1 Kurint 6
6
Wihta kulyang muihni balna awasniningnakauh kalbibilna kidika
1Manna paskaupak muih as yaklau muih ūk karak kalbilna duwakat, ¿ais yulni wihta balna Papang yakat kukulwas kidika yakat la kat kidika yamna atnin diyulninyah, Papang tawanni yakauh kalyulnin pāni yakat? 2¿Ais manna amanglatasmanakatpah Papang tawanni kidika yaklau sau yakat lani yamwarang kidika? Dawak manna sau lani yamnamna karang kat, ¿amput manna adika yulni laihwi yamnin dibindadauh adika lani yamnamana sip awasmanah? 3¿Manna amanglatasmanah insal balna kat bik mayang malawi lanina yamdarang kidika? ¡Bahang warmani yulni balna laihwi yamnin kidika laih mayang marahmki nuhni dudi! 4Kaput bahang, manna sangmanaka yakat muih balna karak kalbilna dutamana kat, ¿ais yulni wihta balna ātamanah suts yakat muih dauh dikulna balna kidika? 5Adika yulni yultayang asalmana kalahna atnin yulni: ¿Ais manna pasmangna yakat muih as bik sipawaskat pah kalwirah balna pasyakat yulni laihwi yamnin as duduwa kat lanina yamna atnin? 6¡Kalwirah balna ūk ūk karak manah bik laih kalbabauwas ki, kaunah kalbibilna yulni balna kidika wihta Papang yakat kukulwas balna muhnina yakat duwi uiwi!
7Manna pasmangna yakat kalbilnin balna dutamana kidika laih dutni lani nuhni as ki. ¿Baisa yamni awasyah, la kat awas kidika sip wauhna atnin? ¿Baisa yamni awasyah, kaldadakat kalmalna atninna? 8¡Kauna manna laih, nawatkauh, la kat awas kidika yamtamana dawak manna wirahmana balna dinina kat bik maltamana!
9-10¿Manna amanglatasmanah dutni yamyang muihni balna kidika laih Papang king kāwa lani yakat witingna dinina laih dis karang kidika? Datanang alas manayuyulwas kawang, bahang angdika muihni balna la munah kalduduwas kidika, wayani dauh balna yakat minitna yuyulwa kidika, marid lani babahwa kidika, ahal aslah kalduduwa balna kidika, di malyang balna, lalah manah dukih diawa, wasak diyang balna, dawak muih yakat la tuhyang balna kidika bik Papang king kāwa lani yakat dinina dis karang ki. 11Dawak adika dini balna muhnilau kau yayamwadai manna kaupak buas; kaunah waralaih uman dunamana maisihnidis kalahnin lani kidika, dawak Papang dini alahwanamana, uman dutmana kaupak manalaihwi yakna Jisas Krais ayangni usnit yakat dawak Mapapangki Spiritni kidika ayangni usnit yakat bik.
Mamuihki nuhni holi kalwa kidika
12Aput yulwi: “Yang laih ais ais yamnik dukih yāwarang kidika yamki ki.” Rahm ki, kaunah bitik laih yamni awas ki.#1 Kor 10:23. Agha, yang laih ais ais yamnik dukih yāwarang kidika yamki ki, kaunah datingkat di as bik yataihwas karang ki. 13Dawak aput bik yulwi: “Kasnin dini kidika laih mabaki dini, dawak mabaki kidika laih kasnin dini kidika dini.” Rahm ki, Papang yaklau bupak dismukwarang ki. Wirlawakat, mamuihki nuhni kidika laih la munah awas kaldunin dini awas ki; mamuihki nuhni kidika laih Dawan dini, dawak Dawan kidika laih mamuihki nuhni kidika dini. 14Dawak Papang yaklau Dawan yakat watwi dulauna kaput, mayang yakat bik witing parasni karak maidulauwarang ki.
15¿Ais manna amanglatasmanakatpah muihmana nuhni kidika laih Krais witing muihninuh bik apis kidika? ¿Dawak yang kidika Krais muihninuh apis kidika dutik yal as ahal manas karak kalangwa kidika muihninuh bik apis yamnik sipyang? ¡Sipawas ki! 16¿Manna amanglatasmanah muih al as kidika muih yal ahal manas karak kalpakwa as karak kalduduwa mani kat, muihnina nuhni aslah kalwa kidika? Bahang Ulna yakat aput yulwi: “Witingna albupak sihm muih aslah kapat karang.”#Gn 2:24. 17Kaunah muih as Dawan karak aslah kalahwa mani kat, witing karak aslah kalwi spirit niningyakat.
18Bahang manna la munah kaldunin lani awas kidika kaupak iranauh. Muih as di dutni ūk yamwa kidika, witing muihninuh yakat kaldaukalwas ki; kaunah angdika muihni la munah kalduduwas kidika laih, witing silp muihninuh niningyakat dutni yamwi. 19¿Manna amanglatasmanah muihmana nuhni kidika laih Papang yaklau Spirit Holi ūni manana kidika, dawak Spirit Holi laih manna yakat yalahwa kidika?#1 Kor 3:16; 2 Kor 6:16. Manna muihmana nuhni kidika laih alas daniwan awasmana, 20kat Papang yaklau manabakanwi yakna bahang. Kidika bahang Papang yakat rispik kalyamnamna ki muihmana nuhni yakat.
Currently Selected:
1 Kurint 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
