1 Jan 5
5
Sau akat minit bayakdarang kidika
1Bitik kasak kulnin duwa kidika Jisas Krais laih Mesías, kidika muihni laih Papang walanibis; papangni dalani talwa kidika, walanibis balna kidika bik dalani talwi. 2Papang yakat dalani talda kat, witing yulwa balna kidika yamdi, amangladi dalani taldi Papang walanibis balna yakat bik. 3Papang yakat dalani talnin kidika laih yulni balna dakawi yamnin;#Jn 14:15; 2 Jn 6. dawak lāni balna kidika laih truknin dini as awaski,#Dt 30:11; Mt 11:30. 4kat Papang walanibis balna kidika bitik laih sau adika minit bayayakwi. dawak mayang kasak kulda kidika yaklauwi mayawak sau adika minit bayaknamayang. 5Wais kat Jisas kidika Papang Walanibis kulwa kidika, sau adika minit bayakwi.
6Jisaskrais kaiwarang kidika laih sainni āwi dana ki, was dawak ā karak; was manah laih awaski, kaunah was ā karak. Sihm Spiritni kidika witnis adika dini, dawak Spirit kidika kuduh rahm kidik. 7Witnis kidika laih bās ki:#5.7 Witnis kidika laih bās ki: tingkau ulna balna kidika minit yakat lakwi: makau kisang yakat: Papang, Yul dawak Spirit Holi, adika balna bās adika laih aslah ki. 8 Dawak sau akat kidika laih witnis bās ki. 8Spirit, was dawak ā; bāspak aitani libitwi. 9Muih ahal witnis yuyulwa kidika dakadi, kaunah Papang witnis yulwa kidika laih tanit minit nuhni ki, kat kidika laih Papang yaklauwi Walanibis yulni witnis yulna kidika bahang.#Jn 5:32-37; 8:18. 10Wais kat Papang Walanibis yakat kasak kulwa kidika, adika witninis witing kulnin yakat duwi kiwi; Papang yakat kulwa kidika, alas muihni kapat kalwi, kat Papang witing Walanibis witninis yulna yakat rahm kulwa bahang. 11Adika witninis kuduh Papang sangka ban atnin mayana kidika, dawak adika sangnika kuduh Walanibis al yakat sakkidika. 12Papang Walanibis al yakat duwa kidika, adika sangnika bik duwi; kaunah wais kat Papang Walanibis al kidika yakat duwas kidika laih, di diski.#Jn 3:36.
Witni yakat yul as as sumalna balna kidika
13Adika manna yakat manaultayang Papang Walanibis al yakat kasak kultamana kidika, amanglanamna sangka ban atnin kidika dutamana.#Jn 20:31.
14Makulnik kidika Papang yakat ādi dudi, kat witing kulnin lani kat di yulda kidika laih maidakawa bahang. 15Dawak kaput bik amangladi, mamikityulda balna kidika Papang dakawi, dawak bik amangladi uman dunamayang yulnamayang kidika.#Mt 7:7-11; Lc 11:9-13; Jn 15:7,16; 16:23-24; 1 Jn 3:21-22.
16Muih as witing talwak wanaihni kidika dutni as yamwi kaunah daunin yakat kaldukiwas kidika, minityulnin ki, dawak Papang yaklauwi wirah kidika sangnika kalana karang. Kaunah dutni balna kidika daunin yakat bik duwi kiwi, kidika yulni laih yultasyang mamatna yulnamna. 17Dutni kidika bitik laih dutni; kaunah dutni buas kidika daunin yakat duwi kiwas ki.
18Amangladi wais kat Papang kidika Papangni duwa kidik, baisa dutni yamwas ki, kat Papang Walanibis al kidika yaklauwi maintalwi, bahang dutni kidika laihwas ki. 19Amangladi Papang kaupak mayang, sau adika bitik laih dutni dinit yakat sakki. 20Dawak bik amangladi Papang Walanibis al kidika kaina, dawak amanglanin kidika mayana Papang rahm kidika. Aslah palni mayalahdi rahm kidika karak, yuldarang laih Walanibis Jisaskrais. Kidika kuduh Papang rahm palni kidika dawak sangka ban atnin kidika.#Jn 17:3. 21Walakibis balna, amungtalnauh dawan dauh balna kidika.
Currently Selected:
1 Jan 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998