1 Jan 4
4
Papang Spiritni dawakKrais waihnila spiritni
1Wirah dalani balna, manna kukulwinih muih bitik Papang spiritni mayana atwa kidika, nawatkauh laih laihdi talnin, kaput laih talnin witingna yakat spirit duduwa kidika Papang kaupak pa. Kat sau adika laih prapit alas muihni balna manah bahngna. 2Kaput laih manna amanglatanama wais kidika Papang Spiritni duwa kidika: kidika muihni balna bitik kukulwa kidika, Jisaskrais laih muih al aihwa kapat kaina kulwa kidika, Papang Spiritni duwi. 3Wais kat Jisas yakat kaput kulwas kidika, Papang Spiritni diski; nawatkauh laih antikrais spiritni duwi. Manna dakanamana kidika spiritni kaiwarang ki; kidika laih uman sau akat sakki.#Mt 7:15; 2 Jn 7.
4Walakibis binina, manna laih Papang dinimana, alas muihni balna kidika minitna bayaknamana, manna yakat sakkidika laih tanit parasni nuhni duwi, sau yakat kidika karak dawakat. 5Witingna laih sau kaupak ki, kidika bahang sau dini balna kidika yulni babauwi, dawak sau muihni balna kidika dakakawi.#Jn 15:19. 6Mayang laih Papang dinimayang. Papang yakat amangnilawa kidika laih yuldak dakawi, kaunah Papang dini awas kidika laih yuldak dakawaski.#Jn 8:47. Kidika yakat taldi wais rahm spirit yamni duwa kidika, dawak wais alas yulnin spiritni duwa kidika bik.
Papang laih dalani lani
7Wirah dalani balna, biri biri dalani kaltalnin ki, kat dalani talnin kidika laih Papang kaupak kaiwa bahang. Bitik kau dalani talwa kidika laih Papang walanibis dawak bik Papang yakat amangnilawi. 8Dalani talwas muihni kidika laih baisa Papang yakat amanglawaski, kat Papang laih dalani lani bahang. 9Papang dalani maikulwa kidika manikingkana, Walanibis al aslah duwa kidika sau akat sihna, mayang witing munah masangkika duna atnin yulni.#Jn 3:16. 10Dalani lani laih adika ki: mayang Papang yakat dalani talnamayang laih awaski, witing yaklauwi dalani maitalna dawak Walanibis al aslah kidika sihna, sakripais yamwak, mayang madutki balna kidika dawak disna atnin.
11Wirah dalani balna, Papang kaput dalani maitalna kat, mayang bik biri biri dalani kaltalnin ki. 12Muih as bik Papang kidika talwaski;#Jn 1:18. kaunah biri biri dalani kaltaldarang kat, Papang laih mayang akat ki, dawak witing dalani lani duwa kidika mayang akat lāih kalahwi. 13Mayang Papang yakat yalahwa kidika, dawak witing mayang akat yalahwa kidika tanka laih witing Spiritni mayana yakat lāih kalahwi.#Rom 8:9; 1 Jn 3:24. 14Dawak mayang palni talnamayang dawak yuldi Papang Walanibis kidika sihna sau adika laihwi yaknin yulni.#Jn 3:17. 15Wais wais karang bik amanglawarang kat Jisas kidika Papang Walanibis, Papang kidika witing yakat yalahwi dawak witing kidika Papang yakat yalahwi.
16Kaput mayang amanglanamayang, dawak kuldi Papang dalani maitalwi. Papang laih dalani talyang, dawak wais kat dalani lani yakat yalahwa kidika laih, Papang yakat yalahwi, dawak Papang kidika witing yakat yalahwi. 17Kaput laih dalani lani kidika lāih kalahwi mayang akat, kaput laih la yamwarang mani yakat, makulnik kidika witing yakat āwi dunin; kat mayang laih adika sauni akat Jisaskrais kapat mayang. 18Angkat dalani lani sakkat, yamadunin diski. Nawatkauh laih, dalani lani barang kidika yamadunin kidik ahni yakat yakpamwi, yamadunin kidika laih wah kidika munah kaiwi. Kidika bahang, muih as yamaduwakat, dalani barangni palni kidika yamwas ki.
19Mayang dalani taldi#4.19 Mayang dalani taldi: tingkau ulna yakat yulwi: mayang Papang yakat dalani taldi. kat tatuna witing dalani maitalna bahang. 20Muih as yulwarang kat: “Papang yakat dalani talayang”, kaunah wanaihni yakat waihla talwa kat, kidika laih alas muihni. Wanaihni yakat dalani talwas kidika, witing minikpa kau talwa bik, Papang yakat laih sip dalani talwas ki, kat talwas bahang. 21Jisaskrais adika lani mayana: wais Papang yakat dalani talwa kidika, wirahni yakat bik dalani talwang.#Mt 5:44-45; Mk 12:29-31.
Currently Selected:
1 Jan 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
