Mtuletelo 21

Nzuma ya yiphya ni mafu a maphya

1 # Wona ni ka: 2 Ped. 3:13. Konako ni to wona nzuma ya yiphya ni mafu a maphya, nguko nzuma yo khata ni mafu o khata si ti fuvile ni linene li si swi li diho. 2Sekoko, ni woni didhoropa do sawuleka, Jerusalema wamphya, a nga txi relela ngu nzumani, a txi khukhela ka Txizimu, didhoropa do tshurisa ku nga wamsikati wu a nga bombiselwa mkatawe. 3Se ni engisile kambe dimwani dipswi da hombe di nga pfala di txi khukhela ka txikhalo txa wukoma, di txi kha dona: “Ndide ditenda da Txizimu di ku hagari ka vathu! Txona txi na aka hagari kwawe, vona va na va i di vathu va txona; se txona Txizimu txipune txi na va txi di navo, txi maha Txizimu txawe. 4Se Txizimu txi na bahulela yotshe mirongo tikhoheni kwawe; kha ku na mbi swa ku txi maneka kambe lifo, hambi kudila, hambi tihuwa, hambi kupandiseka, nguko so khata si pindile.”

5Senikoko, awule a nga ti maneka a di khalahatshile ha txikhaloni ka wukoma, a ti khene: “Wonani: Sotshe na si hindula si txi maha sa siphya.” Se a to engeta a txi khene: “Bhala, nguko mapswi awa ngo thembeka ni a ditshuri.” 6A to engeta kambe a txi khene: “Ona mapswi awa ma tatisekile. Ani ngani Alfa ni Omega, ngani Makhato ni Magwito; ka wu a ku ni ditora ni na mninga mahala mati a txisima txa wutomi. 7#Wona ni ka: 2 Sam. 7:14; Mas. 89:26-27. Awu a no xula a na amukela thomba yiya, se ani ni na va Txizimu txakwe, ene a na va mwanana wangu. 8Kambe ka va va dizowa, vo mbi kholwa, vo dhunda manyala, va dayi va vathu, magelegele, va matiloti ni votshe va lumbeti, vakhozeli va si i ku si nga Txizimu, ni ka votshe va makuhu, txyavelo txawe ngu kuvinzwa txizivani ka mndilo wo tura ngu txivavula, i ku lona lifo la wumbidi.”

Ta Jerusalema wamphya

9Msana keto, yimweyo ka tingelozi ta mtxhanu ni timbidi, ti nga ti ni magombe a mtxhanu ni mambidi, ma di tate ngu mtxhanu wa mitungu ni yimbidi yo gwitisa, yi to ni tela yi ta ni gela yi txi kha yona: “Ngono ni ta kukomba txiwutwa, msikati wa Txinvutana!” 10Ngelozi yi to ni teka ngu moya yi ni yisa txitimwi ka mmango wo lapha, yi ni komba didhoropa do sawuleka da Jerusalema, adi di nga txi relela ngu nzumani, di txi ta ngu ka Txizimu. 11Di ti ni kuphatima ka wudhumo wa Txizimu. Kuphatima ka dona ku txi fanana ni ka dirigwi da lisima ngutu, kufana ni dirigwi da Jasperi do basa, nga kristali. 12#Wona ni ka: Eze. 48:30-35. Di ti ni diguma da hombe do lapha, da digumi da sike ni simbidi, si wonelelwako ngu digumi da tingelozi ni timbidi; txitimwi ka sona sike sile, ku ti bhatwe matina a digumi da tihunzu ni timbidi ta vanana va Israyeli. 13Wutxani ku ti ni sike siraru; wuphemba ku ti ni sike siraru, wulambwe ku ti ni sike siraru, mwaditambo ku ti ni sike siraru. 14Diguma da didhoropa di ti ni digumi da makhato a kuaka ni mambidi, ni txitimwi ka ona ku ti ni matina a digumi ni mambidi, a Vapostoli va Digumi ni vambidi va Txinvutana. 15Ngelozi yi yi nga txi womba-womba ni nani yi ti ni ndonga ya nzalama kasi kupima ngu yona didhoropa, ni matimba a dona ni diguma da dona. 16Didhoropa di ti ni mune wa makhona: Kulapha ka dona ku ti ti fana ni kuanama ka dona. Konako ngelozi yi to pima didhoropa ngu ndonga: Di ti ni 12.000 wa makilometru. Kulapha, kudemba ni kuanama ka fana. 17Ngelozi yi to pima ni dona diguma: Di ti ni madingo a 144, i ku mapimelo a vathu, yi nga ti pima ngu ona ngelozi.

18Diguma di mahilwe ngu dirigwi di dhanwako ku, i jasperi se didhoropa di mahilwe ngu nzalama ya lisima, yo fana ni dibono do basa.

19Makhato a kuaka a diguma da didhoropa, ma tshurisilwe ngu totshe tixaka ta marigwi a lisima: Makhato a kuaka o khata nga jasiperi; a wumbidi nga safira; a wuraru nga kalkedoniya, a wumune nga esmeraldha; 20a wutxhanu nga sardonika; a wutxhanu ni dimwedo nga kornalina; a wutxhanu ni mambidi nga krizolito; a wutxhanu ni mararu nga bherilo; a wutxhanu ni mune nga topaziyo; a wugumi nga krizoprazo, a wugumi ni dimwedo nga jakinta; a wugumi ni mambidi nga ametista. 21Matimba a digumi ni mambidi, i ti digumi da tidhayimana ni timbidi. Ditimba ni ditimba di mahilwe ngu dhayimana yimweyo. Mtendela wa didhoropa wu mahilwe ngu nzalama ya lisima, nga dibono do wonekela. 22Kha na wona dithepele ni da dimwedo didhoropani, nguko Mkoma Txizimu txa mtamo wotshe ngu ngene i ku dithepele da kona, kumweko ni Txinvutana. 23Didhoropa kha di lavi kuwoninga ka ditambo, hambi ka ntxima, nguko dona di woningwa ngu wudhumo wa Txizimu, ani dilambu da kona ngu Txinvutana. 24Mifumo yi na tsimbila yi txi woningwa ngu liwoningo la didhoropa diya, ni vafumeli va mafu va na neha ka dona tithomba ta vona; 25matimba a dona kha ma na mbi thuka me sekwa ni mitshikari-nguko aho kha ku na mbi va ni wusiku. 26Va na di wuyisela wudhumo ni tithomba ta mifumo yotshe. 27Ka dona kha ku na mbi thuka ku txi wulela ni txihi txilo txa nzambwa, hambi va va mahako to nyenyeza ni vamakuhu. Va na wulela dwe avale va nga bhalwa dibhukuni ka wutomi wa Txinvutana.

Currently Selected:

Mtuletelo 21: BEC2016

Highlight

Copy

Compare