1 Reyes 3
3
Salomón laih Fero walanibis kat duna
1Salomón dawi Egipto kingni Fero karak kalwanaih kakalna, kat Fero walanibis yal kidika duna dai bahang, dawak Devid tawanni nuhni yakat duwi kiuna dai, king ūni, Dawan ūni dawak Jerusalén daklana kidika baisa yamwalikdai bahang. 2Kaput kaunah, muih balna kidika sakripais yayamwadai pa maluihni balna yakat, dawan dauh balna kau minitna yuyulwa pāni balna yakat, kat kidika mani balna yakat baisa Dawan kau makatyulnin ūni papakwasdai bahang.
Salomón yaklauwi Papang yakat sins lani nuhni kidika yulna
(2 Cr 1:1-13)
3Salomón kidika Dawan yakat dalani kaltalwadai, bahang witing papangni Devid la balna āna kidika yakat yamwadai, witing palni bik sakripais dawak walapni bik buswadai kidika, pa maluih balna yakat, 4Gabaón yakat bik kiwadai sakripais yamna atnin, kidika pāni laih tanit maluihni dawak bik nuhni kalkulna dai bahang, kaput laih kidika pāni yakat sakripais busnin dini karauni kauna buswa kidika tausin buswadai.
5Gabaón yakat, pukta as kat, Dawan Salomón yakat kiuna dai amanakau dawak kalyulna: “Ais dukih mawak yayultah, yang lawik maki.”
6Salomón yaklauwi nangnitlana: “Man lawa yang papangki yakat minikunni nuhni palni kaltalnaman dai, man dima yamyang Devid kidika, bahang witing laih man namangyakat isning kidika la kat dawak bik barangni dai. Kidika bahang kulnam minikun talnaman dai nuhni palni, bahang kaput laih witing sulani as kau kalanaman witing tronni yakat yalahna atnin, warmani kalahna kaput. 7Man, Dawan, yang Papangki, man lawa yanaman papangki Devid pāni yakat king awinik yanaman, yang baisa wahma palni yang dai amanglatasyang bik. 8Kaunah, man tawan as walta yaknaman kidika tunan yakat yang: tawan as nuhni palni, muih kidika mahni palni bahang sip awaski kulwi talna atnin. 9Kaput bahang man ising as yatah, kidika yakat manah atnin, man tawanma kidika tanituna awana atnik, dawak kaput bik di dutni dawak yamni kidika balna amanglana atnin; kat ¿wais kat sipkarangyah tawan as mahni palni kidika tunan kana atnin?”
10Dawan yaklauwi yamni palni dakana Salomón dukih kalawak yulna kidika, 11dawak kalyulna: “Ais yamta kidika dini yang kaupak dunin yayulnamanh, man sangmaka naini dunin yulni yayultasman daih, ritsni balna, waihmala balna dauninna yulni, kaunah nawatkauh laih yulnaman sins sirihni atnin, dakanin dawak tunan kanin kidika, 12man yayulnaman kidika yamki ki: yang lawik sins sirihni dawak sins nuhni kidika bik maki, man tamat yakat muih as bik duwas karang kidika man tamat yakat, dawak bik man kaupak usmat yakat. 13Baisa kidika minit yakat matayang ritsni balna kidika dawak yaringni kidika bik, man kidika dini balna yayultasman dai kaunah, kaput laih man sangmaka bitik yakat king ūk diskarang man kapat. 14Dawak yang kulnik lani yamma kat, dawak lāki balna bitik bik yamma kat, man papangma Devid yamna dai kaput karang kat sangmaka naini maki.”
15Salomón witing sahmuwi isning aina kidika laih amana as dai. Dawak witing Jerusalén yakat kiuna kat, Dawan pranimis lāni baksni muhnit yakat kiuna sakripais yamnin dini karauni kauna buswa kidika dawak, Papang karak watwi yamni kalahnin sakripais buswa kidika bik yamna. Kidika usnit kat kabamint warkni kalahyang muihni balna bitik yakat kasnin alasnina as yamna dai.
Salomón wihta sins nuhni duyang
16Kidika mani balna yakat, yayal bu uina dai, witingna laih ahal manas karak kalalangwa yayalni balna dai. Witing muhni yakat uina kat, 17yal as kidika yaklauwi yulna:
—¡Alakaih, king! Adika yalni karak yangna ū aslah āwayangna, dawak yang muihbin as dunayang dai ū aslah witing karak bangyangna pasyakat. 18Yang muihbin dunayang ma bās bayakwak, kidika yalni bik muihbin duna. Yangna manah dai kidika ūni pasyakat. Kidika ūni pasyakat muih ūk disdai yangna karak. 19Pukta as kat kidika yal walanibis dauna, kat muihbin minit yakat kalangna dai bahang. 20Kaput laih witing pukpapus yaklauna, yang amasakyang kat walakibis kidika yaihkit kaupak yadakyakwi dukiwi kalangna, dawak witing walanibis dauna kidika yang yaihkit yakat lakna dai. 21Mapiris lawik walakibis ta bayahkuhtik talingkat dauna dai. Kaunah yang yaringni yakat yamni talik amanglanayang, kidika yang walakibis awasdai, yang yaknayang dai kidika.
22Yal ūk kidika yaklauwi yulna:
—Dikah, yang walakibis laih sangka kidika ki, man walamabis laih dauna kidika ki.
Kaunah tatuna kidika yaklauwi yulna:
—Dikah, dauna kidika man walamabis, yang walakibis laih sangka kidika.
Kaput laih king muhnit yakat biri biri yuyulna. 23King witing kulwi talna: “Adika yal yulwi witing walanibis laih sangka kidika ki, dauna kidika laih as yakauh walanibis; ¡kaunah as kidika nawatni kauh yulwi!” 24Usnit kat pakna:
—¡Isparah as duaiyatanauh!
Isparah kidika king yakat uiwi kalalawak, 25pakna:
—Muihbin sangka kidika papus daktanauh, dawak tihrta diatanauh, witingna bupak.
26Kaunah muihbin sangka kidika nanangni laih kasak kulnin kaidana walanibis yulni, dawak king kalni dinit yakat bukwi yulna:
—¡Plisma! ¡Muihbin sangka kidika iwinih king! ¡Tanit yamni ki kidika yal yakat kalatanauh!
Kaunah as kidika yaklauwi yulna:
—Yang diki bik awas karang, dawak man dima bik awaskarang. ¡Sahtanauh!
27Kaput laih king witing watwi kawi yulna:
—Kidika yalni yakat kalatanauh muihbin sangka kidika. Ihiwinih, kat kidika yal laih rahm palni nanangni ki.
28Israel muihni balna bitik laih king muih lanina yamwi barangni āna kidika dakakana, dawak witing yakat rispik kalalana, kat witing tatalna dai bahang Papang yaklauwi sins nuhni kalana kidika, la kat yamnin yulni.
Currently Selected:
1 Reyes 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
