Mtuletelo 6

Sixambanyo

1Se ni woni Txinvutana mbimo yi txi nga kwamula tximwetxo ka sixambanyo sa mtxhanu ni simbidi, ni engisile txivangwa txo khata txa sivangwa sile sa mune so hanya, txi txi womba-womba ngu dipswi do nga txingwalangwanda, txi txi kha txona: “Ngono!” 2Se konako ni to wona dihantxhi do basa, mgadhi wa dona a di ni wulaho. Va mu ningile m'bhoti, se e huma, nga ndena, yi yi yako kuxulani.

3Mbimo yi Txinvutana txi nga kwamula txixambanyo txa wumbidi, ni to engisa txivangwa txa wumbidi txo hanya txi txi kha txona: “Ngono!” 4Se ku to humelela dimwani dihantxhi, do bhilivila, se mgadhi wa dona a ti ningilwe mtamo wo thavisa kudikha ha mafuni, kasiku vathu ve dayana vapune. A ningilwe kambe ditxhari da hombe. 5Mbimo yi Txinvutana txi nga kwamula txixambanyo txa wuraru, ni to engisa txivangwa txa wuraru txi hanyako, txi txi kha txona: “Ngono!” Konako ku to humelela dihantxhi da ntima, mgadhi wa dona a ti ni txikalo manzani. 6Konako ni to engisa txo nga dipswi, di humako ngu ka mune wa sivangwa si si hanyako, di txi kha dona: “Mpimo wumwewo wa fulaho wu xawa ngu male ya didhenari dimwedo, mipimo yiraru ya mahila ni yona yi xawa ngu male ya didhenari dimwedo, se u nga onhe mafura ni vhinya.”

7Mbimo yi Txinvutana txi nga kwamula txixambanyo txa wumune, ni to engisa dipswi da txivangwa txo hanya txa wumune, di txi kha dona: “Ngono!” 8Ni to wona ku txi humelela dihantxhi do kwalala. Mgadhi wa dona a ti dhanwa ku i “Kufa,” se a ti londetelwa ngu Gehena. A ningilwe mtamo wa kufuma didhawa da wumune da mafu, kasiku e daya vathu ngu ditxhari, ni nzala, ni ntungu ni sihari sa txitinga.

9Mbimo yi Txinvutana txi nga kwamula txixambanyo txa wutxhanu, ni to wona, hahatshi ka txiluvelo, mimoya ya vale va nga dawa ngu mhaka ya dipswi da Txizimu ni mhaka ya kuwa va ngadi fakazela. 10Se vona va to kwangula ngu dipswi da hombe va txi kha vona: “Hi na kurinzela kala ditshiku muni, Mkoma wo sawuleka ni wa ditshuri, awe u telako ku ta lamula, ni kupharela mnoha wathu ka vaaki va ha ditikoni, kani?”

11Konaho, mmweyo ni mmweyo wawe a to ningwa syambalo so basa, se ve gelwa kambe ti to veya masoni ngu kuhumulanyana, kala kuza kutatiseka mtengo wa vakwawe ni vanawe, ava va no dawa nga vona. 12#Wona ni ka: Mtu. 11:13; 16:18; Mat. 24:29; Mar. 13:24-25; Luk. 21:25. Ni txi woni Txinvutana, mbimo yi txi nga kwamula txixambanyo txa wutxhanu ni tximwetxo: Ku to humelela kuzinginika ka hombe ka mafu: Ditambo di to maha da mtima, nga nguwo ya mkhwasi, se mtxima wotshe wu hinduka wu bhilivila nga mnoha. 13Tinyeleti ta nzumani ti to khatuka ha mpfhukani ti wela ha mafuni, nga maxanvu a mambisu a mxanvu wu wu zuzwako ngu txihuhuri. 14#Wona ni ka: Mtu. 16:20. Nzuma yi to thaviswa nga dibhuku da didhowo, ngako di di petilwe, se yotshe mimango ni sitondolo si rurisilwe ka wukhalo wa sona. 15Vafumi va mafu, ni tinduna, ni vathangeli va tiyimbi, ni vanyatithombe, ni vathu va mtamo, ni votshe tikhumbi ni vathuseki, va to tumbela maphalani ni hahatshi ka marigwi mimangoni. 16Ve gela mimango ni marigwi va txi: Khundumukani mi txi hi khubhunyeta, mi hi sisa ka khohe ya wu a nga khalahatsha ha txikhaloni ka wukoma, ni ka kuhenya ka Txinvutana, 17nguko di hokile ditshiku da hombe da kuhenya kwawe, se i mani a no sikota kuema, kani?

Currently Selected:

Mtuletelo 6: BEC2016

Highlight

Copy

Compare