ROMA 3
3
Yahudi ow asan akat ara
1E Yahudi ow nat, asan akat inim, wunam e Yahudi opok ow asan pwicak inim— inimas open? E sunat bwem akatas open? 2E Yahudi ow, bare asan akatnakut araman. E awun asan akatas ara, bare Allah, aratakam e Yahudi ow atatitamefen. 3E wun Yahudi ow nat, e atakam, ji bwe opok ara. Inimas ara, Allaham atayi aeefas jipu bwem opoknew? Car inim bi binip aceceremamokomnew? 4Inimas arapok. Allah atakamnak ipic ara. Asmat ow takas, bare suw ow ara. E Alkitab atakam ara:
“Or atakam aotawcem, ow takas, or atakamnak aporcemenes. Ow, or dosa epen, atakam asakamtiwces, aram takas, or dosa opok aporcemenes.”
E Akitab inim atakam ara.
5Wun ow atakam nat, “Dar fasias aemcom, ow, Allah atarowatas umuton aporcemes.” Inim aemes. Dar inim atakam ucim atakam atep ajitcom? “Allah siksa aemcarow, ar fasi ara.” Dar inim atakam open? (Inim atakam nat, asmat ow e atawcemes atakam inim cimin ara.) 6Inimas arapok! Allah inimas aemcow, ar, asmat ow dosa, atakam basakamtiw ucimaram? 7E ow atakam ara, “Dor suw atakam aotawcey, ow, Allah atakamnak ara, umutonnakut aporcemes. Owam, Allh arakatnakutas aporcemes.” Inim aemes. E nat, inim atakam, atakamnak aranew, Allah, e dadosa, atakam basakamtiw ucimaram? 8Bare, e owam atakam, “Dar, e pwicakas emamoc. E pwicakas bare akatas aameswasicema.” Inim aemes. Owam atakam aotawfes, “Paulusam inim atakam atawma.” Inim aefes. E ow nat, dor pwicak atakam aotawfenes. Allah e ow siksa aemcow, ar e adosa jipu siksa aemcema.
Ow tarowat, bare opok anakat
9Ucimaram? Allah, dar Yahudi ow, akat inim apormar, wunam e Yahudi opok ow, pwicak inim apormar, inim aranew? Bare, opok cowok! Yahudi owam, Yahudi opok owam, bare takas dosa ow ara. Doram inim atakam emcaotawey. 10Bare, e Alkitab atakam ara:
“Ow tarowat, bare opok anakat.
11Amsom owam opok. Allah bapowpor owam opok.
12Ow takas Allah bak apayemfes. Aram takas pwicak ara. Akatas bwem ow, bare opok anakat.
13Abweyof, bare, awerem bakapim opok awcawor ara. (Ar pwicak atakam atawcemes.) Aram suw atakam atawcemes. Aram jokmen atakam atawcemes. Bare, ar jokmen amer inim cimin ara.
14Aram cemew atakam awutnakut atawcemes.
15Aram ow bacatiw jak aserememcemes.
16E asanin asanin ajisosmes, ar ow ajursumcemes.
17Aram ow damos mamjiom amsom opok.
18Aram Allah omar amsom opok.”
E Alkitab inim aema. 19E Allah Jirmec atakam takas, e Jirmec mamkawi ow aras ara. Daram inimas namsom. E Jirmec, ow adosa bapacin bakarimas ara. Eram, Allah asmat ow adosa takas atakam asakamtiwcema, inim aporomama. 20Allah e Jirmec ji bwe ow, ow tarowat atakam basakamtiw opok. Ow nat, e Jirmec jen ajices, ar e ajak aman dosa aporcemes.
Allah, ow tarowat atakam asakamtiwma
21Wow nat, Allah, ar e ow tarowat atakam asakamtiwmaras, emcaporomef. Er jirmec ji bweas opok. E Musa tulis aeef Jirmec bukuam, e Allah atakam botaw ow tulis aefes bukuam, inim atakam ara. 22Allah nat, e Yesus Kristus basicim ow takas, ow tarowat atakam asakamtiwma. Ow takas bare awcawor ara. 23Ow takas dosa aemfes. Allaham, “E ow akat ara,” inim atakam bwemotaw asan opok. 24Allah nat, ow damos ipic ara. Ar Kristus Yesus e ow dosa asurumtamefas aporef. Inimas ar e ow, ow tarowat ara, inim atakam asakamtiwef. E owam, Allah e damos, pomatam bwemem asan opok. Er mamias ara. 25Allah, e Yesus, dosa bakokoromosom ipic atewemef. Yesus, e ares atetamef ara, er a basicim ow adosa bakokoromosomas ara. Allaham, “Dor jipic tarowat,” inim baporomtam aememef. Inimas ar eras aemef. Bap ara nat, ar jak jirow aememawiri. Ar, e ow, dosa opok cimin aememawiri. 26Wowam ara, ar, “Do jipic tarowat ara,” inim baporomtam aememama. Ar masirin, wow, ow dosa manmok atiwemkurumama. Inimas ara, ar jipic tarowat ara, inim aporomama. Aram e Yesus asicimames ow, ow tarowat atakam asakamtiwma, inim aporomama. 27Inimas ara, dar ucimas darma asicimcom? Dar darma bwemsicim asan opok. Dar e Jirmec ji aefom, wunam Allah dar ow tarowat atakam asakamtiwforownew? Inimas opok. Da nat, Yesus asicimfom, wunam Allah, dar ow tarowat ara, inim atakam asakamtiwforow. 28Allah, e Yesus asicimames ow, ow tarowat atakam asakamtiwma. Ar e Jirmec ji bwe ow, ow tarowat atakam basakamtiw opok. Dar inimas apormom ara. 29Allah e Yahudi ow cowok arAllah aranew? Aram e Yahudi opok ow arAllah aranew? Aram arAllah araman. 30Bare, e Yahudi owam, e Yahudi opok owam, arAllah cowkon araman. E sunat epcom ow, Yesus asicimces, Allah e ow, ow tarowat ara, inim atakam asakamtiwcema. E sunat opok owam, Yesus asicimces, Allah e ow, ow tarowat ara, inim atakam asakamtiwcema. 31Dar Yesus asicimamom, inimas dar e Jirmec ajiwosomamomnew? Dar inimas opok cowok. Dar e Jirmec, Jirmec anakat ara, inim atakam aotawmom.
Currently Selected:
ROMA 3: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
