ROMA 4
4
Ametnak ara, Abraham, Allah asicimefen
1Bare. Dar wow e darak juwas Abraham atakam aotawmom. Aramat ipic awapom Yahudi ow darak ara. 2E Abraham akatas aemef, wunam Allah, e aramat ipic, jipic tarowat ara, inim atakam asakamtiwef aranew? Inimas aemefnew, bare e Abraham arma batawsicim asan araman. E nat, ar Allah bipu arma bwemtawsicim asan opok. 3E Alkitab atakam ara, “Abraham, Allah asicimef. Inimas Allah, aramat ipic, jipic tarowat ara, inim atakam asakamtiwef.” E Alkitab inim aema. 4Bare, pok bwemtam ipic, e agaji atewetcema. Ow nat, e gaji mami batetam opok. Aramat ipic, bare pok aemtamcema. Inimas e ow gaji e jipic atetamcema. 5Allah, bare, dosa ow, ow tarowat ara, inim atakam basakamtiw ipic ara. E Allah basicim ipic nat, Allah ar jipic tarowat ara, inim atakam basakamtitam, pok bwememtam asan opok. Ar nat, Allah asicimama. Inimas Allah, aramat ipic tarowat ara, inim atakam asakamtiwma. 6Daudam inim inim atakam aotawefen. Aratakam ara, Allah, ow, ow tarowat ara, inim atakam asakamtiwma. E owam pok Allah bwemtam opok ow ara. Bare, e owam jak akatnakut aememames. Daud era atakam aotawefen. E Daud atakam:
7“Allah, wun ow asalah, binip ajiosomef. Aram e ow adosa akokoromosomef. E ow, bare asan akat ara.
8Tuhan, e ow adosa bajucucumirawar opok aemama. Bare, e ow asan akat ara.”
Daud inim aeefen. 9E asan akat, e sunat epcom ow cowok aras aranew? Opok. Ar e sunat opok owam aras ara. Bare, dor atakam car emcaotawen: “Abraham, Allah asicimef. Inimas Allah, aramat ipic, jipic tarowat ara, inim atakam asakamtiwef.” Inim emcaeey. 10Allah eras atakam ucim jofay asakamtiwefnew? Abraham sunat opok aememef, wunam Allah inim atakam asakamtiwef, inimas aranew? Ow e Abraham sunat bap aemtiwfes, wunam Allah inim atakam asep asakamtiwef, inimas aranew? Bare, Abraham sunat opok aememef, wunam Allah inim atakam asakamtiwef araman. 11E Abraham sunat opok ememef, Allah, aramat ipic jipic tarowat ara, inim atakam asakamtiwefen. Asep ara masirin, ow e Abraham sunat aemtiwfesen. E sunat, Allah, e Abraham jipic tarowat ara, inim atakam bap asakamtiwef baporomas ara. Bare, e Abraham, e Allah basicim ow takas, arakut aememef. Allah, e sunat epcom opok owam, ow tarowat ara, inim atakam asakamtiwma. 12Ametnak ara, e darakut Abraham, e Allah bap asicimefen. Asep ara masirin, ow e Abraham sunat aemtiwfes. Wowam wun ow sunat epcom. E nat, aram Allah bap asicimfes. Ar e Abraham aemefas jipu cowok aemames. Inimas Abraham e ow arakut ara.
13Allah atayi Abraham aeefen. “Oram, orurpisam, awames capinmi takas atowomcomokom.” Inim aeefen. Allah e Abraham e Jirmec ji bwe aporef, wunam e atayi aeef aranew? Inimas opok. E Abraham nat, e Allah asicimefen. Allah masirin, aramat ipic, jipic tarowat ara, inim atakam asakamtiwefem. Allah inimas aporef, wunam e atayi aeefen. 14E nat, e Jirmec ji bwe ow, e Allah atayi aeefas atowomces ayaw, bare e Allah basicimas desenas ara. Wunam, e Allah atayi aeefasam, bare desenas ara. 15Allah e Jirmec bopow ow ajurusumcema. E nat, e jirmec opok asan, ow, Jirmec bwemopow asan opok.
16Abraham, Allah asicimefen. Inimas Allah e atayi aeefen. Eras, Allah, e Abraham urpis takas, mami atetamcowas baporomas ara. E mami batetamas nat, e Jirmec ji bwe ow aras cowok opok. Eram e Abraham, Allah asicimef inim cimin ow aras ara. E Abraham, bare dar takas darakut ara. 17Er e Alkitab atakam jipu ara. “Dor or samat arke arakut, inim atewemfin.” Allah inim aeefen. E atayi aeef ipic, bare Allah ara. Inimas e atayi, bare faknakut ara. Abrahamam e Allah asicimefen. E Allah, bare, e damir ow baworomsumutumtam ipic ara. Aram jirmec ajirimama. “E ji bwerem opokas, bare ji baeremces.” Inim aema. E Allah, inimas aemamar ipic ara. 18E Abraham, bare akmatnakut aememefen. Inimas ar jiwi bwemfimat asan opoken. Aramat ipic nat, jirey cowok Allah aeefen. Aram Allah asicimefen. Inimas ara, ar samat arke arakut aememefen. Er e Alkitab atakam jipu ara: “Orurpis bare arkenakut aememcemes.” E Alkitab inim aema. 19E jofay ara, Abraham arumur seratus tahun ajiwarnew arawen. Aram bi binip aceceremefen. “Dor akmatnakut ara. Dor jiwi bwemfimat asan opok. E Saraam, ema cowoc ara.” Inim bi binip aceceremefen. Aramat ipic nat, Allah fak asicimefen. 20Ar Allah basicim bakorompim opoken. Ar e Allah atayi aeefas, binip arke opoken. Ar Allah asicimefen. Inimas jak fak aememefen. Aram, “Allah akatnakut ara.” Inim aeefen. 21Aram bi binip aceceremefen. “Allah faknakut ara. Ar e atayi aefanas aemkurumceman araman.” Inim aeefen. 22“Allaham e Abraham a basicim aporefen. Inimas ar e ipic, jipic tarowat ara, inim atakam asakamtiwefen.” 23Jipic cowok a atakam surat aeapomef. “Ar e ipic, jipic tarowat ara, inim atakam asakamtiwef.” Inim surat aeapomefen. E atakam nat, Abraham atakam cowok opok. 24Aram daratakam ara. Bare, e Yesus, daTuhan ara. Allah, e Yesus aojaworomsumutumef. Daram e Allah asicimamom. Inimas ar, dar ow tarowat ara, inim atakam asakamtiwmarow. 25Dar dosa ow ara. Inimas Allah, e Yesus, damir baf aotasimemtamef. Allaham, aramat ipic, aojaworomsumutumef. Er, dar ow tarowat ara, inim atakam basakamtiwas ara.
Currently Selected:
ROMA 4: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
