Masalmo 94
94
Txizimu mlamuli wo lulama
1 Mkoma, awe u Txizimu txa kutsayisa wubihi!
Txizimu, kombisa txiviti txako!
2Awe, u ku mlamuli wa ditiko,
khukha u txi ninga va va kutikulisa,
txhatxhazelo yi va fanelako ku yi amukela!
3Va na tsaka kala mbimo muni, Mkoma,
va na tsaka kala mbimo muni
avale va mahetelako kubiha kani?
4Votshe va va mahako kubiha va ti guleta,
va ti kulisa ni kutiguleta ngu wubihi.
5Vona va xupha vathu vako, Mkoma,
va xanisa vathu va va kulumbako.
6Va daya tinoni ni vo felwa ngu vaveleki,
kumweko ni valuveli va va ku ditikoni kwathu.
7Vona va kha vona: “Mkoma kha hi woni;
Txizimu txa Israyeli kha txi khatali ngu tona!”
8Anu sipumbu, mi na gonda mbimo muni kani?
Anu vathu va mahundwa, mi na ziva mbimo muni, kani?
9Txizimu, txi nga maha tinzeve,
kha txi na mbi engisa kani?
Txona txi nga maha maso, kha txi na mbi wona kani?
10Awule a layako mifumo, kha na mbi yi tsayisa, kani?
Ene ngene a gondisako vathu wuzivi!
11 # Wona ni ka: 1 Vak. 3:20. Mkoma a ziva mipimiso ya vathu;
taku va pimisa ta wukanganyisi.
12A katekile m'thu wule u mkawukako awe Mkoma,
ni wule u um'gondisako mlayo wako,
13kasi ku u mninga kuhumula
amu ka masiku o biha,
kala kuza di kelwa diphala
da kutshotsha m'ubiha.
14 Mkoma kha na mbi tshotsha vathu vakwe;
ene kha na mbi tsukula avale i ku vathu vakwe.
15Ku na tshumela kumahwa kulamula ko lulama
votshe vathu vo lulama timbilu va na kulondeta.
16I mani a no ema ni nani
hilwa ni siphukuphuku kani?
I mani a no ema ni nani
hilwa ni vale va mahetelako kubiha kani?
17Kudotho nga ni di reletilwe diphalani ka lifo,
idiku Mkoma a sa ni vhuna.
18Aniko ani ni ti khani: “Mikondo yangu ya rithimuka!”
Konaho lirando lako, Mkoma, li tile li ta ni seteta.
19Hagari ka sikarato si si nga ni talela mapimoni kwangu,
awe u ni khongotete, ni txi mana kutsaka.
20Awe khu sikoti kusengela ni valamuli vo biha,
nguko evo va teka wubihi va txi wu maha mlayo.
21Vona va maha sikungo so wukela m'thu wo lulama
ve mu abanisela lifo awu a singako ni mnandu.
22Aniko Mkoma ngene i ku wuthavelo wangu;
Txizimu i dirigwi di di ni vhikelako.
23A na maha ti to vabihi ve loviswa ngu sionho sawe,
a na va fuvisa ngu konaho ka wubihi wawe.
Mkoma, Txizimu txathu, a na va fuvisa!
Currently Selected:
Masalmo 94: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
