Masalmo 98
98
Ka mfumeli wa dotshe ditiko
Disalmo.
1Embelelani ka Mkoma ndando ya yiphya,
nguko ene a mahile sidiwukiso!
Diwoko dakwe da txinene di mningile kuxula,
kuxula ku nga mahwa ngu diwoko dakwe do sawuleka.
2 Mkoma a zivisile kuhanyisa kwakwe;
masoni ka mifumo a kombisile kululama kwakwe.
3A alakanyile lirando lakwe ni kuthembeka kwakwe
ka vathu va ka Israyeli.
Hambi vathu va va ku magemeta-mitshi ka ditiko
va ku woni kuhanyisa ka Txizimu.
4Huwelelani Mkoma ngu litsako,
motshenu vathu va ha mafuni.
Pekani mikulungwani ya litsako, nengelani mi txi embelela tindando.
5Embelelani tindando ka Mkoma mi txi veta mbila,
mi txi veta mbila ni txitende,
6mi txi veta maposi ni mipundu.
Tsakani masoni ka Mkoma,
nguko ene ngene mfumeli.
7Li na dhume linene ni sotshe si si ku ka lona,
di na embelele ditiko ni votshe vathu va dona.
8Minambo yi na peke manza
ni mimango yi na peke mikulungwani ya litsako
9masoni ka Mkoma, a tako ku ta lamula ditiko,
ku ta lamula ditiko ngu kululama,
a txi lamula vathu ngu fanelo.
Currently Selected:
Masalmo 98: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
