Varoma 12

Wutomi wa wuphya ka Kristu

1Na mi khongotela koko vanathu ngu wumbilu wa Txizimu, ti to mi ningela mimidi yanu, yi maha mhamba ya kuhanya ni ya kusawuleka, ayi yi tsakisako Txizimu, i kuwona mphaxo wu wu lavekako. 2Mi nga xengetelweni ngu sa ditiko diya, aniko phindukani amu ka mapimo anu, kasiku mi ziva kuranda ka Txizimu: Ati i ku ta tinene, a ti ti mtsakisako, ni ti i ku ta kuhetiseka.

3Ngu mtamo wa kateko yi ni nga ningwa, na laya mmwani ni mmwani a ku hagari kwanu ti to asi thuki a txi ti alakanyela kupinda mpimo wa fanelo yakwe, aniko a nave ni mapimo a kutiveka hahatshi, madingano ni mpimo wa likholo li Txizimu txi nga avela ka mmwani ni mmwani hagari kwanu. 4#Wona ni ka: 1 Vak. 12:12. Nguko, kufana ni ku hi ku ni sihango sasingi ka mmidi wumwewo, kambe sihango siya si si mahiko mthumo wumwewo, 5ngu toneto nanathu, hambiko hi ku vangi, hi mmidi wumwewo ngu ka Kristu, se mmwani ni mmwani njihango txa mkwawe.

6 # Wona ni ka: 1 Vak. 12:4-11. Ngu konaho, ngako hi ku ni sihiwa so hambana, madingano ni kateko yiya mmwani ni mmwani kwathu a nga ningwa yona, he si thumiseni; awu a ku ni txihiwa txo nuwela dipswi da Txizimu, a na nuwele ngu mpimo wa kukholwa kwakwe;

7awu a ku ni txihiwa txa kuthumela vamwani, a na va thumele; awu a nga ningwa kugondisa a na gondise; 8#Wona ni ka: 1 Vak. 12:1-31a. awu a nga ningwa kulaya a na laye; awu a abaniselako, a na mahe ngu kutxhatxheka; awu i ku mthangeli a na thume ngu kutiningetela; awu a mahako mithumo ya wumbilu a na yi mahe a di henemene.

Mahanyelo a wukristu

9Lirando li nga ve ni kuxengetela, vengani to biha, mi txi namarela ka ti i ku ta tinene. 10Zumbani ngu kurandana nga vanana va m'thu mmweyo, mi txi palisana ngu kukombisa txithavo ka mmwani ni mmwani. 11Khutalani, mi nga telweni ngu dikhodho; turani moyani, mi txi thumela Mkoma. 12Tsakani kuthembani kwanu, mi txi timisela kuxanisekani; mi txi simama kukhongelani. 13Vhunetani vasawuleki ka si va si pwatako, mi txi amukela vapfhumba ngu manza mambidi. 14#Wona ni ka: Mat. 5:44; Luk. 6:28. Katekisani va va mi zondako, va katekiseni, mi nga wombeni kubiha ngu vona. 15Tsakani ni va va tsakako, mi txi dila ni va va dilako 16#Wona ni ka: Mav. 3:7. Zumbani ngu kuengisana; mi nga naveleni sa kuguleka; kambe sengelani ni va va ti vekako hahatshi; mi nga laveni ku ti maha titxhari mialakanyoni kwanu. 17Mi nga tshumeteleni kubiha ngu kubiha, kambe zamani kumaha ti i ku ta tinene masoni ka votshe vathu. 18Zamani kumaha ti mi ti kotako ngu didhawa danu, kasi ku mi hanya ngu kuthutha ni votshe vathu. 19#Wona ni ka: Dhewut. 32:35. Vo randeka ngutu, mi nga photeni mipune, kambe lekani Txizimu txi ti henyela, nguko ti bhatwe ti taku: “Kuphota kulumba ani, ngani ni no tshumetela, kuwomba Mkoma.”

20 # Wona ni ka: Mav. 25:21-22 (LXX). Aniko, ngako mlala wako a di ni nzala, mu he sakudya. A di ni ditora, mu ninge so sela, nguko u txi maha eto, wo hembenyetela makala a mndilo ha msungo kwakwe. 21U nga xulwe ngu kubiha, kambe xula kubiha ngu wunene.

Currently Selected:

Varoma 12: BEC2016

Highlight

Compare

Copy