin dawak tausin salap ūk kidika sihna atnin. Kaput laih adika ahalni balna Líbano yakat waiku as bangdai, dawak ūnina yakat laih uiwi waiku bu bayayakwadai. Muih balna yakat taihwi pakwak wark yayamwa tanituna laih Adoniram dai. 15Kidika minityakat Salomón laih duwa dai ahal di trukyang balna tausin 70, dawak tausin 80 bangdai asangpas yakat, kipala pahryang balna, 16baisa minit yakat wark tunan duyang balna tausin bās minit kau andat bās bangkidika laih banawi kulwas dai. 17King yaklauwi sihwak kipala nunuhni yaknin dadasni balna kidika yayakna dai, makatyulnin ūni rahni balna kidika lakna atnin, dawak kipala pahrna balna kidika bik. 18Salomón ahalni balna ū yamyang dawak Hiram ahalni ū yamyang balna karak, dawak bik yaihnit kau Gebal bik, pan balna kidika ridi yayamna, dawak kipala balna kidika papahrna makatyulnin ūni kidika yamna atnin.
Currently Selected:
1 Reyes 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
