1 KORINTUS 2
2
Kristus e salib os op damir aafefas
1Dojowow akatonokom. Dor e Allah atakam car botaw aenawof ara, dor aman atakam batowotnaw opok. Doram e cescuwas atakam batowotnaw opok. 2Do nat, atakam, bap asakamtiwof: “Dor e Korintus ow cowkon aemapcey, dor e Yesus Kristusam, e salib os op damir aafefasam, inim atakam cowok aotawcimin.” Inim aeof. 3Dor car ajinawfin ara, dor dam kumit ipic aememof. Dor omaram, dam teteteam, aemof. 4-5Eras, car e asmat ow bi binip umutonas atakamin jen bajiasin. Caram e asmat ow bi binip umutonas atakam basicimasin. Do nat, car Allah afakas bapor, wunam e atakam basicim, akat aeof. Inimas ara, dor atakam car aotawfinam, atakam car acacapiomfinam, bare dor asmat bi binip umutonas atakam car bacajijimtaw opok. Do nat, e Roh Kudus atetamfan fakas car aporomtamfin.
Bi binip umutonas anakat
6Da nat, atakam Yesus mamkawi fak ow aotawcom, daram bi binip umutonas atakam aotawcomom. E bi binip umutonas atakam nat, awames capinmias opok. Aram awames capinmi kepala ow abi binip umutonas atakam opok. E ow, bare akorneycemes. 7E atakam atawmom bi binip umutonas bare Allah aras ara. Eram amannakut ara. Ametnak ara, ar e bi binip umutonas, atakam asmat ow botaw opok. E nat, aramat ipic a capinmi bakenemtiw opok aemef, ar e bi binip umutonas, atakam bap asakamtiwef. Eras, asan akatnakut dar bomas ara. 8Awames capinmi kepala ow nat, e atakam jen baji opok aemfes. Jen ajifes ayaw, ar e akatnakut Tuhan, e salib os op bacatopom opok ara. 9Er e Alkitab atakam jipu ara:
“E asmat ow manmok batiw opokasam e jen baji opokasam, e bi binip bacecerem opokasam, bare Allah, eras takas, e ar damos ajiomames ow batetam, akenemapomef.”
Inim aema. 10Allah nat, e curuwas aporomtamforow. E aRoh eras aporomtamforow. E Roh, bare e takas aoworporma. Aram e Allah e amannakutasam aoworporma. 11Asmat ipic abi binip amsom ipic, bare e ipic arop ara. Allah Roham arop, e Allah bi binip amsom ara. 12Bare. Dar awames capinmi roh batewet opok. Dar e Allah atetamforow Roh atewetfom. Inimas dar e Allah atetamcemarowas aporkurumcomom. 13Daram eras atakam aotawcom, dar e asmat ow amememtamcemes bi binip umutonas atakam botaw opok. Dar e Roh amememtamforow atakam aotawcomom. Dar e Roh atakam, e Roh epcom ow aotawtamcomom. 14E Allah Roh epcom opok ow nat, e Roh atetamcemaras batewet opok aemcemes. E ow bi binip ara, “Eras jenas ara,” inim bi binip aceceremcemes. Aram e Roh atetamcemaras atakam jen bwemji asan opok. E Roh epcom ow nat, eras akat, inim atakam asakamtiwcemes. 15E Allah Roh atakam ji bwe ow, e takas, akatasnew, pwicakasnew, atakam asakamtiwcemes. Wun ow nat, e Allah Roh atakam ji bwe ow, ow akatnew, ow pwicaknew, atakam bwemsakamtiw asan opok. 16E Alkitab atakam ara:
“E Tuhan bi binip ow cam? E aramat ipic atjen bow ow cam?”
Inim aema. Da nat, Kritus bi binip atowopfom ara.
Currently Selected:
1 KORINTUS 2: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
