1 KORINTUS 9
9
E atakam botaw batewosom ow akerjaas
1Bare, asmat ow jirmec dor bajirim opok ara. Doram atakam botaw batewosom ipic ara. Doram e daTuhan Yesus bi aporof. Dor Tuhan kerja aemtamof. Inimas car aramat ipic ajamkawifokom ara. 2Wun ow, “E Paulus, atakam botaw batewosom ipic arapok,” inim aemes openow. E nat, car dor atakam botaw batewosom ipic aporfokom. Car Kristus ajamkawimokom ara. Inimas owam e Tuhan dor atakam botaw atewosomfan apormes ara.
3Ow dor atakam pwicak aotawmenesnew, dor inim atep ajitmin: 4Dar ow Yesus mamkawi amememtamfom. Dar masirin, e ow aramosam, bwiam, mami bwemtewen asan opoknew? 5E wun atakam botaw batewosom owam, e Tuhan arewcewesam, e Kefasam, bare Kristen cepes atewettotorfes. E asanin asanin ajisosmes, ar e cepes atowomosmes. Daram inimas bwemem asan opoknew? 6E Barnabasam, doram, daramos baytin kerja aemcomom. E wun ow nat, inimas opok. Da nat, e wun ow inim cimin bwememem asan opoknew? 7Ow, tentara tugas afiwces, aram arop amos ajitincemesnew? E cesapok batewapom ow, e anakatas memen opok aemcemesnew? Domba manmok batiw ow, e domba aw ban opok aemcemesnew?
8E atawmin atakam nat, asmat atakam jipu cowok opok. Allah Jirmecam inim atakam ara. 9Allah e Musa atetamef Jirmec ara: “E gandum eke aceceremnemama sapi, e bweyof manam bajikapom arapok.” Inim aema. Allah nat, e sapinak atakam aotawefnew? 10Ar daratakam aotawefnew? Bare, ar daratakam aotawef araman. E kebun capinmi mananasim ow, e wun pok akan anakatas baemences. E eke bakokomtatam owam, e wun eke baemences. 11Bare, dar Yesus mamkawi car amememtamfenom. Inimas car pok amatam dar bwem pwicak arapen? 12Car pok e wun atakam car mamememtam ow, amatam aemamokom ara. Caram inimas dar bwem, bare daras araman.
Da nat, car pok amatam janim manim opok aemawirum. Daram asan pwicak aemapawirum. Da nat, inim aemapawirum. Dar, car e Kristus Atakam Akat mamkawikurum bakekemasin. 13Bare, e Allah cem aman kerja ow, e cem pok aancemes. E cem aman jowse pok bafamtam kerja owam, e wun pok aancemes. Car inimas camsom opoknew? 14Inimasam ara, Tuhan jirmec ajirimef: “Ow e Atakam Akat acacapiomces, e jen ajices ow, pok a batetamces.” Inim aeef.
15Do nat, e capok batew opok aemawiru. A suratam aeapomamin ara, dor e capok janim manim opok. Dor e Atakam Akat car mami bacacapiomtam bakari, bare pwicak ara. Do nat, damir baf akat ara. 16Dor e Atakam Akat acacapiomcimin. Tuhanam dor inimas bwem jirmec ajirimfan. Inimas dor dorma bwemtawsicim asan opok. Dor e Atakam Akat botaw opok aemcey, dor asan pwicak aemapcimin. 17Dor e Atakam Akat bacacapiom ipic memem bi binip dorma aceceremof ayaw, bare pok batew doras ara. Do nat, e Atakam Akat bacacapiom ipic memem, bi binip dorma bacecerem opok. Tuhan eras bwem atewemfan. 18Inimas ara, dor ucim pok atewetcey? Bare, dor e Atakam Akat mami acacapiomtamcimin. E atakam jen ajimes ow pok batew, bare doras ara. E nat, dor e pok batew opok. Dor e apok batew opok ara, bare pok anakat atewetcimin inim cimin ara.
19Bare, asmat ow jirmec dor bajirim opok. Dor ow amami kerja bwemtam ipic opok. E nat, dor ow takas mami kerja bwemtam ipic dorma aememof. Er, dor ow arke Kristus mamkawi bacajimtawas ara. 20Doram e Musa tulis aemef Jirmec aman bemap opok. E nat, dor e Yahudi ow akac ememcey, dor Yahudi ipic cimin aememcimin. Er, dor e Yahudi ow Kristus mamkawi bacajimtawas ara. 21Wunam, dor e Musa tulis aemef Jirmec opok ow akac aememcey, doram Musa Jirmec opok ipic cimin aememcimin. Er e Musa Jirmec epcom opok ow, Kristus mamkawi bacajimtawas ara. Do nat, Kristus jirmec ji aemin. Inimas ara, dor Allah jirmecam bopow opok. 22Doram e Kristus mamkawi fak opok ow akac aememcey, doram mamkawi fak opok ipic cimin aememcimin. Er e mamkawi fak opok ow, mamkawikurum bacajimtawas ara. Dor ow takas aememamesas cimin aememcimin. Er, dor e wun ow bajortewas ara.
23E aemciminas, bare e ow arke e Atakam Akat mamkawias ara. Dor masirin, e Atakam Akat mamkawi ow asan akat akac aemcimin.
24E je mamtamam ow, je takas aatcemes. E nat, jipic cowoknakap pok atewetcema. Car inimas camsom araman. Bare caram je foroa. Inimas car e pok atewetcomokom inim cimin ara. 25E je mamtamam ow, jiwne opok kus bamapom akatipicas batewet, je aamtamamcemes. E nat, ar je foro mamememkurum, jak fak aememcemes. Da nat, jiwne kus bamapom akatipicas batewet, je aamtamamcomom inim cimin ara. 26Inimas ara, dor e je bamertukem asanpu, je tarowat aatcimin. Doram ban fon atow aecey, dor bafifinim opok aemcimin. 27Doram ban fo a dodam dorma aemcimin. Er e dodamam, e dojakam, fak bemapomas ara. Eras bwem, dor e Atakam Akat kawey ow bacacapiom, wunam dor e atakam mamkawikurum opokasinas ara.
Currently Selected:
1 KORINTUS 9: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
